56
Jò yùq crè, au ŏi canòm Boc Plình
Đawit Achìh
1 Boc Plình da au ôi! Xìn Ìh xa-ŏch ca au,
ma jah 'màng aih wì jôiq đac au,
wa padit padiang au xèq ca hì.
2 Xèq ca hì wì padit padiang au;
Chuaq ôi, wì ma padèch dađeh tajraq hlài ca au dìq jaq bàc.
3 Jò leq au yùq crè,
au joq 'nàng canòm nhò Ìh.
4 Au canòm ca Boc Plình wa calêu padèch bàu Ìh;
au ùh crè yùq,
ma jah 'màng aih mangai xam chac xech jah broq cleq ca au?
5 Xèq ca hì wì chaq trong goh wech trong bàu capoch au;
manoh hèm ngang dù da wì haq hloi hloi chaq trong tajraq hlài ca au.
6 Wì haq tagop dabau ti rinh ngan bìac broq da au,
taiq wì haq enh jêh đac can rìh da au.
7 Chuaq ôi! Xam can nòih waiq xìn Ìh hwenh đac
wì haq taiq bìac ngang dù da wì haq.
8 Ìh khoi rèn dìq rìm cadiang lam hlài da con;
Xìn Ìh đòiq diac mat au ta cabi da Ìh;
diac mat au ùh xài khoi achìh 'mùt sech da Ìh 'mòh?
9 Hì leq au dang xìn,
hì aih wì ma tagit ca au wia hangai ca au;
bìac cô au khoi loq, Boc Plình ŏi ti au.
10 Au canòm ca Boc Plình wa calêu padèch bàu Chuaq,
au jah calêu padèch bàu Chuaq.
11 Au jah canòm ca Boc Plình wa ùh loq yùq crè,
mangai xam chac xech jah broq cleq ca au?
12 Waiq Boc Plình da au, rìm bìac au ma pachac ca Ìh, au xôq ŏi wèq;
au jah dèch am ngè tadreo manè pôi ca Chuaq.
13 Ma jah 'màng aih Ìh khoi dèch mahua yiang au claih ca bìac cachìt,
Ìh wèq jènh au ùh tacro,
au jah cadiang lam ŏi enh ngìa ca Ìh
ta can 'ngah da can rìh.