14
Sikuan Sipsip ma 144,000
1 Ma ming ya par ma wa, famu i yau, Sikuan Sipsip e titi ulo paklunmale ri fotngi ini paklunmale Saiyon. Ma tura tikii atis ma e fet e sangful ma e fet na mar na kaltu seri mel e asow ma asow e Tamow ri seti ulo matmatri.
2 Ma ya ongni ming e tengteng tinglo balambat, e ngo are dungow e dan e suu ma ming e ngo are dungow e ampararak, e pararak bakir tikin. Dungow e sa, ya ongni e ngo are dungow e gita gii, kaltu e gargarsi.
3 Ma ri seke seksek fuu famu ini e sia king ke Deo ma famu ini e fet e man e liuliu ma fang kaltu bakir. E tek tikas ek fasi una parfat lo seksek a, sakle tikii atis ma e fet e sangful ma e fet na mar na kaltu, se Deo e sam kep familri tinglo nal.
4 I gii, e fa seri, ri tifik ngo tura gelefin, iya ri tibom ri sau bom su kalkaliis. Ri usi e Sikuan Sipsip, e fes ulo sese sal, ri ming ri usi. Deo e sau fiil ri tinglo falifu lo re tongge ma fafen iri are fingfingwan au baba tikii tife Deo ma Sikuan Sipsip.
5 E tek ti ansorom ek suu tinglo ngusngusri, ma tongge ri tibi fasi una pari e ti tubiil ilo ri.
E tuul e anggelo
6 Ma ming ya pari e neng e anggelo e ofof ulo batsok tura konona sunwar eu melmel bingne bingne, una sesngeni tifre tongge gii ri ka melmel gii lo nal: tifre mara kaontri, mara funmat, mara kinen, ma mara matmatang ge.
7 I e war bakir sak aregii, “Sokeni e Deo ma tow e finaswen tifi, anwarow biing na anganggon kia, e sau puek. Nawen singi se e gow e balambat ma nal ma semek ma matmatan dan.”
8 Ma anggelo baba e u e usi ma ka war, “E sam luut! E sam luut, Babilon Bakir, le e tatfe re mara tongge ri ku gow e sinang na fabur bakir kia una faet falek.”
9 Ming anggelo baba e tuul e usi ru ma ka war, lo angkiimkiim bakir sak, aregii, “Le tikas ku nining singe man rokai ma ke poksenge ma ku kepe tintof ke man rokai a ilo mata, tam ilo limow,
10 i mung eu in lo waen gii balasak ke Deo ka ta ilo, le e sam toto tura mara rawas ma balasak kala ilo bala kap na songe kia. I eu kepe singmat na ongker lo iif ma fam fulful tuntun, namatre fan anggelo tarawen ma Sikuan Sipsip.
11 Ma ampuat lo ongker keri eu kanek wiyat bingne bingne. E tek ti manau lo ansiat ma lo panambiing singe seri a, ri ka nining lo man rokai ma ke poksenge, ma tife seri a, ri ka kepe tintof lo asow.”
12 Ilea, tongge ke Deo, seri usi e fafanau ke Deo ma puse famti e titinge lo Yesus, ri samusu balamas una kepe fan mafet.
13 Ming ya ongni e angkiimkiim tinglo balambat e war, “Siit famti: Warfakausi tife fan minet, seri met ilo bala e Taufi, geinggii ma ku la.” Tangwa Riis e war, “Yow! Usi riu manau tinglo fan mus keri, anwarow fan mok ri gow eu usi ri.”
Fitiil ulo nal
14 Ya au par, ya ka pari e pambalbal murmur neng e kiiskiis ulo, i e ngo are sikow e kaltu, tura at king ri bilseni lo gol e ta ulo paklu ma ringgot faen ulo limow.
15 Ming neng e anggelo e suu tinglo bala Felun Nining Bakir, ma ka tau bakir singi e kaltu e kiiskiis ulo pambalbal aregii, “Kepe ringgot faen kiau ma fitiil, anwarow pansumbiing una fitiil e sau puek, le fan ume ilo nal e sau matuk.”
16 Ma kaltu e kiiskiis ulo pambalbal e sap ine ke ringgot ulo nal, ma kamu fitlii e fan tuan e sau matuk ilo nal.
17 Nenge anggelo e suu tinglo bala Felun Nining Bakir ilo balambat, i ming e mel e ringgot faen.
18 Ma uwa, neng e anggelo se e efe lo iif, e puek tinglo altar ma ka tau bakir tife anggelo a ka mel e ringgot faen, aregii, “Kepe kem ringgot faen, o ku poko e fan firfiran waen gii lo nal ma o ku sele tiim iri, anwarow, fan firfiran waen gii lo nal e sau pim.”
19 Anggelo a, e popok re fan firfiran waen ulo nal ine ke ringgot faen ma ka sele tiim iri ma ka bas iri talo bala tang na balasak ke Deo, una pii mongmong iri.
20 Ma ri ka pii mongmong ine firfiran waen ulo bala tang, una male ine siti, ma dadak ka suu tinglo tang a, e fuun kanek kala muut fasi lo ngusu e fan os, tapak lo e ngo are, e tuul e atis na kilomita.