42
Jê-rê-mi Pa'nhùq Jàn Paq Lam Ta Aicàp
1 Jò aih 'bài mangai broq gàu, Jô-ha-nan, con calô Ca-rê-at, Jê-xa-nia, con calô Hô-sa-ja, wa dìq dŏng ca mangai jàn, mangai 'yoh mangai càn,
2 lam trùh anoi ca Jê-rê-mi mangai capoch thai Boc Plình doi: “Xìn rùp bàu nhèn creo xìn, wa waiq khàn Chuaq Boc Plình ìh am ca nhèn, aih 'bài mangai ŏi xrong hlài. Pagah adroi nhèn bàc, hì cô manàiq ŏi i dìq jaq 'biaq, mat ìh hnoq.
3 Xìn Chuaq Boc Plình ìh, patô am ca nhèn trong ep tiaq wa ep broq!”
4 Jê-rê-mi mangai capoch thai Boc Plình tèo: “Au khoi tàng. Cô, au waiq khàn Chuaq Boc Plình am ca pì, tiaq troi bàu pì khoi xìn. Bìac leq Chuaq tèo, au jah am ca pì loq, ùh cadoc toq xìt leq.”
5 'Bài mangai aih anoi ca Jê-rê-mi, doi: “Tàng nhèn ùh broq tiaq rìm bàu Chuaq Boc Plình ìh thê ìh hnài nhèn, waiq Chuaq ngan hnoq ta'ne nhèn!
6 Ùh kè bìac lem bìac 'mèq, nhèn jah iu tiaq bàu Chuaq Boc Plình nhèn, Haq ma nhèn thê ìh waiq xìn; đòiq jò iu tiaq bàu Chuaq Boc Plình nhèn, èh nhèn jah xôq ramŏt.”
7 Mòiq jàt hì atìq, i bàu Chuaq anoi 'noh ca Jê-rê-mi.
8 Jê-rê-mi creo ca Jô-ha-nan, con calô Ca-rê-at, wa dìq dŏng ca 'bài mangai broq gàu lình xam mangai jàn, mangai 'yoh mangai càn lam trùh,
9 anoi ca wì haq doi: “Chuaq, Boc Plình da Is-ra-ên, Haq ma pì thê au trùh đòiq pa'noh bàu waiq xìn da pì jang ngìa Haq, anoi 'noh 'màng cô:
10 ‘Tàng pì ŏi ta taneh cô, èh Au payòng pì ùh raliang đac, pìt bùn ùh bùiq đac; taiq Au rachàuq dèh manoh ca bìac ranàc ma Au khoi broq loh ca pì.
11 Paq crè ca bùa Ba-bi-lôn, mangai pì ma 'nang crè; Chuaq anoi 'noh, paq crè ca bùa aih, taiq Au ŏi ti pì đòiq dèch wa dŏih pì claih khoi enh tì bùa aih.
12 Au jah xa-ŏch ca pì, waq ca bùa aih hadai xa-ŏch ca pì wa am ca pì hlài dèh ta gùng cla.’
13 “Mahaq tàng pì doi: ‘Nhèn ùh enh ŏi ta taneh cô.’ 'Màng aih pì ùh iu tiaq bàu Chuaq Boc Plình cla pì,
14 Doi: ‘Ùh, nhèn enh lam ta taneh Aicàp, aih nòi nhèn ùh hìaq hnoq tajêh poh, ùh hìaq tàng bàu ken, ta aih nhèn ùh thìuq ca 'benh caq; aih nòi nhèn jah trùh ŏi hloi;’
15 'Màng aih, ô pì jàn Juđa ma ŏi xrong hlài, tamàng bàu da Chuaq beq. Chuaq ma wèq dìq ca 'bình plình, Boc Plình da Is-ra-ên, anoi 'noh 'màng cô: ‘Tàng pì i manoh hèm 'nac mùt ta Aicàp đòiq ŏi ta aih,
16 èh pla chang gùm pì ma crè, jah hnan tem pì ta taneh Aicàp; bìac pangot hrah ma pì ramòt, hadai hnan tem pì ta Aicàp, pì jah cachìt ta aih.
17 'Màng aih, dìq ca mangai ma i manoh hèm 'nac mùt ta Aicàp đòiq ŏi ta aih, èh jah cachìt ca pla chang gùm, pangot hrah, wa jìq blôh. Ta wì haq, ùh i ca cabô jah rìh; ùh i ca cabô claih ca bìac ranàc au ca'nìh 'noh ta wì haq.’
18 Joq 'nàng 'màng aih, Chuaq ma wèq dìq ca 'bình plình, Boc Plình da Is-ra-ên, anoi 'noh 'màng cô: ‘Troi can nòih wa can xrông da Au khoi ùc 'noh ca mangai jàn ta Jê-ru-sa-lem 'màng leq, èh, jò pì mùt ta Aicàp, can nòih da Au hadai jah ùc 'noh ca pì 'màng aih; ŏi ta aih pì loh mangai đòiq wì hamàih, tagit, hanip, wa palèu camaih; pì pi jah hnoq nòi cô hòm.’
19 “Ô pì, jàn Juđa ŏi xrong hlài, Chuaq khoi anoi 'noh ca pì: ‘Paq lam ta Diac Aicàp;’ ep loq hì cô au khoi pa'yèp pì.
20 Taiq pì khoi broq bìac 'nùt ta'blêq hlài dèh ca mahua yiang; pì khoi thê au trùh ta Chuaq Boc Plình pì, pì doi ca au: ‘Xìn waiq khàn ca Chuaq Boc Plình am ca nhèn, wa am ca nhèn loq rìm bìac Chuaq Boc Plình nhèn jah anoi ca ìh; èh nhèn jah broq tiaq.’
21 Hì cô, au khoi anoi am ca pì; mahaq pì ùh iu tiaq bàu Chuaq Boc Plình pì, ùh broq tiaq trong Haq thê au anoi am ca pì.
22 Ma jah 'màng aih manàiq cô, loq ma ro beq pì jah cachìt ca pla chang gùm, pangot hrah, ùh hrŏc, ta nòi ma pì enh lam trùh ŏi aih.”