32
Kini bayale mbira ibulebira lenego ogo
1 Hale halu manda bidaba. Horo mbiru kini mbira ibulebirago ibugua henene hangu lalu tigatiga dege bialu haru holebira. Ibunaga agali haguaneru tibi mana bayale tigabi ngadagua bialu wali agali haru holebira.
2 Ani bialu agali haguane mbira mbirame wali agali ti biamogo bilo hangu hangu ibugu biragola tigua baya hanguore biamogo bigi bulebira. Agali haguane uruni ti iba dalu puyabu hongoheru ibiragola bira do hagane bododalu haradagua bulebira. Dindi ko ni daho wiaabo haga dindi yobi titaule ngagoha agali haguane uruni ti iba gagahe poradagua bialu holebira. Tigua dindi ogoni aleha howa agalime ege to̱le̱ timbuni kagoha gumba handa walia howa ni poboyogobi dedaruni nade mbaule embedaho hagadaguabi holebira.
3 Ani howa wali agalinaga de ko nahe howa deme baya hangu handalu hale tulu nahe howa haleme bi baya hangu hale holebira.
4 Agalime mini nawi howa mana ta nabi bupebe biaga heneru ai ti baya hangu minime bayale kola tale bialu holebira. Agali maru bi libilaba lowa la ko haga henerume baya hanguore lalu holebira.
5 Ani bialu howa agali ko karunaga mini yaraga halu mana ko lulu ale howa bialu haga karubi mini lene lalu kamiruni bibahende ereba hai holebira.
6 Agali mini nawi lulu aleme mana ta nabi bialu haga urunime bi ko hangu lalu mana ko ngaru dege manda bialu haga ka. Tigua bi ko laragomebi mana ko biragomebi Anduane Homogo yo handalu wali agali tomo garibilo karubi iba noaho karubi mbirago nelo natalebu miaga koore ka.
7 Agali ko uruni tinaga mini ko howa emboneha wu to̱le ka. Anigo tigua minime yagibano karu mo hondo howa tinaga dabudabu ngaru ti mo yulebi agali koale karu bime bope holenebi uruni ale bulenenaga dege wai hanalu haga ka.
8 Anigoyu wali agali bayale mini lene karume mana bayale dege bialu howa tigabi holene ngarunaga mo hongo haga ka.
Walirume dara howa dugu bulene ngago ogo
9 Yarusaleme waliru-o tígua manda bialu kamiria ti bayale awadaga birulumabe tobaho bedamibe. Ani ndoyago baya hangu hale kulu mia howa i̱naga bi o larogo hale hadaba.
10 Áyu karulapego ani turuho hadaba. Mani howa ege halene (13) dene (14) agima poragola nde tínaga pu mbira mini gerebi ira olibebi ogonime lini da nabiragola mogo lalu gi howa duru lalu holeberemi.
11 Áyu ti bayale howa mini dindiha nape awadaga ogonibi dege holomabe tobaho kamigo ai duru lalu gi ho halimu. Tígua aga bayale bu kamiru golo wahowa dara ho ko lalu walia holenenaga aga ngaru bia aribia hadaba.
12 Ai tínaga mabu e bayale wimiru uruniha gerebi irane bayale hengemirubi bibahende dugua hai hayagonaga dara howa gime galu kunini balu gi haguaneni yuwa dugu bidaba.
13 I̱naga wali agalirunaga dindi bayale biago mo ko halu labu hai heagola datani koru mamunali aniheru ibalu ho aribia hayadagonaga dara howa dugu bia hadaba. Heneneore anda bayaleruha paliaga harimiru mitangi halu hama tano bayaleni tí turuho haramiligo mitangi bialu dara howabi dugu bidaba.
14 Irane tano ogoniha wali agali dewaore tinaga biabe bule pu íbu daibu bialu haramilidagua naholeberemi. Bi laranebi mbira hale naholeberemi. Ba dindiore wulebira. Kini andagabi ami agali karunaga wai pabeanda hongohe karubi amime mamage haga anda timbuni karuhabi uruniha mbira yu wanahe mo ko howa bo gialobaga biragola dindi hangu ibira holebira. Ani ngagola nogo dongi gabua karu dindi ogoniha palu ngoaiho halu nogo sibirume datani dindi ogoniha nole íbu ngoai holebira, lalu Aisaiahanda mbiwia hene.
Anduane Homogohanda ibunaga wali agali mo bayale helolebira lenego ogo
15 Anduane Homogohanda ibunaga Dinini inaha lone ibilolebira. Ani birangi dindi yobi ko mbirale anda nahabehe ngaruni mo ibane berela haragola tomo tara tara ngaru anda hai holebira. Mabu hangaga ngaruha tomo mbirale bibahende anda hagahaga bialu taraore wulebira.
16 Mana bayale tigabi bulene hangu dindi bibahendeha wiai holebira.
17 Mana tigabi hangu biragome gi nahe hada payabu holene yu anda ibiragola wali agali ti elahe howa hongoho haabo holebira.
18 Anduane Homogonaga wali agaliru ti tininaga dindiha turu hagabu kagola tiha mo gi holene mbira nawi bayale holebira.
19 Ai ti ani kagoyu irabuha iba dalu puyabula hongohe ibalu dindiguni timbuni ibira halubi ira timbuni bu karuni podopaya bulebira. Tanoha anda timbuni bu karubi podope howa dindini langulobagabu wulebira.
20 Anduane Homogonaga wali agali tí tíni dindi mabu bayale ngaruha tomo hangarimigo bayale anda helo iba karulape biruwa tínaga nogo bulumaga dongiru tínaga dindi bibahendeha tani bayale andaho karu minana nama ibagabu holebira, lalu Anduane Homogohanda laya lene.