15
Bàu Alìah Con Trìu Lam Lac
(Mat 18:12–14)
1 Dìq ca wì mangai gop thèq wa mangai i tôiq trùh haten ca Chuaq Jêxu tamàng Haq hnài.
2 Wì mangai Pha-ri-si wa thài ranenh mamùc bàu 'yoh doi: “Mangai cô ŏi ti mangai i tôiq, caq pua ti wì!”
3 'Màng aih Haq doi ca wì bàu alìah cô:
4 “Ŏi ta pì, cabô mangai i 100 con trìu, tàng hnhung mòiq toq, haq ma ùh đòiq 99 toq ta đùng, đòiq lam chaq waq ca hnoq con trìu ma hnhung aih?
5 Jò chaq khoi hnoq, haq lem bùi dèch con trìu xùi aplêh,
6 khoi èh, hlài trùh hnem, creo dèh ca bua wa mangai haten, haq doi: ‘Lem bùi ti au beq, ma jah 'màng aih au khoi chaq hnoq dèh con trìu ma hnhung.’
7 Au doi ca pì: Ta Diac Plình hadai 'màng aih. Jah lem bùi jò mòiq ngai i tôiq loq cađac dèh manoh broq tôiq, yi hnao ca 99 ngai mangai ta-atoq, mahaq ùh nhet cađac dèh manoh broq tôiq.
Bàu Alìah Hnhung Mòiq Hliac 'Bac
8 “Loq, i mòiq ngai gu cadrì, i 10 hliac 'bac, hnhung mòiq hliac, haq ma ùh bùh đen, hwit hnem, chaq geo dìq jaq waq ca hnoq?
9 Jò chaq khoi hnoq, haq creo dèh ca bua wa mangai haten ca haq, haq doi: ‘Lem bùi pajùm ti au beq, ma jah 'màng aih au chaq khoi hnoq dèh hliac 'bac ma hnhung.’
10 Au doi ca pì, enh ngìa ca 'bình plình da Boc Plình hadai 'màng aih. Jah lem bùi am ca mòiq ngai, mangai i tôiq loq cađac dèh manoh broq tôiq.”
Bàu Alìah Con Calô Lam Lac
11 Haq doi: “I mòiq ngai tau haq i baiq ngai con calô.
12 Mangai ma oh doi dèh ca baq: ‘Baq ôi, xìn am da au phàn cùng hang ma jah au.’ Tajòi 'mòi mangai baq aih axong cùng hang haq, am dèh ca baiq ngai con.
13 “Atìq ca aih toq 'biaq hì, mangai ma oh gop dŏng dèh cùng hang cla. Haq lam Diac 'noiq. Ŏi ta aih, haq caq ôq pagôq racaih dìq ca cùng hang haq.
14 Jò haq racaih khoi dìq ca cùng hang, ta cròng aih loh ca pangot hrah càn; haq loh ca nan tùng.
15 Haq lam patìh caq cùng ca mòiq ngai, mangai ta Diac aih. Wì thê haq loh ta đùng ban chùa.
16 Haq pangot dìq jaq enh yŏc ca'nhah tòh ma đòiq chem chùa, mahaq ùh i cabô am.
17 “Bìac aih bahmàng haq, haq hèm: ‘Ta hnem baq au, bàc mangai broq caq cùng i pua caq panàc, mahaq au ep cachìt ca hrah ta Diac co!
18 Au yòng, hlài ta baq, doi: Baq ôi, au khoi broq tôiq ca plình wa broq tôiq ca baq;
19 Au pi đang ca broq con ìh hòm; xìn baq ngan au tìah ca mòiq ngai, mangai broq caq cùng da baq.’
20 Khoi èh haq yòng, hlài dèh ta baq.
“Jò haq ŏi raq hangai, baq haq khoi hnoq haq, dìq jaq xa-ŏch dèh ca haq, cadàu loh oc hìp haq.
21 “Mangai con doi: ‘Baq ôi, au khoi broq tôiq ca Plình wa ca baq. Au ùh đang ca broq con ìh hòm.’
22 “Mahaq mangai baq doi dèh hapŏng: ‘Yŏc eo ma dìq jaq lem pacaxùnh am ca haq beq; axràng ca haq canhàng beq; xrôp jai ca jènh haq.
23 Rùp 'bo hadròng ma bech, broq jam beq. Bèn phai lem bùi,
24 ma jah 'màng aih con au cô khoi cachìt; manàiq rìh hlài; khoi hnhung, mahaq manàiq khoi hnoq hlài.’ Khoi ca aih wì lem bùi.
25 “Mahaq, con ramua 'nang ŏi ta đùng. Jò haq hlài ten trùh hnem, tàng atêh broc bàu calêu,
26 'màng aih haq creo mòiq ngai hapŏng bòch hagleq.
27 Hapŏng aih tèo: ‘Oh ìh khoi hlài. Baq ìh khoi broq jam con 'bo bech, ma jah 'màng aih hnoq oh ìh hlài jah ŏi aiq.’
28 “Con ramua loh nòih, ùh enh mùt ta hnem. 'Màng aih baq haq loh adràc haq mùt.
29 Mahaq haq tèo dèh baq: ‘Ngan cô, au khoi broq bìac ca ìh bàc hanam, ùh lah pagôq, ùh lah ùh iu bàu, mahaq ìh 'nhòq lah am mòiq toq bubi 'yoh leq đòiq au caq lem bùi ti bua au.
30 Mahaq ngan tau con ìh. Haq khoi racaih dìq cùng hang ìh pajùm ti mangai cadrì 'mèq manoh, èh haq hlài. Taiq haq hlài, ìh khoi broq jam con 'bo bech am ca haq!’
31 “Baq haq doi: ‘Con ôi, con ŏi yôt ti baq. Dìq cùng hang da baq, aih cùng hang da con.
32 Mahaq khòh padon hiniang wa caq lem bùi, ma jah 'màng aih oh con cô khoi cachìt, mahaq rìh hlài; khoi hnhung, mahaq hnoq hlài.’ ”