20
Pasua Padit Padiang Jê-rê-mi
1 Pasua, con calô da pajàu Imê, haq broq mangai wèq mangai wèq hnem cùh waiq da Boc Plình, tàng Jê-rê-mi anoi bàu aih,
2 Pasua tong Jê-rê-mi, mangai capoch thai Boc Plình xam long, clang jènh haq ti nòi 'mang ngo enh 'nhèq da Bên-ja-min, ta hnem cùh waiq Chuaq.
3 Hì atìq, jò Pasua dŏih long clang jènh Jê-rê-mi, Jê-rê-mi doi ca haq: “Chuaq ùh creo ìh Pasua hòm, mahaq creo ìh: Mago Mit-sa-bip.
4 Ma jah 'màng aih bàu Chuaq doi: ‘Cô Au jah broq ca ìh wìa bìac ramòt ca dađeh wa dìq ca bua ìh. Wì haq jah cachìt ca chang gùm enh ngìa ca ìh. Au am dìq ca jàn Juđa ca bùa Ba-bi-lôn, bùa cô jah 'nong wì lam trùh ta Ba-bi-lôn đòiq broq hapŏng, wa jêh đac wì haq xam chang gùm.
5 Au hadai am dìq cùng hang phôq cô wa rìm bìac ma wì haq broq loh, xam hang canaq 'bac da wì haq mùt ta tì wì ma ta'blêq ca wì haq, rìm ngè bìac aih wì haq jah yŏc jò tajêh wa 'ràng hlài ta Ba-bi-lôn.
6 Ô! Pasua, cla ìh wa hnem ìh cô èh dìq 'bìq rùp 'nong lam khoi dèh ca Diac lam broq hapŏng. Ìh trùh Ba-bi-lôn cachìt wa catùh ta aih, ìh wa dìq ca bua ìh mangai khoi anoi 'noh bàu amòng patìah capoch thai Boc Plình.’ ”
Jê-rê-mi Mamùc Mamac
7 Ô Chuaq, Ìh khoi padô alùan au,
hi khoi au 'bìq padô 'nùt.
Ìh khoi ta'blêq au,
èh au 'bìq 'blêq!
Dìq ca hì au khoi jah wìa bàu do,
rìm ngai halê au.
8 Ma jah 'màng aih rìm yàng au anoi 'noh,
au ep cachech, au phai capoch dêh bàu bìac hùng hang wa jêh đac.
Au anoi hlài ca wì loq bìac ma au khoi jah loq enh Chuaq,
mahaq au toq jah nhàn yŏc ca dađeh bìac camaih wa do lê rìm hì.
9 Mahaq tàng au doi: “Au pi anoi 'noh bàu Chuaq
wa pi canòm ca Haq đòiq anoi 'noh hiniq Haq hòm”,
èh bàu Haq ta chac au loh tìah ca ùnh bùh cheo caxènh au,
au lep manoh taiq ùh anoi 'noh, au ùh jah chìuq hòm.
10 Au khoi tàng bàc ngai anoi trùh au, wì doi:
“Bìac ramòt khoi dudan ca haq pôn pah!
Bèn phai kìan haq! Joq, bèn phai kìan haq!”
Rìm ngai bua da au
'nang ngan jò au tacro, doi:
“Ùac aiq, haq 'bìq 'nùt,
èh bèn jah tabroq chao wa ta'blêq haq.”
11 Mahaq i Chuaq ŏi ti au Haq 'màng ca mangai lình dêh tanuq,
'màng aih rìm ngai enh ta'blêq ca au dìq cro,
ùh jah 'blêq au;
wì haq jah camaih bìac ma wì haq khoi broq;
rìm ngai ùh hèt bìac camaih aih èh.
12 Mahaq, Chuaq ma wèq dìq ca bình plình,
Ìh joq 'nàng Boc Plình loq enh thù ngan manoh mangai ta-atoq;
Ìh loq enh ngan hnoq rìm manoh hèm
wa gàu tình da tang ngai;
Chuaq ôi, am au ngan hnoq bìac tabroq chao da Ìh ca wì haq beq,
ma jah 'màng aih au khoi canòm ca Ìh dìq ca manoh au.
13 Calêu bàu bùi ca Chuaq beq!
Calêu padèch hiniq Chuaq,
ma jah 'màng aih Haq khoi dèch mangai pa
claih khoi ca mangai ngang dù.
14 Đang ca waiq hanip hì khoi xa-ông ca au!
Waiq xìn hì ma miq au xa-ông ca au ùh jah xôq ramŏt cleq.
15 Đang ca waiq hanip mangai
ma khoi 'ràng bàu bahìa ca baq au doi:
“Ìh khoi i con calô”;
broq ca baq au bình halùih bìac lem bùi!
16 Mahaq đòiq mangai aih hadai bu dàng phôq
ma Chuaq raliang đac ùh xa-ŏch cleq!
Bu xrŏih xroq haq jah tàng bàu creo dang,
trùh 'ne hì, tàng bàu cachech da bìac tajêh poh.
17 Ma jah 'màng aih haq khoi ùh jêh đac au adroi dèh miq xa-ông ca au,
đòiq cliac miq au wìa ralùng hanang da au.
18 Gleq au phai loh enh cliac miq au
đòiq ep chìu bìac xalep wa can mango,
lùch ca 'nhòng ep chìuq bìac camaih.