21
Can Rìh Wa Caq Ŏi 'Màng Leq
1 Manoh da bùa tìah ca diac ŏi ta tì Chuaq;
Haq broq ca diac hìu pah leq tiaq manoh Haq enh.
2 'Bài trong da rìm ngai dìq troq tiaq dèh mat wì haq;
mahaq Chuaq ngan hnoq manoh.
3 Broq tiaq bìac ta-atoq wa bìac lem jang
jah lem manoh Chuaq yi hnao ca ngè tadreo.
4 Mat padèch dađeh, manoh loq catèh,
can 'ngah da mangai dù, aih dìq tôiq lôi.
5 Manoh tình da mangai panim 'ràng trùh bìac i lòiq;
mahaq rìm ngai dahôiq toq 'ràng trùh bìac thìuq.
6 Cùng hang chaq jah nhò rapet 'nùt,
'màng ca hòi diac hech đac da mangai chaq can cachìt.
7 Bìac hùng hang da mangai dù 'nong đac wì haq,
taiq wì haq ùh waq broq bìac lem jang.
8 Trong da mangai i tôiq, aih tagùt tagech;
mahaq bìac da mangai lem hreo aih tajang.
9 Tha ŏi ta mùm hnem,
yi hnao ca ŏi pajùm ti mòiq ngai gu cadrì loq rahen.
10 Manoh mangai dù toq ngèh enh broq bìac dù;
haq ùh xa-ŏch ca mangai ŏi haten ca haq.
11 Jò blai mangai loq jù lê, èh mangai blùng jah wìa mangai rabiaq,
mahaq jò mangai jah tàng bàu hnài pariaq, haq jah rabiaq loq tam.
12 Chuaq Ta-atoq ha'miang ngan geo mangai dù;
Haq ca'nhùt 'bài mangai dù mùt ta bìac ranàc.
13 Mangai leq bàng don ùh enh tamàng bàu creo da mangai pa,
mangai aih creo dang hadai ùh i cabô tèo hlài.
14 Tabàih am hlèp broq ngach ca can nòih,
wa ngè rŏt manoh tah ta achong, broq ngach can xrông.
15 Bìac broq lem jang, aih bìac lem bùi ca mangai ta-atoq,
mahaq wìa bìac crè ca mangai broq dù.
16 Mangai leq lam lac ca trong 'nì loq,
jah ŏi ti tagop mangai cachìt.
17 Cabô ham ca bìac pagôq ùh claih ca pa;
cabô loq enh ca alac wa dàu thùm ùh jah padrŏng can.
18 Mangai dù jah 'bìq baxa thai ca mangai ta-atoq,
wa mangai loq 'nùt thai hlài ca mangai lem jang.
19 Thai ŏi nòi wang wê,
yi hnao ca ŏi ti mòiq ngai gu cadrì loq rahen wa loq mamùc.
20 Ngè canaq 'bac wa dàu dìq ŏi ta hnem mangai khôn rabiaq,
mahaq da mangai blùng khoi lŏn dŏng.
21 Mangai leq hnan tiaq bìac ta-atoq wa wèq manoh broq troq yôt,
jah chaq hnoq can rìh, can ta-atoq, wa bìac loq iu.
22 Mangai khôn rabiaq trùh jêh phôq da mangai dêh padren,
hi pacro đac đôn wì haq ma canòm.
23 Cabô wèq dèh hacùng wa rapet,
aih wèq dèh mahua yiang claih ca ranàc.
24 Halê, aih hiniq da mangai catèh padèch dađeh;
haq broq trong rataoq tiaq manoh haq loq padèch dađeh.
25 Bìac ngèh enh da mangai aroh jêh cachìt cla haq;
taiq baiq toq tì haq ùh chìuq abroq.
26 Xèq ca hì haq toq ham toq enh;
mahaq mangai ta-atoq hnhu am rùng rai.
27 Ngè tadreo da mangai dù aih mòiq bìac dìq jaq ramòt;
ùh dùh dèh jò wì haq dèch am, mahaq i manoh enh dù.
28 Mangai anoi hlài ùh troq jah hù hnhung;
mahaq mangai loq tàng bàu joq 'nàng, èh jah capoch hloi hloi.
29 Mangai dù broq padèch dèh ca hadrò,
mahaq mangai lem jang broq hagao dèh ca trong.
30 Ùh i ca bìac khôn rabiaq leq, can loq 'nì leq,
loq trong tình leq, jah tajraq hlài ca Chuaq.
31 Padon đòiq axêh ca hì tajêh poh;
mahaq bìac jêh 'blêq ŏi pah Chuaq.