5
1-2 Loma binigo mo miaga kamiru-o bi o larogo hale hadaba. Isaraele wali agaliru-o tíbi bayuwa hale hadaba. Kini aria kamiru tíbi hale hadaba. Tígua wali agali manani tigabi dabolene wiadagua ndo dabalu kamigo. Ani birimigome tíni manani holene nga. Loma binigo mo miaga kamiru tígua Misiba tanonibi Hari Tabo nenenibi Sidimi tanonibi lotu henene letingi howa wali agali mo guya harimigoni. Tíore mini ohe bogabi howa wali agali minule gono alebi wena nu alebi kamigoni. Ogonidagua bialu kamigonaga i̱na tí bibahendeore pani ngiai hole ngogoni.
3 Isaraele wali agaliru tígua beremiligo i̱na manda biai kogo. Ai i̱na de nahondoliyanaga tíore bira do holene mbira nawiore kamigoni. Tí walime agali kayu bima ibaga biaga bedaligobi howa i̱naga deni tí dodohe koore kamigoni, lalu Anduane Homogohanda lene.
Isaraele wali agalime Anduane Homogo heba lone mandagi habe nahe henego ogo
4 Isaraele wali agali tigua mbirale gime wabiniruhondo bi pupu wialu howa Anduane Homogo yu wahenego ka. Mana ogonidagua bialu piyagome tininaga Ngode Datagaliwabe ibuni karia lone dai bibe nahe kagoni.
5 Isaraele wali agali tini mine haragome tini pani nolene nga. Mana ko tigua birarume tini mo pila halu Yuda wali agalibi ti heba pilamaga halu ka.
6 Tigua nogo sibi bulumagaru Anduane Homogohondo bo lomabu delagago urunibi bame dege mialu ka. Irane Anduane Homogohanda ti yu wahenego ibu heba mandagi habe nahe ka.
7 Walime ibu agalini wahalu agali kayu bima ibaga biagadagua Isaraele wali agali tigua Anduane Homogo yu wahenego ka. Anidagua biragome tinaga waneiginiru tibi tinaga aba Ngode Datagaliwabe kago manda nabiaga ka. Anigo ai emene howa ege pigane ngabu laragola tinaga waitigirume ibuwa wai bialu ti mo ko halu tinaga dindi anda bo gialo bagabu wahalu mo labu holebira, Hoseahanda lene.
Isaraele Yudala wai binigo ogo
8 Beniyaminialiru-o tí hameigini Gibea dindibi Lama dindibi Bedabene dindibi uruniha karu heba tí bibahendeme mbelo biguli pu lalu hongo howa wai huaro ladaga halu wai bule gerai lalu pudaba.
9 Ani beramigola horo ogoningi dege Isaraele wali agali tí mo ko howa balu bo poda hana holebira. Ani bulebira lalu i̱na tíhondo heneneore langerogoni, lalu Hoseahanda lene.
10 Anduane Homogohanda lalu, Hale hadaba. Yuda wali agali haru haga karume Isaraele dindiha anda ibuwa dindi maru ti page bialu karulo kagonaga i̱na keba ho kogoni. Tigua anidagua biyagonaga i̱na iba li timbuni ibalu mbirale bibahende ngaru hilo yalu piagadagua ti mo ko halu bo hilo waore holebero.
11 Isaraelealiru ti mini dege dindiho kagoni irane Yudalime Isaraele bo hilo wahayagola tigua kini tara maru hearume ti biamogo birabe toba howa pialu hearia kini uruni ti hongo naheyagola biamogo bibe nahe hene.
12 Timamume mbirale nagadagua i̱na Isaraelealibi Yudalibi bibahende mo ko holene ibilolebero, lalu Anduane Homogohanda lene.
13 Anduane Homogohanda lalu, Isaraelealiru tiha warago timbuni tagira ibiyangibi Yuda tiha dere tara tagira ibiyangibi Isaraelealirume Asiria dindiha puwa kini timbuni heagohondo ti biamogo bia lole pene. Ani pialu hearia Asiria dindinaga kini timbuni ogoni ibugua tinaga warago bayarubi dere biarubi mo dabi habe nahe hene.
14 Ai áyu hongohe mbira budi gabua timbuni laiono ale howa i̱na Isaraele Yudala baba wai bialu ti bo gialo bagabu wahai holebero. Ani bialu i̱na ti bo gililo yalu pu waharogola mbiralime ti biamogo bulene naholebira.
15 I̱naga wali agali uruni tigua ko biyarunaga pani tandagabi nalu ka handala ti wahalu i̱ni dalu dai bulebero. Tigua i̱ hai bialu talima ibilo ani bulebero. Ani biragola ti tandaga ndelaheore nalu howa i̱ni kogoria dai bulebira, Anduane Homogohanda lene.