16
1 Wimi ya ka ongni e angkiimkiim e tau bakir tinglo Felun Nining Bakir ka war singre baba fis na anggelo a, aregii, “Gam la, gam ku la tipeufu e baba fis na dis a, ka fuunuf ine balasak ke Deo talo nal.”
2 Anggelo baba tikii e la ka la tipeufu e dis kia talo nal ma fam piiu ri par saksak sekit ma ri kerker sak ka fuut lo re tongge e mel e tintof a man rokai ma ri ka nining lo poksenge kia.
3 Anggelo baba e u e tipeufu e dis kia talo balang kasap, ma balang kasap ka la ikis ka puek are andaku e kaltu e sau met. Ma fan mara mok nano ri mel e ninliu una kasap ri ka famete.
4 Anggelo baba e tuul ka tipeufu e dis kia talo fan dan ma fan matmatan dan ma ri ka ikis ri ka ta dadak.
5 Wimi, ya ongni e anggelo a ka efe lo fan dan e war, aregii, “Deo, Tikiin o riis, o ta ting geinggii ma ting lewa. O riis sekit, anwarow o ikseni e fan mok gii ma o ka tow e mafet gii;
6 anwarow, ri sau paketmet ire tongge riis ma fam profet kiam, ma o sau fainim ri ine andadak gii, e ta fimfiil e riis lo fan mok ri gow.”
7 Ya ongni e angkiimkiim tinglo altar e war, “Yow, Taufi Deo muim e mel, faikse kiam e tikin ma e riis sekit.”
8 Anggelo baba e fet ka tipeufu e dis kia talo pisii, ma pisii ka kepe rawas una tun re tongge ine iif.
9 Antuntunow e iif gii, e tuntun tikin, iya, ka tun saksak ire tongge ma ri ka porau saksak ine asow e Deo, se a ka efe lo mara mafet gii, sakle ri tibi iksi e balbalri ma ri ku akteni e asow e Deo.
10 Ma anggelo baba e lim ka tipeufu e dis kia talo sia king ke man rokai, ma kepmale kia anor kut ka afti kiruur. Tongge ri ngiit kerkermeri ilo bala singmat na ongker,
11 ma ri ka porau saksak ine Deo tinglo balambat, anwarow lo fan ongker ma fam piiu keri, safle ri tibi iksi e balbalri tinglo fan mok saksak ri gowgow.
12 Ma anggelo baba e on ka tipeufu e dis kia talo dan bakir sak Yufreitis, ma dan a ka mas una terngeni e sal ke fang king ting u weng.
13 Wimi ya ka pari e tuul e tangwaner saksak ri ngo are fan rokrok; ri suu tinglo ngusu e sii bakir, tinglo ngusu e man rokai, ma tinglo ngusu e profet gurgurum.
14 Ri ta fan tangwaner saksak sekit, ri gow e fan tintof na tibou fuut, ma ri ka la usi e fan mara king tinglo nal kiruur una keptiim iri usi e fapaket lo biing bakir ke Deo, se mui e mel sekit.
15 “Ong! Ya puek are kaltu na kinkinau! Fefeal tife se a ka parpar ma fang kolos keri ka ta iwa ilo ri, usi ini riu tibi biilbiil ma ku tibi maiyai na matre tongge.”
16 Wimi, ri ka keptiim ire fang king ulo neng e male, ri fotngi lo kinen Ibru ini Armagedon.
17 Anggelo baba e fis ka tipeufu e dis kia talo bala anmangmangel, ma tinglo Felun Nining Bakir, angkiimkiim bakir ka la tinglo sia king ka war, aregii, “E sau fawet!”
18 Wimi ka pilpil, ma ka ngurngur e male e parpararak, ma ka gigi bakbakir tikin. E tifik tek ti anggi ting famu tinglo biing kaltu e tofnge puek wagii lo nal ek ngo are anggi gii, e doinge saksak sekit ine male.
19 Siti bakbakir e tapot ka tuul lo, ma fan siti kere tongge ilo nal nano ka luut. Deo e sangfi e siti bakir Babilon ka tow e kap e fuunuf ine waen, waen gii e ta tintof lo balasak bakir kia.
20 Fan mara bit e tam iri ma fam pakpaklunmale ri am tibi fasi una par ri.
21 Tinglo batsok fan susun ais lamlam — mafet lo tikii fu, tikii fu, e ngo are e lim e sangful na kilogrem, — ri luut talo re tongge. Ma ri ka porau saksak ine Deo nafow e mafet, anwarow mafet a e sak sekit.