13
Warwar muut
1 Gam samusu tafu e sinang na fabur falifu i gam are fatfatualik ku lala.
2 Gam u tibi sangintafngi una are re fan ses wilo bala fam fel kemi, anwarow fa ri sam gorot aiya, ri kabuk are re fan anggelo ma ri ka tibi parfat.
3 Kep gam areini gam ta ilo rerek ming tura re tongge ilo rerek ma fa a ri ka bero iri, ini e ta gam lea, gam kepe e mafet a ri ka gow lo ri.
4 Tongge nano ri samusu natkeni e antinaule. Kaltu eu su bulsi e ke wok tam ke matuk riis, i eu tibi fabulis falek, anwarow Deo eu iksere tongge na gowgow e ansinang na fabulis falek ma mara sinang na faet falek.
5 Gau mele tafu e fabur use mani ku bakir tikin ilo fan ninliu kemi ma boron sa gam sau mel lo, gam u su pari ini e sau fasi, anwarow Deo e sam war:
“E tibi fasi sekit ini yau la kosing o
ma yau tibi sangintafin o sekit.”
6 Iya kiar ka fasi una peteng ten aregii,
“Taufi e ta kaltu na ulules yau.
Yau tibi soke.
E tibi fasi sekit ming ini tikas eu gow e ti mok lo yau.”
7 Kep sangsang usi re tongge na famu kemi, seri, ri sesesngeni e sunwar ke Deo tif gam. Ma gam ku sang use konona amfirow e matan ninliu ri melmel ini, ma gam ku sese-i e titinge a ri ka mel lo.
8 Yesus Kristus e tibi ikikis. Sinang kia e su ngongo aiya, ting nabiing, geinggii ma bingne.
9 Gam u tibi toufu e ti fam fabenge kuriik ku famu i gam, gam ku fes saef. E kausi ini kiar u tafu e fatengis ke Deo ku farawasngeni e busbusarer, anwarow fan sinang una usi e fam fafanau una eni e fan matmatan tuan, e tibi fasi una farawasngeni e busbusarer.
10 E mel e altar kiar, iya fam pris a ri ka faim ilo bala felun nining ri gow lo sel, ka tibi riis lo ri una en tinglo.
11 Paklure fam pris kere fan Juda e kepkep kaulek ine daku re fan talaman wilo bala Rum Tarawen Tikin are finafen una kepufu e fan tubiil, sakle pinumfow e fan talaman a, ri taiif lo ina male ine pakanmale.
12 Iya, Yesus ming ka kepe e ongker una male ine siti usi ini fatarawennge re tongge, tikin lo andaku tibom.
13 Ilea, kerer ming, kerer u la usi ina male ine pakanmale, kiar ku la kepe e an maiyai lewa i ka kepe.
14 Anwarow e tek ti siti kiar gii lo nal eu ngongo bingne, sakle kiar parpar ine neng e siti a kamu puek.
15 Ilea, anwarow lo Yesus, kiar u tibi manau una fafen ine finafen na katfariis tife Deo - finafen e ta amfirow e ngusngusrer una sesuupuek ine e asow.
16 Safle kiar u tibi sangintafngi una gow e konona sinang lo re fa ma una faseni e fan mok tura ri, le matam finafen aiya, e fakausi e bala e Deo.
17 Ongne singre tongge na famu kemi ma gam ku fapor gam ilo pikliu e efefe keri. Ri efefe kale kemi le wimi ri mu la sesngeni e faim ri sam gow tifi e Deo. Ongne singri, usi ini riu fefeal una faim, ma ri ku tibi ongni ini e mafet sing ri. Anwarow, fan sinang e tibi riis gam gow, iya ka tow e mafet tifri, eu tibi tow e ti kausi tif gam.
18 Kemem ten ini fan sinang kemem gowgow e riis ususi e fabur ke Deo ma kemeu bura ini fan ninliu kemem eu su riis riis nano lo an mara biing, safle gam samusu nining una ules kemem.
19 Ya gatom rawas i gam ini gam u nining, usi ini yau fasi una mil saupe usi gam.
20 Ya nining ini Deo na balamas, se e sau famtet famila e Taufi kiar Yesus Kristus, kaltu bakir na efefe lo fan sipsip, kosnge minet, tikin lo andadak lo war a-uu gii ka ngongo bingne,
21 ini eu fen gam ine konona fan mok una gow e fabur kia, ma ini eu faimngeni e sa i e bura ini i eu faimngeni ilo balbalrer, tikin lo Yesus Kristus, se kiar u nawen singi bingne, bingne. E tikin.
22 Tanga tuaklik, ya bura ini gam samusu ta gam tikin, una ongne use sunwar kiang una farawasnge gam, gii ya kabuk seti, anwarow e su pospos.
23 Ya bura ini gam u parfat ini tualikrer, Timoti, e sam suu tinglo rerek. Ma le ku sa la saupe usi yau, yau onu kama ku la par gam.
24 Tow e are kemem tifre ge lamlam kemi tiim tura re tongge nano na titinge. Fa gii tingna Itali ming, ri tow e are keri tif gam.
25 Ya nining ini fatengis ke Deo, eu ta tura gam nano.