34
Ê-li-hu Palem Bìac Ta-atoq da Boc Plình
1 Ê-li-hu capoch hòm 'màng cô:
2 “Ô 'bài mangai ma doi dađeh rabiaq, tamàng bàu au anoi cô oq;
Ô 'bài mangai 'nì loq, halang don tamàng au beq;
3 Ma jah 'màng aih don loq tàng bàu capoch,
tìah ca hacùng mòn dahwèq caq.
4 Bèn phai ràih ca dađeh trong troq beq;
pajùm ca dabau canao loq ca bìac lem.
5 “Taiq Jop doi: Au cô mangai ta-atoq,
mahaq Boc Plình khoi dèch đac can ta-atoq da au.
6 Au ùh broq tôiq, mahaq wì xôq doi ca au mangai capoch amòng;
'nhac ca au ùh i broq tôiq, habau au xôq ùh jah brêh.
7 Cabô ma troi Jop?
Haq capoch bàu palèu tìah ca ôq diac hangeo;
8 Haq ta'mùt ca 'bài mangai rataoq,
wa lam pajùm ti 'bài mangai ngang dù?
9 Ma jah 'màng aih Jop doi: ‘Con mangai jah i lòiq cleq jò chaq bìac lem bùi ta nòi Boc Plình?’
10 “Taiq 'màng aih, ô mangai khôn rabiaq,
tamàng au beq: Boc Plình ùh broq bìac dù,
Chuaq I Cwìang Itai Dìq Dŏng ùh jò leq broq bìac ùh ta-atoq.
11 Haq ca'naih hlài da rìm ngai tiaq cla wì ma broq, tabroq ca rìm ngai tiaq trong tajì ca wì haq.
12 Joq 'nàng Boc Plình ùh broq bìac dù, Chuaq I Cwìang Itai Dìq Dŏng ùh broq tablòq ca bìac ta-atoq.
13 Cabô jao ca Haq bìac wèq plì taneh? Cabô 'nac Haq wèq cwìang dìq ca crŏng taneh?
14 Tàng Haq pajaq yŏc hlài dèh hòi hihèm wa yiang ma haq khoi pa'noh am ca con mangai,
15 'màng aih èh rìm 'bài ngè i hihèm cachìt dŏng dìq;
con mangai hadai mùt hlài ta blo taneh.
16 “Tàng ìh khôn rabiaq, ìh tamàng bìac cô beq;
ìh khòh halang don tamàng bàu au capoch.
17 Mangai leq git ca trong ta-atoq jah wèq cwìang ùh?
Ìh hùa ta'mòq tôiq ca Chuaq ta-atoq enh 'nhèq dìq dŏng 'mòh?
18 Boc Plình lech ca bùa, doi: ‘Ìh ùh i ca lòiq cleq;’
loq doi ca 'bài mangai gù craq: ‘Pì mangai ngang dù!’
19 Haq ùh gen can wì con bùa,
ùh ngan mangai can padrŏng yi hnao ca mangai pa;
ma jah 'màng aih dìq ca wì, tì Haq broq loh.
20 Khoi cô èh ùh dùnh cleq wì haq cachìt, jò 'ne mang, wì haq tarìt wa cachìt; mangai broq càn wèq cwìang hadai cachìt hnhung ùh xài taiq tì con mangai.
21 “Mat Boc Plình ti ngan trong da con mangai; Haq ngan hnoq tang cadiang wì lam.
22 Ùh i ca nòi clam loq yàp clam leq ma hlèp ca mangai broq dù cadàu mot.
23 Jò Boc Plình hadrah con mangai, Haq ùh nhet achìh jàiq ep thê wì trùh jang ngìa Haq đòiq hadrah.
24 Haq raliang đac mangai i cwìang, ùh nhet bòch cabô, hi khoi yŏc mangai 'noiq thai hlài.
25 Taiq Chuaq loq ca bìac wì haq broq,
jêh đac wì haq jò damang, wì haq cachìt.
26 Chuaq jêh wì haq taiq wì haq mangai dù,
i mangai 'noiq ngan hnoq,
27 taiq wì haq tawìh crŏng ùh tiaq Chuaq,
ùh hèm trùh ca trong Haq;
28 wì haq broq ca bàu mangai pabônh crò hmoi ca Chuaq,
Chuaq tamàng bàu dang creo da mangai 'bìq nan xa,
29 jò Haq ŏi hatenh, cabô hùa trech Haq?
Jò Haq cadoc dađeh, cabô jah hnoq Haq,
'nhac ca aih mòiq Diac loq tang ngai?
30 Haq ùh thê mangai ngang dù wèq cwìang;
ùh đòiq wì haq bet rahoch con jàn.
31 “Ma jah 'màng aih i cabô khoi doi ca Boc Plình:
‘Au khoi pòq dèh bìac baxa, au pi broq dù hòm;
32 trong leq au ùh hnoq, xìn Chuaq patô hnài am ca au;
tàng au khoi broq dù, au pi broq dù hòm?’
33 'Màng aih ìh hèm Boc Plình tiaq manoh ìh ca'naih hlài am ca ìh 'mòh? Taiq ìh khoi tajraq hlài bìac Haq broq! Cla ìh ep ràih yŏc, ùh xài au; 'màng aih bìac ìh ma loq, ìh capoch 'noh beq.
34 “ 'Bài mangai khôn rabiaq, wa rìm mangai 'nì loq tamàng au,
hi mòiq manoh ca au 'màng cô:
35 Jop capoch ùh 'nì,
wa bàu haq thìuq ca bìac khôn rabiaq,
36 au waiq ca Jop glàm bìac baxa thù trùh pulùch,
taiq haq tèo bàu tìah ca mangai dù;
37 Jop i tam bìac blàq blènh ta tôiq lôi tep tì ŏi ta'ne nhèn,
wa capoch tam bàu blàq Boc Plình.”