3
Hosea ibu one ko biaga biagola binigo ogo
1 Anduane Homogohanda i̱hondo lone ogodagua langiya. Ai í̠ one agali mendela kayu bima ibaga bialu bedagoni ibuhondo lone gubalini hole pobe. I̱naga Isaraele wali agali tigua i̱ yu wahalu gime wabiniruhondo gerebi lini do gembe biniru loma mule yalu piagaru ti i̱na gubalini haho wiaabo kogonidagua í̠ oneore gubalini habe, lene.
2 Ani layagola i̱na muni kina ale handari mbirani pira duriabi (K150) ladi ale mini bali mbege nu waragariamebi wali ogoni lone yolo biru.
3 Ani buwa wali ogonihondo ogodagua laru. Ai i̱ oneore bedegonigo iya haru mandagi napalibiya. Í̠ agali taya bima nape yamo luore birabe. I̱na nde í̠ ago berebe hondole mamage holebero, lalu wali i̱ one biago lamiru.
4 Ai ogonidagua dege Isaraele wali agali tinaga kinirubi haru hagarubi mbira nahe howa ti luore maliaho holebira. Tigua bi pupu wule lowa ira mbira hanga ho helowabi ege to̱le̱ mbira hanga ho helowabi urunihondo bi pupu nawulebira. Tigua gime wabini urunihondo mani bulebiraru hondole halaga biaga winirubi áyu nabulebira.
5 Isaraele wali agali tigua urunidagua bialu howa Anduane Homogo tinaga Ngode Datagaliwabe kahayagi dai buwa ibu mitangi bialu lotu lolebira. Tigua Kini Debidinaga aguanene mbira holebirago ibu kagohabi dai bulebira. Ani bialu howa tigua Anduane Homogonaga andaneha howa ibunaga bi hale halu kagola ibugua nde ti bayale helonaga mbirale tara tararu migi bulebira.