19
Yesus e war lo sinang na kere antinaule
1 Biing Yesus e gongon tikii lo fan mok gii, i ka la tingna Galili ka la una Juda ulo galu lo dan Jodan.
2 Ma galung kaltu fuunfuun sak ri ka mi nami, ma i ka la faliungeri uwa.
3 Fam Farasi ri ka fespuek use Yesus una sa tofo. Ma ri ka sa gatmo aregii, “Fafanau kiar e a-uu lo kaltu e fasi una kalafeni e wok kia, lo fabur kia tibom?”
4 Ma Yesus ka koso aregii, “Gam tifik wese? Ini le tinglo tofnge Deo ‘e bilseni e tamat ma fefin,’
5 ma ka war aregii, ‘tamat eu la kosngi e tamow ma tinow ma ku la tiim tura ke wok, ru ku fespuek ru ku ta tikii foru.’
6 Ru am tibi melmel are e u e kaltu, e tam, ru fespuek are tikii kaltu. Sese mok Deo e sam tauftiim ini, kaltu e tibi fasi una sefapot ini.”
7 Ma fam Farasi ri ka peteng tifi aregii, “Areini gii Moses ka tow e fafanau tif kiar ma ka peteng ini, kaltu e fasi una seti e pampel na kere antinaule ma fefin ku la?”
8 Ma Yesus ka war singri aregii, “Gam na tongge balbalmi e kut, i ya Moses ka a-uu lo gam una fesel re fan wok kemi. Safle e tibi ngo aiya tinglo tofnge.
9 Ya peteng aregii tif gam, le wok ke kaltu ka tibi gow e ansinang na faet falek ma ke matuk ka fesi, ma ka tinaule fuu, kaltu a e gow e ansinang na faet falek.”
10 Fan disaipel kia ri ka ongni e sunwar a ma ri ka war singe Yesus aregii, “Le kaltu ku usi e ninis gii, e kausi ini eu tibi su tinaule sekit.”
11 Ma Yesus ka war singri aregii, “E tibi ta ini tongge nano ri fasi una kepe e sunwar gii, e tam. Deo e su tow e rawas tifre fa tibom una kepe.
12 Ong, e mel e matan tongge gii wa ri tibi fasi una tinaule. Fa fofori e sak biing tintinri ri fasus iri; fa ri pu ri, ri ka tibi fasi una fafuutnge re berberat; ma fa ri faim usi kepmale tinglo balambat, ri ka warkale ri tibom una tibi tinaule. Sakle se a ka fasi una a-uu lo sunwar gii, i e samusu usi.”
Berberat liklik ma Yesus
13 Kala antamat ma gelefin ri uun puek ire berberat use Yesus. Ri bura ini eu tow e limow ilo ri ma ku nining lo ri. Sakle fan disaipel kia ri porau re tongge a.
14 Ma Yesus ka peteng tifre fan disaipel a aregii, “Gam taufre berberat a ri ku sa la usi yau ma gam ku mele kale ri. Anwarow kepmale tinglo balambat e ta kere tongge a ri ka ngo are berberat gii.”
15 Ma ka tow e limow ulo ri, ma wimi kala kosnge male a.
Kaltu fuu e mel e tuba
16 Ma neng e kaltu ka sa la use Yesus ma ka sa gatmo, “Titsa, yau gow e sese konona mok usi yau kepe ninliu bingne?”
17 Ma Yesus ka war singi aregii, “Anwarow lo sa gii o ka gatom use konona mok? Deo, e su tikiini tibom e kausi. Sakle le o ku bura e ninliu bingne, ou usi e fam fafanau ke Deo.”
18 Ma kaltu a ka gatmo e Yesus aregii, “O war lo sese fam fafanau?”
Ma Yesus ka war, “Fam fafanau a ri war aregii. Gam u tibi paketmet ire fa. Gam u tibi gow e ansinang na faet falek. Ma gam u tibi kinau, ma gam u tibi fapin ilo anganggon.
19 Gam samusu natkeni e tamtaumi ma tintinmi. Ma o samusu bura e neng aregii o ka buro tibom.”
20 Ma guam a ka war singe Yesus aregii, “Ya sam usi e mara fafanau nano a, safle ya pospos iwa lo sese mok?”
21 Ma Yesus ka war singi aregii, “Le o ka bur puek riis sekit, arik la umat ine fan mara mok nano kiam. Ma sese mani a o ka kepe lo, o tow kere fan sasngal. Ou gorot aiya usi ou kepe e konona fan mok ilo balambat. Ma o kamu kasa o ku mi nami yau.”
22 Ma kaltu a ka ongni e fan warwar a ma bala ka la mafet gii ka la kosngi Yesus, anwarow e mel e fan mok fuunfuun kia.
23 Ma Yesus ka war singe fan disaipel kia aregii, “Ya peteng tikin tif gam, tongge tuba ri e mel eu tuntun sak singri una kau ilo kepmale tinglo balambat.
24 Ya peteng ming tif gam, e tibi paumiil singe kamel una los ilo amfur lo nil na somsomap, sakle e tuntun tikin iyat singe kaltu tuba mel una kaulek ilo bala kepmale ke Deo.”
25 Fan disaipel kia ri ongni e war aiya ma ri ka la kuufsak tikin, ma ri ka war, “Le ku ta aiya, se gii ku fasi una kepe e ninliu bingne?”
26 Ma Yesus ka par usi ri ma ka war, “Tongge ri tibi fasi, sakle Deo tibom e fasi una gow e mara mok.”
27 Biing e war aiya, Pita ka koso aregii, “Par, kemem la kosngi e mara mok, kemem ka usi o. Kemem u kepe e sese mok?”
28 Ma Yesus ka peteng tifri aregii, “Ya peteng tikin tif gam, lo biing fan mara mok riu puek fuu ma Sikow e Kaltu ku kiis ilo sia king na finaswen kia, lo biing a, gam na tongge a gam ka usi yau, gau ming gam u kiis ilo tikii sangful ma u na konona sia, ma gam ku efe lo tikii sangful ma e u na matambia tingna Israel.
29 Ma tongge nano a ri ka la kosngi e fam fel, tam fan tualik ri, tam fam fefnelik ri, tam tamtamri, tam tintinri, tam siksikwari, tam fam palang keri anwarow lo yau, riu kepe atis ming ilo poktow e sa a ri kabuk mel lo. Ma ri ku kepe e ninliu bingne.
30 Sakle tongge fuunfuun a ri ka puek baba tikii, riu la mi sekit. Ma fa fuunfuun a ri ka mi sekit, riu puek baba tikii.”