32
Ê-li-hu Nòih Hi Lech Ca Jop
1 Jò aih piq ngai bua Jop pi tèo hlài Jop, taiq haq doi cla dađeh ta-atoq.
2 Mahaq Ê-li-hu con calô da Ba-ra-kên, mangai Buxi, ta xinoi Ram, nòih ca Jop, taiq Jop doi dađeh ta-atoq enh ngìa ca Boc Plình.
3 Ê-li-hu hadai nòih ca piq ngai bua Jop, taiq wì haq ùh i ca bàu jah tèo hlài Jop; wì haq toq ta'mòq tôiq ca Jop.
4 Ê-li-hu gòm wì piq ngai tau capoch ca Jop hòiq, taiq wì haq yi bàc hanam ca Ê-li-hu.
5 Mahaq jò Ê-li-hu hnoq wì piq ngai aih pi i ca bàu tèo hlài Jop, Ê-li-hu loh nòih.
6 Ê-li-hu con Ba-ra-kên, mangai Buxi yòng capoch:
“Au gu 'yoh,
pì mangai craq;
taiq 'màng aih au camaih,
ùh hùa pa'noh ca pì manoh au.
7 Au hèm: Mangai khoi yi craq khòh capoch;
mangai khoi craq khòh hnài bìac khôn rabiaq.
8 Mahaq aih yiang ŏi ta mangai,
wa hòi hihèm da Chuaq I Cwìang Itai Dìq Dŏng am ca mangai i can khôn rabiaq.
9 Ùh xài rìm ngai craq joq 'nàng i khôn rabiaq,
hadai ùh xài rìh bàc hanam loq bìac ta-atoq.
10 “Taiq nen aih, au capoch: Xìn tamàng au beq;
Au hadai pa'noh dèh ta manoh.
11 Cô, au khoi gòm tamàng bàu pì,
halang don tamàng hiniq hèm ta manoh pì,
jò pì hatình capoch hiniq leq.
12 Au khoi dìq ca manoh tamàng pì daq;
au hnoq ta pì ùh i ca ma leq 'blêq bàu Jop,
loq jah tèo hlài haq.
13 Apaq doi: Nhèn chaq khoi jah can khôn rabiaq;
toq Boc Plình raq jah tarahen 'blêq ca Jop, con mangai ùh nui broq jah.
14 Jop ùh tarahen ca au,
'màng aih au ji ùh yŏc bàu pì daq tèo hlài haq.
15 “Wì talè tala pi jah tèo;
khoi dìq ca bàu tèo.
16 Au khòh gòm jò wì hêq ca capoch,
jò wì pi tèo bàu 'mòh?
17 Au hadai tèo bàu Jop;
au hadai pa'noh dèh manoh hèm dìq;
18 Ma jah 'màng aih au bình halùih bàu capoch.
Ta manoh yiang au parông au capoch.
19 Manoh au 'màng ca alac ŏi ta cabi 'nhòq pèh,
haq tro ta cabi ten loh ca padah.
20 Am ca au capoch đòiq manoh au jah khwài;
au jah hah hacùng tèo bàu.
21 Au ùh gen can cabô;
au ùh capoch bàu padèch padô cabô.
22 Taiq au ùh 'nì capoch bàu padèch padô 'màng leq;
tàng au broq 'màng aih, Chuaq ma broq loh au jah jêh đac au tajòi 'mòi.