139
Ùh i ca bìac cleq Boc Plình ùh loq, ùh i ca nòi leq ùh i ca Haq Thò Đawit broq. am ca thài nhŏc
Đawit Achìh
1 Ôi Chuaq, Ìh khoi ngan hlài au,
canao loq ca au.
2 Ìh loq ca jò au ha'ngui, jò au yòng;
enh hangai Ìh khoi loq ro ca manoh hèm au.
3 Ìh loq ro trong lam da au wa jò au ca'nùng cùi,
Ìh canao loq ro dìq ca bìac au broq.
4 Ma jah 'màng aih bàu 'nhòq ŏi ti rapet au, cô raq,
Ìh khoi canao loq dìq dŏng.
5 Ìh glom au enh ngìa
wa enh cloh đòiq tì Ìh ti au.
6 Bìac aih joq 'nàng halac ca au,
ha'nhèq hrìn, au bòt ùh trùh!
7 Au lam hangai ta leq claih ca Ìh?
Au mot ta leq hlèp ca Ìh?
8 Tàng au tŏc ta plình, Ìh ŏi ta aih;
tàng au loh ta ralùng hanang, Ìh hadai ŏi ta aih.
9 Tàng au pan lam pah mat mahì loh,
loq pan ŏi nòi pulùch da diac raxìq,
10 Ŏi ta aih tì Ìh hadai tìch au,
wa tì pah 'ma Ìh cadop yŏc au.
11 Tàng au doi: “Joq 'nàng clam clôiq jah glom au,
can 'ngah dudan ca au loh ca clam,”
12 mahaq cla can clam clôiq aih ùh jah cadoc cleq ca Ìh,
damang xreo 'ngah tìah ca dahì,
wa can clam clôiq hadai tìah ca 'ngah ŏi jang ngìa Ìh.
13 Ma jah 'màng aih Chuaq raq mŏt loh au,
broq loh au ta cliac miq au.
14 Au manè pôi Ìh, ma jah 'màng aih taiq au khoi jah broq loh tiaq trong dìq jaq halac joq đang ca yùq crè.
Bìac da Ìh joq 'nàng halac,
manoh au loq ro dìq jaq.
15 Jò broq loh au ti nòi hlèp,
Chuaq mŏt loh dìq jaq geo ta nòi ha'neq da taneh,
èh 'bài caxènh au ùh jah cadoc ca Ìh,
16 Mat Ìh khoi hnoq chac hamac au jò 'nhòq i ca au;
sôq hì pajaq ca au, khoi achìh 'mùt ta sô Ìh
adroi ca jò 'nhòq i mòiq hì leq ta 'bài hì aih.
17 Ôi Boc Plình, bìac manoh hèm da Ìh dìq jaq lem lình ca au!
Sôq manoh hèm aih joq 'nàng bàc dìq jaq!
18 Tàng au jah rèn bàu hèm aih, 'mat bàc yi hnao ca braih.
Jò au rìu, au xôq ŏi ti Ìh.
19 Ôi Boc Plình, ngèh enh Ìh èh jêh đac mangai dù!
Ôi mangai broq ta-ùc mahem, wia khoi ca au beq.
20 Wì haq to capoch bìac 'mèq tajraq hlài ca Ìh,
mangai tagit ca Ìh yŏc hiniq Ìh pagôq racaih.
21 Ôi Chuaq, au ùh git ca 'bài mangai ma git ca Ìh 'mòh?
Ùh ramòt ca 'bài mangai ma tajraq hlài ca Ìh 'mòh?
22 Au git ca wì haq, git joq 'nàng,
au ngan wì haq 'màng ca mangai ma tagit ca au.
23 Boc Plình ôi! Xìn ngan hlài au wa canao loq manoh au;
xìn thù au, wa canao loq manoh hèm au;
24 xìn ngan au i ca trong dù leq ùh?
Xìn 'nong au mùt ta trong can rìh hloi hloi.