18
Luut ke Babilon
1 Wimi ini, ya ka pari e anggelo e ding tinglo balambat e puek tura mara rawas ma mia, ma finaswen kia e furat ilo nal kiruur.
2 I e tau rawas tikin aregii,
“Siti bakir Babilon e sam luut! E sam luut!
I e sam ta male kere fan tangwaner saksak,
male kere fan tangwa ri tibi kalkaliis,
male kere fan man ri tibi kalkaliis,
male kere fan mara man ri tibi kalkaliis ma ri mapu tikin na mata e Deo.
3 Nafow e mara ge, ri musngeni e fan sinang na faet falek tura, e ngo are ri sam in lo waen tura.
Ma fang king tinglo nal ming ri gow e fan sinang na faet falek tura,
ma fan tongge tinglo nal gii, ri ka umumat ine fan mok, ri ka fespuek ri ka ta tongge tuba ri e mel, anwarow, lo sinang na fiifiil fan mok fuunfuun una fasefu sekit e fabur bakir keri tibom.”
4 Ma ya ka ongni e neng e angkiimkiim e puek tinglo balambat e war aregii,
“Gam na tongge kiang, gam samusu la kosngi e male a,
are gam ka tiim tura lo fan tubiil i e gowgow,
ma are gam ka tiim tura ming lo biing eu kepe mafet;
5 anwarow, i e kep tiim ine fan tubiil kia ka kanek uiyat ulo balambat,
ma Deo eu sagif famti e mara sinang saksak kia.
6 Gam samusu tow mil tifi e sa e tow.
Ma gam samusu fa-u koso mil singi sa i e sam gow.
Fa-u tipeni e fan tubiil ma fan mafet talo tibom tinglo kap aiya tibom.
7 Tow e singmat na ongker ma sangkuuluung tifi,
ku fasi use singmat na finaswen ma tuba i e sau bom mel lo.
Ulo bala, i e sang aregii,
‘Ya kiiskiis are kwin ilo sia kwin.
Ya am tibi ngo are makos.
Ya mu tibi tupngeni e mafet ma ya ku teng.’
8 Aregii, fan mara mok saksak gii, e mu afti lo ti biing:
e mel e minet, sangkuuluung, ma biis faen.
Ma iif eu en kiruurngeni e Babilon,
anwarow, Deo Taufi e mel e mara rawas, eu kos famila mil tifi.
9 “Fang king tinglo nal ri bilbilseni e fan sinang na faet falek, ma ri ka melmel tura, are tongge tuba mel ri ka kepe fan mok una fawetu e fam fabur keri tibom. Ma lo biing ri pari e ampuat tinglo iif e sok lo Babilon, riu teng ma ri ku sangkuuluung.
10 Riu pari e fan ongker saksak, i e kepe ma riu soke sak, riu su ti tapak ini ma ri ku war,
‘Kiskam, kiskam sing o Babilon,
o bakir ma o ta siti rawas!
Lo su tikii anmatan pisii mung, fimfiil saksak tinglo fan sinang saksak kiam e sau puek talo o!’
11 “Ma fan tongge tinglo nal gii, ri ka umumat ine fan mok, iri sangsang usi e Babilon ma ri ku teng tura sangkuuluung anwarow, e mu tek tikas eu la usi ri una umat.
12 Fan inwit keri: gol ma silwa ma konona fam fatfat ma fan eu mata e bakir sak; ma fan konona matmatan laplap, laplap kaukaor, ma laplap buuluum; ma fan mara matmatang kalut mata e kanek sak; ma fanenger fan mok ri gow lo ngisngisan elefan, ma fanenger fan mok ri gow lo matang kalut mata e kanek sak, ma lo bras ma lo aen ma lo konona fat e mel e panta ilo;
13 Ma e mel e fan inwit keri ming iwa, are sinamon ma fanenger fan mok ming una fafuutngeni e tiif lo tuan; insens ma fanenger fan mok ming e mel e konona sanow; waen ma konona wel ma konona falawa ma wit; buuluumakau, sipsip; fan os tura fang karis keri; ma ri umat ming ire tongge na faim fofoes.
14 “Fan mara mok balam e burbura sak, iri nano ri sam la kosing o, mara tubam tiim tura mara finaswen kiam, e sam tam iri nano, ma o amu tibi fasi sekit una kep famil ri.
15 Ma tongge ri sam umumat ine mara mok gii, ma ri ka kepe tuba ri singe Babilon, riu ti tapak, anwarow riu soke, biing riu pari e Babilon eu kepe ongker, tineng, ma sangkuuluung kia.
16 Riu war aregii,
‘Kiskam! Kiskam singe taon bakir gii!
Nangen e los lo konona fang kolos, kaukaor ma buuluum,
ma e fafapete ine gol ma ine fang konona fam fatfat tura fan eu e kanek e mata.
17 Ilo bala tikii anmatam pisii, tuba ri e sam sak sekit!’
“Ma fan mara keptin lo sip, ma fam pasindia nano, ma fam boskuru, ma seri nano gii ri ka sagisu kepkep fiimfiil tinglo balang kasap, riu ti tapak ine Babilon.
18 Ma lo biing ri pari e ampuat tinglo iif e sok lo Babilon, riu tau aregii, ‘Sese siti gii, gi wa e ngo are siti gii?’
19 Ma riu kepe baukiif, ri ku wiilii e pakpakluri tibom ini, ma riu teng tura sangkuuluung ma ri ku tautau aregii,
‘Kiskam, kiskam tikin singe siti bakir gii.
Fan mara tamtaman sip gii, ri sagisu filau ina kasap
ma ri ka fespuek ka ta tongge e mel e tuba ri tinglo faim keri singe siti gii.
Ilo bala tikii anmatam pisii, Babilon e sam sak sekit!’
20 Balambat, o gasgas ma fefeal,
ma gau ming na tongge ke Deo,
ma gau ming na fan apostel ma fam profet,
lo fan mafet e sau puek ka bero ine Babilon.
Anwarow, Deo e sam tow e mafet tifi, nafow e fan sinang saksak i e sam gow lo gam.”
21 Ma ming neng e anggelo rawas ka kepe fumfat e par are fumfat bakir na sese-i e wit, ka baspu ini una kasap ma ka war aregii,
“Lo tikii matang sinang gii, riu kepe siti bakir Babilon ri ku baspu ini wifaf,
usi ini ri mu tibi par famila mil.
22 Babilon, fan seksek singre tongge na gargaris fang gita ma kifii e fan tulal ma punga e fam pung,
riu tibi ongen ri mil ilo bala male kiam.
Ma tongge ri mel e matmatan mus keri,
ri mu tibi melmel ming ilo o.
Tengteng lo fumfat una sese-i e wit
e mu tibi fespuek ailo o.
23 Angkarfiow e lam
e mu tibi furat ming ailo o.
Angkiimkiim a kaltu e bala tinaule ma fefin e bala tinaule,
ri mu tibi ongni ming ailo o.
Nangen tongge kiam ri umumat, ri melmel are tongge lamlam tinglo nal.
O gurgurum re tongge tinglo nal ine fan bilbilse saksak kiam.
24 Deo e pari e daku re fam profet ma tongge riis kia, ma tongge nano tinglo nal gii Babilon ka paketmet iri.”