7
Ri tow e panta tifre tikii atis ma e fet e sangful ma e fet na mar na kaltu
1 Wimi ine mok gii, ya pari e baba fet na anggelo ri titi ulo matmatow e fet matanen lo nal gii. Ri kaleni e fet matanen a, usi ini e tek ti kif eu irir ilo nal, tam ilo balam kasap, tam ilo ti au.
2 Kala ya ka pari e neng e anggelo ming, e kanek tinglo galu u weng, i e puse lo panta a Deo se e liuliu. I e tau bakir tikin singre baba fet na anggelo a Deo kabuk tow e rawas tifri una bero ine nal ma balang kasap aregii,
3 “Gau mangena saupe una bero ine nal, tam balang kasap, tam fan tenau, ku muut kemem u tow e panta a Deo kiar ilo matmatre tongge na mus kia.”
4 Wimi ya ka ongni e wewes lo seri a ri kabuk tow e panta ulo ri: tikii atis ma e fet e sangful ma e fet na mar tinglo an mara fufunmat ina Israel.
5 Tinglo funmat a Juda, ri tow e panta ulo tikii sangful ma e u na mar na kaltu,
tinglo fu a Ruben, tikii sangful ma e u na mar na kaltu,
tinglo fu a Gat, tikii sangful ma e u na mar na kaltu,
6 tinglo fu a Aser, tikii sangful ma e u na mar na kaltu,
tinglo fu a Naptali, tikii sangful ma e u na mar na kaltu,
tinglo fu a Manase, tikii sangful ma e u na mar na kaltu,
7 tinglo fu a Simion, tikii sangful ma e u na mar na kaltu,
tinglo fu a Lewi, tikii sangful ma e u na mar na kaltu,
tinglo fu a Isakar, tikii sangful ma e u na mar na kaltu,
8 tinglo fu a Sebulon, tikii sangful ma e u na mar na kaltu,
tinglo fu a Josef, tikii sangful ma e u na mar na kaltu ma
tinglo fu a Benjamin, tikii sangful ma e u na mar na kaltu.
Singmat na galung kaltu ri katfarsi e Deo
9 Wimi ine parpar a, ya au pari e singmat na galung kaltu, e tek tikas ek fasi una wes ri. Ri ta tinglo mara kaontri, mara funmat, mara matmatang ge, ma mara kinen, ri fafatie u famu ine sia king ma u famu ine Sikuan Sipsip. Ri los lo fang kolos tapak murmur ma ri ka puspuse lo teltelem baibai,
10 ma ri ka tautau bakir tikin aregii,
“Faliunge e puek singe Deo kiar,
se e kiiskiis ilo sia king,
ma singe Sikuan Sipsip.”
11 Fan mara anggelo ri fafatie liflifti e sia king, liflifti e fan anggelo na famfamu ma liflifti e baba fet na mok a ri ka liuliu, ri tiin luut pukungkek tura matmatri ulo nal, u famu ine sia king ma ri ka nining lo Deo,
12 aregii,
“E tikin! Katfariis, nawen, atausimale, aro, matlawen, muimel ma rawas
eu la tife Deo kiar bingne bingne, E tikin.”
13 Kala, neng lo re fan anggelo na famfamu ka gatom yau, “Ming, o parfat ini Tongge gii ri ka los lo fang kolos tapak murmur gii, e ta seri, ma ri la ting iya?”
14 Ya ka koso aregii, “Kaltu Bakir, o parfat.”
Ma i ka war, “Tongge gii, ri ta tongge lewa ri kabuk ta ulo bala singmat na balasak ke Deo ma tongge na matamfais ri kabuk bero iri, safle ri tibi luut. Ri sam gua e fang kolos keri ka la murmur ine andaku e Sikuan Sipsip.
15 Iya,
ri ka ti u famu ine sia king ke Deo
ma ri ka faim lotu singi lo ansiat ma ampanambiing ilo bala Felun Nining Bakir kia.
Ma i, se e kiiskiis ilo sia king,
eu ta fel e luuk ri.
16 Ri amu tibi biis mil,
ri amu tibi metdan mil,
pisii e amu tibi tun ri,
tam ti antuntunow e ti neng e mok tuntun ming.
17 Le Sikuan Sipsip ilo falifu lo sia king
eu efe lo ri are efefe kere fan sipsip;
i eu famu iri wilo anmatan dan na ninliu.
Ma Deo ku siufu e mara dardarun matri tinglo matmatri.”