4
Khòh Xìn Yŏc Can Khôn Rabiaq
1 Ô 'bài con, tamàng bàu hnài da mangai baq oq,
khòh cachang tamàng, đòiq loq ca can loq 'nì.
2 Au am ca pì bàu hnài lem;
paq cađac bàu da au pariaq hnài.
3 Au cô con calô da baq au
wa con calô ma miq au dìq jaq loq waq.
4 Baq au hnài: “Manoh con khòh hmàng bàu au;
wèq bàu thê da au, èh con jah rìh.
5 Khòh yŏc can khôn rabiaq wa khòh xìn yŏc can loq 'nì beq;
paq hèt, paq am rù ca bàu da hacùng au;
6 Paq cađac can khôn rabiaq, haq jah wèq ban;
loq waq ca haq beq, èh haq jah wèq ban con.
7 Can khôn rabiaq aih bìac yi nhet dŏng; 'màng aih,
khòh yŏc can khôn rabiaq; hadai khòh yŏc bìac loq 'nì.
8 Padèch can khôn rabiaq beq, èh can khôn rabiaq dèch con tŏc;
haq jah loq iu con tàng con yŏc nhàn wa loq waq ca haq.
9 Can khôn rabiaq jah pacôi ta gàu con mòiq hadrang caxi riang lem,
wa am ca con mòiq toq cadoh 'ngah 'ngai.”
10 Ô con, tamàng wa nhàn yŏc bàu au beq;
èh 'bài khê hanam da 'nhòng rìh con jah bàc tam.
11 Au khoi hnài con trong khôn rabiaq,
'nong con lam ta 'bài trong lem jang.
12 Jò con lam, cadiang jènh con ùh hìaq 'bìq tàt khech,
wa jò con cadàu, con ùh hìaq catŏih tacro.
13 Cadop cajap trong hnài, paq ca'naih;
khòh wèq haq taiq aih can rìh da con.
14 Paq broq tìah mangai ngang dù,
wa paq lam ta trong da wì haq.
15 Wia ma khoi ca trong aih, paq lam pŏt cwa haq;
cađac haq beq wa lam trong ma jang beq.
16 Taiq tàng wì haq ùh broq bìac dù, èh wì haq cùi ùh hliac;
tàng 'nhòq broq ca mangai leq tacro, èh wì haq ùh jah cùi.
17 Taiq wì haq caq 'benh da bìac ngang dù,
ôq alac da bìac dù dang.
18 Mahaq trong da mangai ta-atoq tìah ca can 'ngah xreo,
kiang 'ngah tam trùh jò 'ne hì.
19 Phàn trong da mangai ngang dù xôq clam clôiq;
wì haq ùh 'nì taiq cleq broq ca dađeh tacro.
20 Ô con, cachang ca tamàng bàu au beq,
khòh tamàng 'bài bàu au hnài.
21 Paq đòiq bàu aih hangai ca mat con,
wèq ŏi ti manoh con beq.
22 Taiq bàu aih can rìh ca mangai leq chaq jah haq,
wa can tadêh dìq ca chac hamac wì haq.
23 Khòh rabiaq ca wèq manoh da con yi hnao dìq dŏng,
ma jah 'màng aih 'bài xèm da can rìh dìq loh enh nòi aih.
24 Don cađac bìac amòng da hacùng con beq,
wa wia hangai blìa hacùng loq 'nùt.
25 Mat con ngan jang ta ngìa beq,
wa canình mat con ngan jang ŏi jang ngìa con beq.
26 Broq tamang 'bài trong lam da jènh con,
wa broq cajap ca 'bài trong da con,
27 Paq wech pah 'ma loq pah 'ngeo;
dùi jènh con loh khoi enh bìac dù.