11
Amfirow e titinge tikin
1 Titinge e ngo aregii, kaltu e sau parfat sekit ini sa i e nene-i, i mu kepe. I e tifik pari, sakle e parfat lo ini e tikin.
2 Tongge nangen ri mel lo matan titinge aregii, iya Deo ka foteng ri ini tongge kausi.
3 Tikin lo titinge, kiar ten ini Deo e lamlames makrau ine mara mok, ine sakle sunwar. Iya, sa kiar sau pari, e tibi fuut tinglo sa kiar fasi una pari.
4 Tikin lo titinge, Abel e tow e konona finafen tife Deo, e kausi iyat ine neng Kain e tow. Tikin lo titinge, Deo e fotngi e Abel ini kaltu riis, lo biing Deo e peteng ini fam finafen kia e kausi. E tikin, Abel e sau met, sakle i e gongon iwa sing kiar, tikin lo fafanas lo titinge kia.
5 Tikin lo titinge, Deo e kep kanek ine Enok kosnge nal gii ma i e tibi met. Tongge ri tibi fasi una pari, le Deo e sam kepe kala. Anwarow famu ma Deo ku mu kepe, i e fotngi ini kaltu e fakausi e bala e Deo.
6 Ma le ku tek titinge, kaltu e tibi fasi una fakausi e bala e Deo, anwarow se a ku la usi, i e samusu titinge tikin ini e mel e Deo ma ini Deo eu tow e fimfiil tifre tongge a ri ka sik tikin ini.
7 Tikin lo titinge, lo biing Deo e tow e war ate tife Noa use fan mok i e tifik pari, Noa, tura singmat na ninatke lo Deo, i e bilseni e neng e sip bakir una faliungeni e ke fumberat. Tikin lo titinge kia, i e fanangsi ini tongge tinglo nal, ri ta tongge na tumtubiil ma Deo ka fotngi ini kaltu riis.
8 Tikin lo titinge, Abra-am, biing Deo e tau ini una la wilo neng e male gii wimi kamu tow tifi are nal kia riis, i e a-uu ma ka la, sakle e tibi parfat ini i e lala wiya.
9 Tikin lo titinge, i e gow e male kia ulo nal Deo e sam warfot lo tifi. I e su melmel are ses ilo neng e kaontri ma e su melmel ulo bala fam felun sel, aregii Aisak ma Jekop ru ka gowgow ming ma Deo e tow e tikii warfot a ming tif ru.
10 Anwarow i e nene una pari e siti a warow ka ngongo bingne ma Deo tibom e ta kaltu e fagateni ma eu bilseni.
11 Abra-am e sam la waraner - Sera ming e sam la wok ma e pom, sakle tikin lo titinge, Deo e a-uu lo Abra-am una puek ku ta tamabo-i, anwarow i e titinge ini sa Deo e sam warfot lo, eu gow.
12 Iya, tinglo tikii kaltu gii, e tikin i e sam la waraner ma fow e sau met, sakle i e puek ka ta tamre berberat fuunfuun tikin, are fang keltot ailo batsok ma angkiin ailo betkiin. E tibi fasi ini tikas eu wes ri.
13 Tongge nano gii, ri met ulo bala titinge ma ri tibi kepe e fan mok Deo e warfot lo tifri, sakle ri su pari ma ri ka are ri ting tapak. Ma ri ka sesuupuek ini ri tibi ta tongge tuman ting wagii, ri ta fan ses ilo nal gii.
14 Tongge a ri ka warwar aiya, e fanangsi ini ri siksik ine ti male kiiskiis tikin keri.
15 Le ring gi sangsang bakir use kaontri lewa ri kabuk la kosngi, e fasi ini ring gi sam la mil wilo.
16 Safle e tam, ri su sangsang use ti male kausi - ti male are balambat. Iya Deo ka tibi maiyai ini riu fotngi ini Deo keri, anwarow i e sau fagatiufu e male kiiskiis keri.
17 Tikin lo titinge, Abra-am, lo biing Deo e tofo, i e fafen ine Aisak are finafen. Abra-am e ta kaltu lewa Deo ka tow e fan warfot tifi, sakle i e rong una fafen ini e su tikii sikow, Aisak.
18 E tikin Deo e sau peteng tife Abra-am aregii, “Fan tubtubungkak kiam riu puek, tikin tinglo Aisak.”
19 Abra-am e parfat ini Deo e fasi una famtet famila e fan minet, iya ka fasi ini kiar u war toftof lo aregii, biing Abra-am e kep famila e sikow, e ngo areini i e kep famila tinglo minet.
20 Tikin lo titinge, Aisak e warfakausi e Jekop ma Esau, ma ka peteng tifru ine fan mok eu fuut lo ru wimi.
21 Tikin lo titinge, Jekop, lo biing e rong una met, i e warfakausi e un sikow e Josef, ma i ka ngo fatke ulo ngusu e tungkan kia ma ka nining lo Deo.
22 Tikin lo titinge, Josef, biing e rong una met, i e peteng ini wimi, Deo e amu famu ire fan Israel ri ku suu tingna Ijip, ma sese mok riu gow lo tutuow.
23 Tikin lo titinge, lo biing Moses e fuut, tamow ma tinow ru finufu ka la muut lo e tuul e funiil, anwarow ru pari ini, i e ta bo-i piik ma ru tibi soke una kere e fafanau ke king.
24 Tikin lo titinge, biing Moses e sam la ta kaltu, i e am tibi bura ini ri amu peteng ini i e ta sikow e fefin ke king tingna Ijip.
25 I e fagati e sangsang kia ini eu kepe lala e mafet tura re tongge ke Deo. I e tibi bura ini eu usi e sinang e tubiil ini ku su fefeal lo borom pansumbiing.
26 Moses e pari ini kepe maiyai nafow e asow e Kristus, e kausi iyat ine konona fam finaswen ma fan mani kere fan Ijip, anwarow i e nene-i e konona fimfiil kia.
27 Tikin lo titinge, Moses e la kosnge male na Ijip. I e tibi soke ini King tingna Ijip eu balasak ini. I e su matet ka la, anwarow i e sau pari e Deo, se kiar tibi fasi una pari.
28 Tikin lo titinge, Moses e usi e ninis una gow e en na Kepsiliwi ma una seti e fam baspaket lo fan matangkon keri ine dadaku re fan sipsip, usi ini anggelo una pakpaketmet ire berberat fan tamat baba tikii, eu tibi pot lo re berberat fan tamat baba tikii tingna Israel.
29 Tikin lo titinge, fan Israel ri kaupakti e salat Ret Si areini ri fes ulo nal mas. Ma biing fan Ijip ri tofo una minami ri, ri maut ri ka famete tikii.
30 Tikin lo titinge, fam balo lo taon Jeriko e bereng fafalek, wimi ine fan Israel ri sau fes liflifti lo baba fis na biing.
31 Tikin lo titinge, fefin na gowgow e sinang na faet falek Ra-ap, e ules re ung kaltu na parpar borong, iya ri ka tibi paketmet ini tura re tongge ri fafasange singe Deo.
32 Ma sa ming yau seseng ini? E tek ti biing kiang una seseng ire tongge gii, Gidion, Barak, Samson, Jefta, Dewit, Samuel ma fam profet.
33 Tikin lo titinge, tongge gii ri kulef re fanenger fang kaontri, ri efe tura konona sinang ma ri ka kepe e fan mok Deo e sam warfot lo, ini i eu tow tifri, ri fakuta e ngusngusre fan laiyon,
34 ri pete met ine rawas tinglo fan iif lamlam ma ri ka ifit ine ngisow e fam bainat; e tek ti rawas keri, safle wimi ri am kepe e rawas. Ri puek ri ka la raw tikin lo sinang na fafapaket, iya ri ka kulkulef re fanenger fan ami.
35 Deo e famtet familre fa ri sau met, ma gelefin ri ka uun familre fa lo ri gii ri kabuk met. Fa, tongge na matamfais keri, ri bero iri, sakle ri guuluung una ta mi ri tife Deo, usi ini tongge na matamfais keri, ri ku falimuf ri, anwarow ri titinge ini biing riu matet mil, riu kepe e konona ninliu.
36 Fan tongge na matamfais ri tumar saksak ire fa ma ri ka wesbis ming lo ri. Fa, ri kawe ri ine fan sen ma ri ka tauf ri ulo rerek.
37 Ri rang ri ine fatfat, ri so pakpaket ri ine fan so ma ri ka tau metmet iri ine fam bainat. Ri su los lo fan pinpinun sipsip ma fan pinpinun me ma ri ka liflifit faliu. Ri sasngal tikin ma tongge na matamfais keri, ri bero iri ma ri ka gow e fan sinang e tibi kausi sekit lo ri.
38 Tongge tinglo nal gii, ri tibi fasi tura ri. Ri fes fafalek ulo bala fan male e tek ti kaltu ma fam pakpaklunmale, ma ri ka la keskeskum lala ulo bala fam fam ma ulo bala fam polo ilo bala nal.
39 Deo e foteng ri ini tongge kausi, anwarow lo titinge keri, sakle e tek tikas sekit lo ri, ek sam kepe e sa Deo e sam warfot lo tifri.
40 Deo e sau fagatiufu e konona mok usi kiar geinggii, e kausi iyat ine mok lewa i kabuk fagatiufu famu, usi ini ri tiim tura kiar, Deo e amu fariis kiar nano.