1 Wimi ya ka pari e balambat fuu ma nal fuu, le balambat ma nal ting famu e sam tam iru. Ma e sam tek ti balang kasap ming. 2 Ma ya ka pari e siti tarawen, i e ta Jerusalem fuu, e lala kosnge balambat ka pu, Deo e sau fagatiufu, are fefin e bala tinaule fuu. 3 Ma ya ka ongni e angkiimkiim tinglo sia king, ka war bakir aregii, “Par! I gii e male una melmel singe Deo, e ta tura tongge, i eu melmel tura ri. Riu ta tongge kia, ma Deo tibom eu melmel falifu iri. 4 I eu siufu e mara dardarun matri tinglo matmatri. E mu tek ti minet, ma fatengse lo minet, tam teng, ma ti ongker; le fan mok ting famu ri sam rop.”

5 Ma se a ka kiis ulo sia king ka war, “Par! Ya gow e fan mara mok ka fuu.” Ma i ka peteng, “On siitufu, le fan warwar gii e tikin ma o fasi una titinge lo.” 6 Ma i ka war sing yau, “Fan mara fagati e sau fawet. Ya ta Alfa ma ya ta Omega*, Ya ta Tofnge ma ya ta Rorop. Se a ka metdan, yau tow e dan na ninliu e tek ti fimfiil lo tifi. 7 Se a ka kulfi e fapaket eu kepe e konona fan mok gii. Ma ya ku ta Deo kia ma i ku ta ina sikuang. 8 Safle tongge ri biliik, fa e tek ti titinge keri, tongge na gowgow e sinang saksak, tongge na pakpaketmet ire fa, tongge na gowgow e ansinang na faet falek, fa a ri ka makan, fa ri nining lo deo gurgurum, ma mara tongge na gurgurum, riu baspu iri talo bala ampolo e lilit ma e fuunuf ine fam fulful tuntun ma iif. Igii e ta minet baba e u.”

9 Neng lo baba fis na anggelo e mel e baba fis na dis e fuunuf ine baba fis na mafet uwa, eu faropo e balasak ke Deo, e sa la usi yau ma ka war aregii, “Kasa, ya ku fanangsi o ine fefin e bala tinaule fuu, e ta wok ke Sikuan Sipsip.”

10 Uwa, Tangwa Riis ka fafonsi yau. Ma anggelo ka uun yau wilo paklunmale e bakir sak ma e kiis uyat sak, ka la fanangsi yau ine siti tarawen ina Jerusalem e pupu tinglo balambat singe Deo. 11 I e fuf tura finaswen ke Deo. Anmaengow e finaswen kia e ten kuriik sekit, e ngo are fat fifiil lo e kanek sak. E fuf are fat ri fotngi ini jaspa ma e ten kausi sak are galas. 12 E mel e singmat na balo lo e kiis iyat sak ma e mel e tikii sangful ma e u na matangkon lo, tura tikii sangful ma e u na anggelo ilo fan matangkon a. Ulo fan matmatangkon a, ri seti e asasri e tikii sangful ma e u na funmat tingna Israel. 13 Fan matmatangkon a, e tuul e mata wi weng, e tuul e mata wi suu, e tuul e mata wi sif ma e tuul e mata wi se. 14 Balo lo siti a, e mel e tikii sangful ma e u na fat ri ta fam fatu e balo a, ma ulo ri, ri seti e asasri e tikii sangful ma e u na apostel ke Sikuan Sipsip.

15 Anggelo a ka gongon tura yau, e mel e rula ri gow lo gol u singi una maku e siti, fan matangkon lo, ma fam balo lo. 16 Siti a ri gow ka muut fasi lo e fet e galu fapot lo, tapak lo e su fasi tura palpaluk lo. Anggelo e maku e siti a ine rula, ma ka sik seni ini tapak, palpaluk ma kanek lo fam balo a ri tiin ngo, ri tiin muut ilo e tikii sangful ma e u na mar na stedia†. 17 Ma i e maku e balo ma ka puek ka tikii atis ma e fet e sangful ma e fet na kubit‡, anggelo e maku e balo are tongge tinglo nal ri makmaku e fan mok. 18 Balo ri gow lo fat jaspa, ma siti ri gow lo gol riis sekit, are galas e tibi fasole lo ti mok. 19 Fam fatu e fam balo lo siti ri faswen ri ine fan mara matmatan fatfat a ka kanek sak e matmat ri. Fat baba tikii lo balo e ta fat jaspa, fat baba e u e ta fat sapaia, fat baba e tuul e ta fat aget, ma fat baba e fet e ta fat emeral, 20 fat baba e lim e ta fat onikis, fat baba e on, fat rubi, fat baba e fis, fat krisolait. Fat baba e wal e ta fat beril, fat baba e siu neng e fat topas, fu ka ta tikii sangful iri e ta fat krisopres, fat baba e tikii sangful ma e tikii e ta fat aiasin, ma fat e tikii sangful ma e u e ta fat, ametis. 21 Sangful ma e u na matangkon ri gow lo tikii sangful ma e u lo pel, i e ta matan eu, ma e murmur mata e kanek tikin. Tikii neng tikii neng e matangkon ri gow lo tikii pel. Sal bakir ulo bala siti ri gow lo gol tikin, ma e ten sak are galas. 22 Ya tibi par ti Felun Nining Bakir ulo bala siti, anwarow, Deo e muimel sekit ma Sikuan Sipsip ru ta Felun Nining Bakir tinglo bala siti. 23 Siti a e tibi fabur usi e pisii ma funiil una pal ilo, le finaswen ke Deo e tow e anten tifi. Ma Sikuan Sipsip e ta lam tinglo. 24 Fan mara tongge tinglo fan mara male riu fes ilo anten tinglo siti gii, ma fang king tinglo nal, riu sele puek ine fan finaswen keri wilo bala. 25 E tek ti biing ini fan matangkon lo eu kut, anwarow eu tek ti panambiing ilo bala siti a. 26 Ma fan mara finaswen ma nawen singre mara male, riu sele kau iri talo bala. 27 E tek ti mok sekit e du eu kaulek ilo bala, ma eu tek tikas na gowgow e fan mok saksak na maiyai ma na gurgurum. Sakle fa a asasri ri ka seti ilo bala buk na ninliu ke Sikuan Sipsip, riu kaulek ilo bala.