8
Yesus e ta paklure fam pris ilo war a-uu fuu
1 Sangsang bakir ilo bala sinseng lewa, e ngo aregii: Kiar sau mel e matam paklure fam pris aiya, se e kiis ilo galu miil lo sia king ke Deo ilo Balambat,
2 ma i e gow e faim pris ilo bala Felun Nining Bakir ke Deo ilo balambat. Fel a e ta felun nining tikin ke Deo, ma e tibi ta ini tongge ri feti, Deo tibom e feti.
3 Fan mara paklure fam pris ri sam siik ri una fafen ine fam finafen ma fafen na ongker. Iya ka riis sekit ini neng gii eu mel ming lo ti ton mok una fafen.
4 Le i enggi ta wagii lo nal, i enggi tibi ta pris, anwarow e sau mel e tongge gii wa, seri, ri fafafen ine fam finafen aregii fafanau kabuk peteng.
5 Ri musngeni e faim pris ilo bala Felun Nining Bakir gii ka su ta telsenge ma tangow e Felun Nining tikin ilo balambat. Ilea e anwarow gii, Deo ka tow e war ate tife Moses, lo biing Moses e rong una feti e Felun Nining, lo sel. Deo e war aregii, “Biing ou feti e Felun Nining, lo sel, o samusu usi riis e fafanas lo, lewa ya kabuk fanangsi o ini ulo paklunmale.”
6 Safle gii Yesus e sam kepe e faim pris e kulfi tikin e faim kere fanenger fam pris. Anwarow i e ta kaltu falifu i kiar tura Deo, una farawasngeni e war a-uu fuu gii. Ma war a-uu gii, e kulfi e neng ting nangen. Ma fan mok war a-uu fuu gii e warfot lo una tow tif kiar, ri kulfi tikin e fan mok war a-uu ting nangen e warfot lo una tow.
7 Anwarow, le enggi tek ti tubiil ulo war a-uu baba tikii, Deo enggi am tibi fasi una gow e ti war a-uu fuu.
8 Sakle Deo e pari ini tongge ri gowgow uwa e fan tubiil, iya ka war aregii,
“Yau Taufi, ya war aregii: E mu mel e neng e biing eu puek,
ma ya ku gow e war a-uu fuu
tura re tongge tingna Israel
ma tongge tingna Juda.
9 War a-uu gii eu tibi ngo are neng lewa ya gow,
tura tuptup ri
lo biing ya puse lo limlim ri
ya ka uun suu iri tingna Ijip,
anwarow ri tibi usi e war a-uu baba tikii kiang,
iya, yau Taufi, ya ka ta ming tifri.
10 Yau Taufi, ya war aregii: Igii e war a-uu fuu ya mu gow tura fan Israel wimi:
Yau tafu e fam fafanau kiang ilo sinsinanguri
ma ya ku seti ilo balbalri.
Yau ta Deo keri,
ma ri ku ta tongge kiang.
11 Ma lo sumbiing a, neng e kaltu eu tibi fabenge singe taltalu ma neng e kaltu eu tibi fabenge singe neng e tualik aregii,
‘O samusu parfat lo Taufi,’
anwarow, lo sumbiing a, tongge nano ri sau parfat lo yau.
Eu ta kaltu e tek ti asow, tam kaltu e mel e asow, i e sau parfat lo yau.
12 Anwarow yau sangintafngi e fan tubiil keri
ma ya mu tibi sangfi mil.”
13 Lo biing Deo e fotngi e war a-uu gii ini “war a-uu fuu,” i e gow e war a-uu baba tikii kabuk la ta ting nangen, ma mok e sam ta ting nangen ma bengu e sam rong una rop, eu su ngo balik ma ku tam ini.