11
Deo e tengsi e puis Israel
1 Iya, ya ka gatom aregii, Deo e guuluung ire tongge kia? E tam sekit. Yau tibom, e ta ya na Israel. Ma ya ta tubungkak ke Abra-am, tinglo funmat a Benjamin.
2 Deo e tibi guuluung ire tongge kia seri gii i ka wel ri famu. Gam tibi sangfi e sunwar pepe e war lo Elaija, i e balasak ire fan Israel, iya, i ka nining singe Deo aregii,
3 “Taufi, ri sau fismet ire fam profet kiam ma ri ka bero ine fan altar kiam. E su tikiin yau tibom gii wa, ma ri ka tofo una fismet i yau ming.”
4 Ma Deo ka koso singi, “E mel e baba fis na mar na kaltu kiang aiwa. Ri tifik pukungkek lo deo gurgurum Bal.”
5 E su ngo ming aregii. Deo e buk su wele borom puis lo re fan Israel, anwarow lo fatengis kia.
6 Le fawel kia ka ta ilo finafen fofoes kia, e tibi ta ini lo fam faim ri gow. Le enggi ta ini lo fam faim ri gow, finafen fofoes a e tibi tikin.
7 Are kiar ku war lo fan mok gii? Mok fan Israel ri siksik ini, ri tibi kepe. Safle seri a Deo ka tau iri, ri kepe. Fa fuunfuun lo ri balbalri e sam kut,
8 are ri sam situfu ilo sunwar pepe aregii,
“Deo e gau ri, ri ka tibi fasi una sang kausi,
matmatri ka tibi fasi una par,
balbaluri ka tibi fasi una ong,
ma Deo ka gau ri, ri ka su melmel aiya ting lewa ka la muut gii.”
9 Ma Dewit e sau peteng aregii,
“Tafu e teibel keri
ku ngo are ano una liil singri,
ma are fat riu saske lo ri ku luut are fimfiil lo fan sinang saksak ri sam gow.
10 Pete bau ine matmatri usi riu tibi fasi una par,
ma pokpokta ri ku la pung sok.”
Fan Jentael ri titinge ri ngo are au olif rokai
11 Ya gatom ming aregii: Biing tongge tingna Israel ri sam luut, ri amu tibi matet mil? E tam. Ri amu matet mil. Safle anwarow lo fan sinang saksak ri sam gow, faliunge keri e sam la subung tifre fan Jentael usi ini riu pari, ma ri ku mer.
12 Safle le fan sinang saksak kere fan Israel kabuk ules bakir ine nal, ma luut lo ri kabuk ules bakir ire fan Jentael, are gam sang? Ya peteng tikin tif gam, le ku ti lo biing fan Israel riu mil use Deo, singmat na warfakausi eu ta ilo nal kiruur!
13 Gii ya warwar sekit sing gam na fan Jentael. Anwarow Deo e sam siik yau ka ta ya na apostel usi re fan Jentael, ya resresngeni tikin e faim gii.
14 Ya bura tikin ini yau sikseni e ti sal una famtet re fan Israel una mer use konona fan sinang Deo e sam gow lo gam, usi ini yau faliungeni e ti tom fa lo ri lo sunwar ya sesngeni.
15 Biing Deo e guuluung ine fan Israel, i e kepfamilre fa fuunfuun lo re tongge tinglo nal kiruur una ta tanga fenfenngow. Ma biing i eu are familri, sa gii ku fuut? I eu tow e ninliu tifre fan minet.
16 Le o ku fafen ine su lo beret o gow lo fan wit o gorot baba tikii ini, beret kiruur kiam eu tarawen. Ma le awawiu e kalut ka tarawen, teltelow ming eu tarawen.
17 Fan Israel ri ngo are au olif, ma gam na fan Jentael gam ngo are au olif rokai. Deo e sau fanaufufu e teltelen olif miil ma ka kepe teltelen olif rokai ka fasok famti talo olif miil. Ma gii, gam are teltelen olif rokai, gam tura teltelen olif miil a, gam tiin kepe rawas tinglo awawiu.
18 Ma le ka ngo aiya, gam u tibi parpu ine teltelen olif a Deo ka fanaufu. Le gam ku gorot aiya, gam u sangsangfi, anwarow awawiu e au olif a e tow e rawas tif gam, e tibi ta ini gam, gam tow e rawas tifi.
19 Antalu le tikas ku war aregii, “Deo e fanaufu e teltelen olif a, usi ini eu fasok yau talo kalut a.”
20 E tikin. Safle gam u sangsangfi, Deo e fanaufri anwarow ri tibi titinge, ma gam, gam sok ilo anwarow lo titinge. Ilea, gam samusu soke. Gam u tibi kep bakir i gam.
21 Anwarow, le Deo kabuk tibi a-uu lo teltelen au olif tikin a, una sok ilo, i eu tibi a-uu lo gau ming una sok ilo au a.
22 Ilea, gam u sangsangfi anwarow Deo e fafatengis ma e balbalasak. I e fanfanangsi e balasak kia tifre tongge a ri ka fafasange, safle i eu fanfanangsi e fatengis kia tif gam, le gam ku melmel ilo bala fatengis kia. Ma le ku tam, i eu fanauf gau ming.
23 Le fan Israel ri ku sangikis ma ri ku titinge, Deo eu fasok ri mil ilo au olif, anwarow i e fasi una fasok familri.
24 Le Deo ka bung kep gam tinglo olif rokai ma kabuk fasok gam talo olif miil, e tikin, e paumiil tibom singi una fasok famila e fan teltelow tikin e au olif a.
Deo eu faliungere fan Israel nano
25 Tanga tuaklik ilo Kristus, ya bura ini gam u parfat lo pindik gii, famu e fifinuf, safle gii, Deo e sau pete malal ini, usi ini gam u tibi kep bakir i gam. Pindik a e ngo aregii: Deo e sau fakuta e balbalre fa lo re fan Israel. Ma ri sau melmel aiya ku muut lo biing wewes lo re fan Jentael nano a una titinge ri sam titinge ma ri kabuk sa la use Deo.
26 Ilea, Deo eu faliungere fan Israel nano ine sangsang a, aregii sunwar pepe kabuk peteng:
“Anwaramfaliunge eu puek tingna Saiyon;
ma i eu ikis familre fan Israel kosnge sinang na fafasange singe Deo.”
27 “Ma igii e war a-uu kiang tura ri:
Lo biing a, yau tii ine fan tubiil keri.”
28 Fan Israel ri puek are tongge na matamfais ke konona sunwar usi ini fan Jentael riu kepe kausi. Safle Deo e bur ri iwa, anwarow, i e sam wele tumtumlari, Abra-am, Aisak ma Jekop.
29 Anwarow, finafen ma fawel Deo e sam gow e tibi fasi una kepfamila.
30 Famu gam fasange singe Deo, safle gii fan Israel ri ka su buk fasange singe Deo, ma lo sal a gam kepe fatengis kia.
31 Iya, gii fan Israel ri fasange singe Deo usi ini riu kepe e fatengis kia, anwarow, fatengis ke Deo e ta usi gam na fan Jentael.
32 Deo e tafu e sinang na fasange ka rekfamti re tongge nano usi ini i eu fanangsi e fatengis kia tifre tongge nano.
Katfariis tife Deo
33 Uui! Parfat ke Deo e bakir tikin. Ma atausimale kia e kausi tikin! E tek ti kaltu e fasi una parfat ten lo sinangu. Ma fan sal kia kiar tibi fasi una sikseni.
34 Se sau parfat lo sinangu e Taufi?
Ma se e fasi una fabenge singi?
35 Se e sam tow e ti mok tife Deo
usi ini Deo eu kos famila singi? E tam sekit.
36 Anwarow Deo tibom e lamlames makrau ine mara mok, ma i e ta anwarow e fan mara mok, ma fan mara mok e ta kia tibom.
Kiar u akteni e asow bingne bingne. E tikin.