3
Đùng Taneh Amùa Amech
1 Chuaq doi: “Tàng mangai ŏng cađac dèh mai,
èh mangai mai lam yŏc đeh ŏng 'noiq,
mangai ŏng aih jah wìh hlài dèh ti mai 'màng leq?
Taneh ma ùh khoi loh ca amùa 'mòh?
Gè khoi tango ca toq leq mangai cadrì,
khoi enh tawìh hlài ta Au 'mòh?
2 Ngoi ngan ta 'bài nòi go ha'nhèq beq.
I nòi leq gè ma ùh khoi am dèh chac ca mangai 'noiq ùh?
Gè khoi ha'ngui gòm wì haq ti trong,
tìah ca mangai manhaq ta đùng braih càn,
gè khoi broq ca gùng loh ca amùa,
taiq bìac tango anang wa ngang dù da gè.
3 Taiq 'màng aih plình pi mè hòm,
taneh loh ca croh crenh,
mahaq gè xôq ùh 'nì camaih;
gè yi hnao ca mangai tango yŏc 'bac.
4 Ma ùh xài gè neo doi ca Au:
‘Baq ôi, Ìh bua au enh jò ŏi 'yoh.
5 Ìh hloi hloi nòih ca au 'mòh?
Ìh yôt yôt hacam ca au 'mòh?’
Gè capoch bàu rangot 'màng aih, mahaq gè hloi hloi broq rìm
bìac ngang dù tiaq dèh manoh cla enh!”
Is-ra-ên Ùh Wèq Dèh Manoh
6 'Nhòng da bùa Jôsia Chuaq doi ca au: “Ìh i hnoq bìac Is-ra-ên, aih jàn ma loq blàq manoh khoi broq ùh? Haq khoi trùh rìm nòi go ha'nhèq, rìm xèm long cràm hla đòiq tango ta 'bài nòi aih.
7 Au hèm jò haq broq hi dìq rìm bìac 'màng aih, haq wìh hlài ta Au. Mahaq haq ùh wìh hlài; oh cadrì haq Juđa, mangai ùh wèq dèh manoh hadai hnoq bìac aih.
8 'Nhac ca Au khoi cađac Is-ra-ên blàq blènh wa khoi am ca haq jàiq cađac, taiq haq tango, Au hadai hnoq oh cadrì 'mèq 'mac da haq, aih Juđa, ùh loq yùq crè; haq xôq lam chaq tango.
9 Taiq Is-ra-ên ùh ramòt ca bìac amùa da wì haq, èh khoi broq 'mèq ca taneh diac wì haq, wì tango ca hmu, ca long.
10 'Nhac ca 'màng aih Juđa oh cadrì haq hadai ùh dìq ca manoh hlài ta Au, mahaq xam manoh 'nùt toq patìah raq hêq.” Bàu Chuaq doi 'màng aih.
Chuaq Creo ca Wì Haq Cađac Dèh Manoh Broq Tôiq
11 Chuaq doi ca au: “Is-ra-ên blàq blènh mahaq tàng achùa ca Juđa, haq ŏi yi ta-atoq.
12 Ìh lam beq, lam pah 'ngeo ca mat mahì loh anoi hlài ca wì haq bìac cô, doi:
“Cô bàu Chuaq doi: ‘Ôi Is-ra-ên ma loq blàq blènh, hlài beq!
Au pi nòih ca pì hòm.
Ma jah 'màng aih Au i manoh xa-ŏch ca pì.
Au ùh hloi hloi nòih ca pì.’
13 Cô bàu Chuaq doi: ‘Waq toq ca gè nhàn dèh bìac ngan dù gè khoi broq;
khoi tajraq hlài ca Chuaq Boc Plình da gè.
khoi cùh waiq dua 'mù kiac ti yàp long cràm hla.
Gè khoi ùh loq dì Au.’ ”
14 Chuaq doi: “Ôi con ma loq blàq blènh, wìh hlài beq! Ma jah 'màng aih Au cô Chuaq ma wèq pì; Au jah 'ràng hlài pì, enh phôq cô, loq enh cadraq tau, enh nòi leq pì khoi 'bìq pac lac.
15 Èh Au jah am ca pì 'bài mangai wèq ban lem tiaq manoh Au. Wì haq jah ban manoh pì xam bìac loq 'nì, wa manoh loq tàng rìm bìac.”
16 Chuaq doi: “Jò pì hi xa-ông loh tam bàc ta gùng, jò aih pi i ca mangai leq hmàng ràu trùh Hom Wêh Jao da Chuaq, hadai ùh i mangai leq bahmàng hlài dua 'mù da hom wêh jao ta gàu ngoc, ùh i ca mangai leq hmàng trùh, ùh i mangai leq hèm 'ngwan, hadai ùh i mangai leq broq òn mòiq toq hom wêh jao ma neo.
17 Trùh jò aih wì doi phôq Jê-ru-sa-lem aih gèq bùa da Chuaq, èh rìm jàn jah hlài pajùm ta aih; wì haq pi hìaq rìh tiaq dèh manoh 'mèq wa cadoq cadang hòm.
18 Jò aih jàn Juđa lam pajùm ca jàn Is-ra-ên; wì haq jah pajùm ti dabau loh khoi enh gùng pah 'ngeo da mat mahì loh, hlài ta gùng Au khoi rùp bàu am ca boc yaq wì haq broq xôxech.
19 “Au hèm ta manoh doi:
“ ‘Au enh ngan gè tìah ca con calô Au!
Au enh am ca gè nòi taneh jìang
đòiq broq xôxech yi lem ca 'bài jàn ma 'noiq.’
Au hèm gè jah creo ca Au: ‘Baq au’
èh gè ùh jò leq am rù ca Au.
20 Mahaq joq 'nàng, Is-ra-ên mangai cadrì ùh dìq manoh dèh ca ŏng 'màng leq,
pì hadai ùh dìq manoh ca Au 'màng aih,” cô bàu Chuaq doi.
21 I bàu crò hmoi tŏc enh 'bài go ngùn,
aih bàu 'bài con jàn Is-ra-ên crò hmoi waiq dang,
ma jah 'màng aih wì haq khoi lam trong ùh troq,
khoi hèt Chuaq, Haq Boc Plình da wì haq.
22 “Ô 'bài mangai ùh wèq dèh manoh, hlài beq!
Au jah broq brêh manoh loq gô pla da pì.”
Pì tèo: “Cô nhèn lam trùh ta Ìh,
ma jah 'màng aih Ìh Boc Plình bèn.
23 Bìac cùh waiq ta 'bài nòi go ha'nhèq,
wa bàu ta-ùang ta wang rôm aih dìq amòng 'nùt.
Toq ta Chuaq Boc Plình da bèn,
men i bìac dèch claih ca jàn Is-ra-ên.
24 Enh jò bèn ŏi radam bìac ramòt khoi lŏn dŏng cùng hang da boc yaq bèn,
aih 'bài 'bo,
'bài trìu, xam con calô,
con cadrì da wì haq.
25 Bèn phai ca'nùng ta bìac camaih.
Ma jah 'màng aih dìq ca bèn wa boc yaq bèn khoi broq tôiq ca Chuaq,
Haq Boc Plình bèn.
Enh jò ŏi 'yoh trùh manàiq bèn ùh iu bàu Chuaq,
Boc Plình da bèn.”