3
Yesus e bakir iyat ine Moses
1 Ilea tanga tuaklik, gam ta ke Deo, gam samusu sang bakir use Yesus anwarow, Deo iyat ilo balambat e sam tau i gau ming. I e ta amfinaun ke Deo ma e ta paklure fam pris, iya kiar ka titinge lo ma kiar ka sesuupuek ini.
2 I e usi fakausi e fabur ke Deo, se e sam siikii, are lewa Moses kabuk usi fakausi e fabur ke Deo, lo biing i e efe lo re tongge ke Deo.
3 Fel, ninatke ri tow tife kaltu a ka gow, e bakir iyat ine fel a i ka gow. E su ngo ming aiya use Yesus ma Moses. Yesus, ninatke ri tow tifi e bakir iyat ine ninatke ri tow tife Moses.
4 Anwarow fan mara fel e su ta ini kaltu e gow, safle Deo, i e gow e fan mara mok.
5 Moses e ta kaltu na mus ilo fel ke Deo ma i e usi fakausi e fabur ke Deo ma i e sam sesuupuek ine fan sa Deo e amu sesngeni wimi.
6 Safle Kristus e usi fakausi e fabur ke Deo are sikow una efe lo fel ke Deo. Ma kiar ta fel ke Deo, le kiar ku tibi soke ma kiar ku ti rawas lo fanene gii kiar kamu gasgas lo wimi.
War ate use sinang na tibi titinge
7 Ilea, gam samusu melmel aregii Tangwa Riis ka peteng,
“Geinggii, le gam ku ongni e angkiimkiim aiya,
8 gam u tibi fakuta e balbalmi
are tumtumlami nangen.
Ri fakuta e balbalri ma ri ka ta mi ri tif yau,
lo biing ri tof yau ulo bala male e tek ti kaltu.
9 Uwa, ri sau pari e fan mok ya gow lo bala e fet e sangful na matamfaim,
safle uwa ri tof yau ma ri fatof sing yau.
10 Ilea e anwarow gii ya ka balasak ine inlen a
ma ya ka war aregii, ‘Balbalri e sagisu fes saef
ma ri ka tibi ususi e fan sal ya bura ini riu usi.’
11 Iya, ya ka balasak, ya ka limlim aregii,
‘Riu tibi fasi sekit una kaulek ilo bala male na manmanau kiang.’ ”
12 Ilea tanga tuaklik, gam samusu atate ini e tek tikas lo gam eu mel e ti sangsang saksak ilo bala ma ka tibi titinge ma i ku ta mi tife Deo, se e mel e ninliu bingne.
13 Safle gam samusu farawasngeni e tikii neng, tikii neng lo gam ilo bala tikii neng, tikii neng e biing, ma ka ta “Geinggii” iwa, usi ini eu tek ti sangsang saksak eu soromufu e tikas lo gam una fakuta e bala.
14 Kiar u fatfenngo tura Kristus le kiar ku ti rawas ku la muut lo biing na minet, aregii kiar kabuk titinge rawas tinglo tofnge.
15 Igii e sa sunwar ilo bala buk ke Deo e peteng ini,
“Geinggii, le gam ku ongni e angkiimkiim aiya,
gam u tibi fakuta e balbalmi
are tumtumlami nangen.
Ri fakuta e balbalri ma ri ka ta mi ri tif yau.”
16 Se ri lea ri ongni e angkiimkiim a Deo ma ri ka fakuta e balbalri ma ri ka ta mi ri tifi? Tongge a, iri lewa Moses ka uun suu iri tingna Ijip.
17 Ma seri lea Deo ka balasak iri lo e fet e sangful na matamfaim? Tongge a, iri mung lewa ri ka gow e fan tubiil ma ri ka famete ulo bala male e tek ti kaltu.
18 Ma seri a Deo ka gow e limlim kia lo ri ini ri tibi fasi sekit una kaulek ilo bala male na manau kia? I e gow e limlim kia use seri mung a ri ka fasange singi.
19 Iya kiar ka pari ini ri tibi fasi una kaulek ilo bala male na manau kia, anwarow ri tibi titinge.