103
Đawit Achìh
1 Ôi mahua yiang au, dèch bàu manè pôi Chuaq beq!
Dìq ca manoh au phai calêu padèch hiniq Haq.
2 Ôi mahua yiang au, dèch bàu manè pôi Chuaq beq,
paq hèt ca rìm bìac Chuaq khoi am.
3 Chuaq khoi baxŏng dìq tôiq ca ìh,
wa khoi broq ìh jah claih enh dìq hinìq tôq.
4 Chuaq khoi rŏt hlài can rìh da ìh enh ralùng hanang,
yŏc can xa-ŏch xam manoh loq waq, pacôi ca ìh broq cadoh bùa.
5 Rìm hì ìh jah caq dahwèq caq jìang,
broq ca padren jò ŏi radam da ìh tìah ca chìm cliang càn.
6 Chuaq broq wa hadrah tiaq trong ta-atoq
ca dìq mangai 'bìq padit padiang.
7 Chuaq am Môise loq ca trong da Haq
wa am ca con jàn Haq loq ca cwìang itai Haq.
8 Chuaq i manoh loq waq wa loq xa-ŏch,
Haq ùh renh nòih wa patô can xa-ŏch xam manoh loq waq ca con mangai.
9 Chuaq ùh hloi hloi lech ca bèn,
hadai ùh hloi hloi nòih ca bèn.
10 Chuaq ùh hadrah bèn tìah ca tôiq lôi ma bèn khoi broq,
Chuaq ùh tabroq hlài ca bèn tiaq bìac ngang dù ma bèn khoi broq.
11 Ma jah 'màng aih plình yi ha'nhèq ca taneh dàng leq,
èh can xa-ŏch xam manoh loq waq da Chuaq hadai càn 'màng aih ca mangai leq loq yùq crè ca Haq.
12 Pah mat mahì loh hangai ca mat mahì mùt dàng leq,
èh Chuaq cađac tôiq lôi ma bèn khoi broq hadai hangai dàng aih.
13 Baq loq waq dèh ca con dàng leq,
Chuaq hadai loq waq ca mangai loq yùq crè ca Haq dàng aih.
14 Ma jah 'màng aih Chuaq loq con mangai jah broq loh 'màng leq,
Chuaq loq con mangai aih jah wìa enh blo taneh.
15 'Nhòng rìh da con mangai bu dàng nhat long,
bu dàng riang đah ta đùng taneh.
16 Jò i cayeo trùh, riang tau loh ca croh,
con mangai pi ngan hnoq haq hòm.
17 Mahaq can xa-ŏch xam manoh loq waq da Chuaq jah ŏi hloi hloi
ta mangai leq loq yùq crè ca Haq,
wa can ta-atoq da Chuaq jah am ca con xau haq.
18 Aih wì mangai loq wèq ranenh wa wêh jao da Haq,
wa hmàng broq tiaq rìm bàu thê rabiaq da Haq.
19 Chuaq dèch gèq bùa da Haq ta 'bài lòp Plình;
bìac wèq cwìang da Haq enh 'nhèq ca rìm bìac.
20 Ôi 'bài 'Bình plình da Chuaq, aih 'bài i cwìang itai wa can dêh đòiq broq tiaq trong da Chuaq,
wa broq tiaq bàu thê da Chuaq,
calêu padèch hiniq Chuaq beq.
21 Ôi 'bài 'bình plình da Haq aih 'bài hapŏng đòiq broq tiaq manoh enh da Haq,
calêu padèch hiniq Chuaq beq.
22 Ôi 'bài ngè bìac ma khoi jah broq loh ŏi rìm nòi da Haq wèq.
Calêu padèch hiniq Chuaq beq.
Ôi ma hua yiang au, dèch bàu manè pôi Chuaq beq.