Eseda Girigi Bi
Mbuga ogoha gilibu ngarunaga nemandi ogo
Esedanaga te ledagoni Isaraele wali mbiranaga te nga. Eseda ibu waitigime Isaraele wali agali garabaya bu yalu dindi taraha pu heangi berene. Ti dindi tara ogoniha heangi waitigi mbirame Isaraele wali agali mo ko hole manda bini. Ani biyadangi Ngode Datagaliwabe ibunime Isaraele wali agali Esedahanda biamogo bilo manda buwa biamogo bulenaga Eseda ibu dindi ogoniha kini heago one berelo ibu ala dabo bere lene. Anidagua biyagola Eseda ibugua nde ibu agua bulubada lo manda nabi ibugua Ngode Datagaliwabehanda hame leago dege talialu bini. Ibugua wali agali ibuni damene hearu biamogo bulene dege manda bini. Anidagua biyadagome nde Ngode Datagaliwabehanda Isaraele mo ko nahelo mo wialu haru dai biyagola waitigime Isaraele mo ko halu bo wahai nahene.
Mbuga Baiboloha Esedanaga mbuga kirani Esedanaga te leda. Pigane tigua mbuga ogo Hiburu bi lowa gilibu wialu mani howa Girigi bi lo beregedo winigo nga. Anigo tigua Girigi bi lalu gilibu wiyadagoha bi emene lo iriari buwa gilibu winiya. Ani bialu bi gahange maru gili biatago hayiya.
Ai Eseda mbuga Girigi bi lowa gilibu wini ngagome bi hongohe mbira ledago minime hongo howa Ngode Datagaliwabe mitangi bialu ibuhondo bi lolene nga lalu mo walia ho nga. Eseda mbuga Hiburu bi lalu gilibu wini ngagoha be waragaria bibahende nagilibuwi. Hiburu bi gilibu ngagoha Be pira hangu nga. Ai Be gahange mo tago hene uruni Be A howa pialu Be G ogoriani wiamaro bida. Ani bialu gahange uruni ti Be mbira howa pira ngago dombeneha wiatago haga bini nga. Ani bialu Be B ibu Be 3.13 wialu 3.14 nga. Ani bialu Be E ibu Be 8.12 wialu 8.13 ogonilabo hengeneha nga. Ani bidagome Be 3 Be 8 kirabali mbuga kirabaliha nga.
1
Modegaihanda emaga hendenego ogo
Babilono Kini Nebugadenesa ibugua Isaraele bai halu wayali hayangi agali mbira mini Modegai ibu Beniyamini hameigini henego ibubi Yuda kini Yahoiaginibi heba garabaya bu yalu pene. Modegai ibu Yairi igini howa Simai aguane hene. Simai ibu Kisi igini hene. Ibu puwa Susa tano wiagoria pu berene. Susa tano ogoni Pesia dindiha tano timbuni dunini mbira wini. Ani howa ibu kini Segesisinaga biabe timbuni dunini timbuni mbira bialu haga hene.
Ai Segesisi ibu kini hearia mali mendeni ege Nisana heagola ogoninaga horo mbiru Modegai ibugua emaga mbira hendene. Ibugua emaga handalu hearia dindini wiaru damene bibahende mo lingilungu lai howa dindi kili kulu lalu hari kulu kala lalu dindi dumbidumbi bialu mbirale bibahende mo lulu ya hayane hendene. Ani biyagola puya timbuni kirame wai bule manda manda bu wiaria hendene. Libugua bi hongo howa ladaga hayagola wali agali dindi bibahendeha hearume Ngode Datagaliwabenaga wali agali tigabi ibunihondo lotu lalu haga hearu baba wai bule manda manda bu hai hearia de hendene. Horo ogoniangi horo koni arumahe wuwa genda yulene mbira wiaria de hendene. Ogoni dugu bulene horobi ko tara tara ngola holene horobi mo ko holene horobi wiaria hendene. Ngode Datagaliwabenaga wali agali tigabi hearu tiha ko tara tara ogoni anda ibule wiagola ti gi timbuniore ho hea. Ani howa ti homole manda manda bu hea. Ani howa ai Ngode Datagaliwabehondo ti biamogo bia lalu Ngode Datagaliwabe olaya. Ai Modegai ibugua emagaha handalu hearia tinaga Ngode Datagaliwabehanda tinaga bi layago hale hayago hendene. Ibugua handalu hearia iba emene mbira dindiha howa dugatagi howa pialu unura emeneore timbu haga bima pialu mani unuraore timbuni gibiore piyago hendene. Ai gaolopaya bialu ni tagira ibiyane hendene. Ani biyagola wali agali ko mini nahe uruni tigua waitigi ko mine haga uruni balu bo wahaiore hene.
Ani hondowa Modegai ibu heyuwa ibugua emaga Ngode Datagaliwabehanda mo walia hayago irane aginaga daba hondole miyago miniha mo tale bialu berene.
Modegai ibugua kini peleminigo ogo
Horo mbiru hayagola Modegai ibu kini anda hane tagira yagi berene. Agali kininaga biabe bia haga kirali Gabada Tarala libu nde mamage haga henego ai libu libuni biabe biagadago bialu hene. Modegai ibu biruwa hale halu hearia libugua ko bule bi lalu hebira hale hene. Ibugua baya hangu hale halu hearia libugua lalu, Kini homelo bo wahabiya, layago hale hene. Ani layago hale halu Modegai ibugua kini hearia puwa layane hale hayaru bibahende lamiai hene. Libugua godi laribigo hale halu hemiria libuha bi mbira nawiore hebiria hendene. Ani hebigo hondowa libu homelo bo wahene.
Kinihanda agali beba gili biaga heagohondo bia layagola tigua agali kira biago labome biyago te kininaga binigo gilibu wiaga mbuga wiagoria gilibu wia layagola gilibu wini. Modegai ibuguabi nde te ogoni ibuninaga mbuga wiagoha gilibu wia dege bini. Ai Modegaihanda kini ibu homolene mo wahayagonaga kini ibugua mbiraleru dewaore bame hilo mialu ibu agali haguane mbira howa ibu andagaha handaya ho haga helo dabo helalu bini.
Anigo agali mbira Bugai hameigini aria Hamedada igini Hamana ibubi nde kininaga deni mini lene agali haguane dege mbira hene. Ani howa ai agali kirali biago labo Modegaihanda libu ko biya layagome bo wahayagonaga Hamanahanda Modegai halu Yuda wali agali bu hearu mo ko hole ndelene.
Kuini wali Basidihanda Kini Segesisihondo mine henego ogo
1-2 Mbirale uruni biyagola Pesia dindiha Segesisi ibu kini heangi bini. Ibu kini howa Pesia dindiha dindi timbuni Susa tanoni kini biragane dagia wiagoria handame ho howa haru hene. Ani howa ibugua dindi hobane handari mbira pira kirani karia (127) bibahende India dindiha howa wima pialu amuroaore Sudana dindiha wiairi hene.
3 Ibu kini henego mali tebone howa ibugua dindi bibahendenaga agali bu hearubi agali manda timbuni bi hearubi bibahendenaga tomo timbuni dawa hene. Pesia dindi howabi Midia dindiha howabi nde tomo ogoni nalu berene. Ani bialu dindi hobane emene mbira mbiranaga agali haguane bu hearubi bibahende íbu birai hene.
4 Ani howa ege waraganeni ibunaga muni yaribi bayale wiaru damene bibahende agali haguane bu hearu wanakuini mo walia hai hene.
5 Ani bialu mani howa kini ibu dalu andagaha pabe bu mabu bini wiagoha yagi tomo timbuni lone dawene. Tomo ogoni agali taraha howa íbu hene tanoha hearunaga dawa hene. Tigua tomo nalu horo karia bibahende hene.
6 Pabe bu mabu binidago aga peleme mo yari bia howa pu mindibi hari mindini handaleheme dariba hene. Aga ogoni nguni bibahendeha silibame wabini mabubime daba haga buwa ege pabe heagoria mo paga howa mo yaribia haga bini. Ai pabe andaneha ege to̱le̱ baya tara pelebi daramabi wiarubi mindibi hari mindini handalehe wiarubi ege to̱le̱ tara iba wa̱i̱ handalehe wiarubi urunime dindini dunga ho wini. Ani wiagoria biragane dagia ngolome wabini silibame wabiniru pabe andaneha ege to̱le̱ dunga henedagoria wiai hene. Ani bialu dagia uruni aga baya tara tara wiarume dunga halu mo dambi howa mo yari bia halu bini.
7 Ani bialu agali gabo be ngolome wabinirubi silibame wabini wiarume iba nalu berene. Ani biruwa gabo be mbira yolo timuni daligaore kina dege daosini pira tebirame (K30,000) miaga wiago ti mo walia hene. Ani bialu kini ibugua agali uruni waini iba dewaore nelo mini.
8 Waini iba ogodagua nalu karulape lo manda nabi agali bedaru ti iba tini hame ledadagua karulape nelo mia dege bilimu lalu agali waini iba odo tale biaga ibu andagaha haga hearuhondo lamini.
9 Horo ogoningi dege kuini wali Basidi ibugua nde kini andagaha dege walinaga tomo timbuni dawa nalu berene. Tomo ogoni walinaga hanguore wini.
10 Tomo ani nalu biruwa horo kane hayagola kini ibu waini iba nowa emene lulu yu berene. Ani biruwa ibu andagaha biabe biaga agali karia hearu olalu ibidaba lene. Agali uruni mini Hamana Basana Tara Borase Sadoloda Abadasa Taraba layaru henego uruni ibini.
11 Ani ibiyagola kinihanda lalu, Kuini wali Basidi haru ibidaba, lene. Kini ibugua Basidi haguaneni kuini walinaga tangi mo karula holenaga ani lene. Kuini wali ogoni bayaleore tara wali maru baba tabe tabe nabi berenego ai kini ibugua ibu one baya ogoni agali maru tomo nalu berearu mo walia hole manda bini.
12 Ani manda bialu layaria ai kuini wali ogoni ibu ibulene hame nalene. Ani biyagola kini ibu keba timbuniore hene.
13 Ani howa ibugua agali mana mandabi bu hearuhondo lamialu, Kuini wali Basidihanda bi mo wahayago ayu ibuhondo agi buabe, lalu hale hene.
14-15 Ani hale hayagola agali haguane timbuni tebirali kini ibuniale dege henego ibini. Agali tebirali uruni tigua kinihondo ti daluha mana wiago lawai halu, Ai mbirale kuini Basidihanda biyadagonaga ogodagua bulene nga, lalubi lamialu bini. Agali tebirali uruni ti mini Ageseusu Sasadeusu Malesea layaru hene. Agali tebirali uruni ti Pesia dindibi Midia dindibi howa íbu hene.
16 Ai kini ibugua ibunaga agali haguane Pesia dindialibi Midialibi hearuhondo mbirale kuini wali Basidihanda ibuhondo biyaru lamiai hene. Ani lamiyagola agali mbira mini Mugeusu heago ibugua agali haguane hearuhondo lamialu lalu, Kini-o bi ogo hale harene. Ai kuini Basidihanda ko ogoni í̠hondo hangu ndo biyada. Ibugua ina bibahendehondo biyida.
17-18 Ainde inanaga wali bedaru bibahendeme kuini wali Basidihanda ogonidagua biya larago abale hale hayago lolobada. Ani bialu wali bedaru bibahendeme kuini wali Basidihanda biyadadagua dege ti agalininaga bi mo wahalu mine holobada.
19 Anidagua bulubadago ai kini-o í̠na manda bialu keria bi ogoni bayaleda lo manda bideyagua nde bi ogoni wali agali bibahende kagoha piai helolene karulapeda. Í̠na bi ogoni lo pelalu howa tihondo lalu, Ai Basidi ibu i̱ bedoria ibulene nawiore lolene nga. Ani lalu bi ogoni Pesia dindi Midia dindilanaga mana mbuga ngagoha gilibu wulene nga. Ani bialu wali bayale mbira taya buwa Basidi kuini wali berenegoria bira aribia helo taya bulene nga. Ai ogoni hangu.
20 Ai ṉ́aga bi ogoni dindi ṉ́a hondo kego bibahendeha wali agali bu karume hale hai harangi wali lenego bibahendeore agali haguane one bereaguabi agali damene one bereaguabi bibahendeme ti agalini bi hale hai holebira, lene.
21 Ani layagola kinibi ibunaga agali haguane biarume bi ogoni karulapeda lowa ai kini ibugua Mugeusuhanda lamiyadagua bini.
22 Ibugua beba gili bialu dindi ibugua wiaru bibahendeha wali agali bi tara tara laga laga biaga wiagodagua gili bialu pelai hene. Kini ibugua beba ogoniha gilibu wialu lalu, Agali ibu hangume ibu one waneigini bibahende handaya ho hai ka, lalu gilibu pelene.