8
Yudasa Magabeusuhanda wai binigo ogo
1 Ai Yudasa Magabeusu halu ibu aria bu hearu ti pialu dindi maru wiaruha hado hai hene. Tigua tini aria agali bu hearu bibahende olo mogo biai halu Yuda wali agalinaga lotu baya hangu handaya ho haga bu hearubi baya hangu mo mogo bu hai hene. Ani mo ngoai howa daosini dege waragaria bibahende (6,000) mo ngoaiho hene.
2 Ainde agali tara tara hearume ibalu tinaga wali agali mo ko howa haru kagonaga Ngode Datagaliwabehondo ti dara halu biamogo bilonaga bi lalu hene. Ani bialu wali agali tara urunime Anduane Homogonaga anda heago ibunaga deni mo dodohe hayagonagabi mitangi bibe lalu bi lalu hene.
3 Agali ko bu hearume tano mo ko halu bo gialahole bialu heagola Yarusaleme tanoore dara habe lalu tigua Ngode Datagaliwabehondo olalu bi lalu hene. Ani bialu Ngode Datagaliwabehondo agali homayarunaga dugu biyaru hale halu tinaga darama pelayagonaga darama dege peloleneme pani miadai bibe lalu bi lalu hene.
4 Agali ko uruni tigua ko mbira nawi waneigini darabi bu hearu bame bo wahayarubi mitangi bibe lalu tigua bi lene. Ani bialu waitigi hearu tigua Anduane Homogonaga mini mege bialu hayagonaga pani ndo mialu wali agali mine howa mana ko bialu karuni alego pani nelo agua miaga ko lalu mo walia habe lalu tigua ibuhondo bi lalu hene.
5 Ai Yudasahanda ibunaga ami agali mo mogo bu heagola maru hearu baba ibula karulanape hene. Ani henedago irane Anduane Homogo ibunaga miniha tandaga timbuni ho heago karulape biba hai howa ayu ibunaga Isaraele wali agali dara ho heagome ani hene.
6 Yudasa ibunaga wai biagane mana ogobi hene. Ibugua tano ngaruha abale anda puwa anda bu karu abale bo heda haga hene.
7 Ibugua wai ogonidagua mbiraga bulene hame lo haga hene. Tano hongohe wai pabeanda bayale ngago ibu abale anda puwa karulai halu waitigi bu karu bo taliatogo laga hene.
Nigano ibugua Yudasala wai binigo ogo
(1 Magabi 3.38-41)
8 Ai Pilibi ibugua Yudasahanda wai hongo howa bialu haabo heago hondowa ibugua beba mbira gili buwa Koelesiria dindinagabi Ponisia dindinagabi gabumane agali haguane mini Tolemi hearia yalu pu lene. Ibugua Tolemihondo ibu biamogo bialu kininaga gabumane biabe mo hongo holene nga lalu lo pelene.
9 Ani layago hale howa Tolemi ibugua ami agali dewaore dindi tara taraha howa íbu hene bu hearu olo ngoai howa mo mogo bialu daosini dege pira kira (20,000) bibahende haru Padorogolusu igini Nigano ibu Kininaga Nenege Dunini laga hearu aria henego ibugua haru halu pole ibabe lene. Tigua wali agali Yudiaha bu karu bibahende bo amolo wahai halimu lene. Ibugua agali mende mini Yosiasa heagobi libu haru mandagi pudaba lalu dabo pelene. Yosiasa ogoni ibu wainaga mana manda biaihe pari wayali gibi mbira henego ogoni pudaba lene.
10 Nigano ibu kinihanda muni siliba daosini dege pira waragariani duria (65,000) Lomo dagisi mulebere layago hole howa ibu Yuda wali agali garabaya hearu garabaya biabe ale bia halu haga helo pelalu muni ogoni ibu tubagi hayago mulene hame lene.
11 Ani howa ibugua tano iba solowara bereago ange ange wima peagoha wali agali bu hearuhondo beba gilibu pelaga buwa lalu, Tígua Yuda wali agali garabaya karu maru tinaga garabaya biabe ale bialu helo yolo buleyagua nde ibugua wai bialu bope holeberogo tí maru yolo bilimulo, lalu lo pelene. Ibugua tihondo lo wia halu lalu, Heneneore larogo. Tígua garabaya agali tebira siliba muni genda magi kilogarama mbiraore hangume yolo buleberemi, lene. Ibugua anidagua la layago ai Ngode Datagaliwabe Bibahende Hongo Haiheore kagome ibugua mana ko dewaore bialu hayagonaga pani nelo mule kago manda nabi howa lalu hene.
Niganonaga miniha o heago Yudasa ibugua handa walia henego ogo
(1 Magabi 3.42-54)
12 Yudasa ibugua Nigano halu ibunaga ami agaliru wai kaware anda ibira laya hale howa ibu damene bu hearuha bi abale purogo lelene.
13 Ani hale howa agali maru gihe hearubi maru Ngode Datagaliwabehondo mini mbiraore nawiaga hearubi bibahende ibida piai hene.
14 Anigo agali maru elahe hadai biyaru tigua agalime tinaga mbirale wiaru munime yolo biyaru bilo hondo hene. Ani howa tigua Anduane Homogohondo bi lalu Yuda maru bamba wai nabi howa Nigano ibugua garabaya biabe ale biago helonaga muni taguigi binigo lone haru dai bilonaga bi hongo howa lalu hene.
15 Tigua Anduane Homogohondo bi lalu, Ainde ibugua mana bayale tigua bialu kago mitangi nabuleyagua nde habo nalolene bi bamba tinaga mamaliru baba lo wini ngago mitangi bibe, lalu bi lalu hene. Ibunime Isaraele wali agali ibunaga wali agaliore helo dabo helenego manda bialu ani bibe lowa bi lalu hene.
16 Ani bialu Yudasahanda ibunaga ami agali daosini waragaria (6,000) hearu mo mogo bu helene. Ani helowa ibugua tinaga miniha mo hongo halu lalu, Agali Ngode Datagaliwabe kago manda nabiaga bu karume ti baba wai bule dewaore tidi yu ibalu bame wai dege bule ibirago de hondowa gi nahalimu, lalu lamiai hene. Wai hongo howa biadai bilimu, lalu lamini.
17 Agali tara Anduane Homogo mitangi nahaga urunime ibunaga anda kago mebia halu mo dodohe heledago mitangi buwa halimu. Waitigi tigua genda dewa ina mamali heneruhondo mo mialu hene ngarubi manda bilimu.
18 Ani lowa Yudasahanda tihondo lamialu lalu, Waitigi agali tigua wai biaga danda timu yandare humbi yidaru mo dunubia howa uruniha hana halu wai bulene mana manda bu kago mo galone haga ka ndobe. Anigo iname Ngode Datagaliwabe ibu Bibahende Hongo Haiheore kagohondo mini mbiraore wiaga kema. Ai Anduane Homogo ibugua waitigi uruni ayu ogoni ina baba wai bule wene harigani ibalu kaore bo wahai hoa biyagua nde bo wahai halu waitigi dindi bibahendeha bu karu bibahendeore bo wahai hoa biyagua nde bo wahai dege holebira, lene.
19 Ani bialu Anduane Homogohanda tinaga mamaliru biamogo bini wiaru te lalu hene. Ai agali mini Senageribi heangi Ngode Datagaliwabehanda waitigi daosini dege pira halirani duria (85,000) bibahende bo wahai hene.
20 Ai ti Babilononi heangi howa Yuda agali daosini halira (8,000) halu Masedonia agali daosini maria (4,000) hangu howa tigua Galesia bope halu dabu dabu bayale tara tara wiaru ti mo yai hene. Horo ogoningi Galesiame Masedonia baba wai bule tano wiago ho hagira bini. Ani bialu hearia Yuda ami agali daosini halira (8,000) uruni tigua ibalu wai biyagola Ngode Datagaliwabehanda ti biamogo biyagola tigua Galesia ami agali daosini dege handari mbirani pira kira (120,000) bibahende bo wahai hene.
Yudasahanda Nigano bope henego ogo
(1 Magabi 3.55–4.27)
21 Bi Yudasahanda layagome ami agali biarunaga miniha mo hongo hayagola tigua hongo ho howa tinaga lotu mananagabi tinaga dindinagabi wai bia halu homole manda manda bu hai hene. Ani heagola Yudasa ibugua ami agali biaru mahalu mo talebu helowa
22 ibu hamene Saimonohanda ami agali halu mbira heago haru halu Yosebehanda halu mende heago haru halu Saimono Yonadanahanda halu tebone heago haru halu buwa ti mbira mbirame daosini mbirani handari duria (1,500) dege dege haru haga haga bini.
23 Ani howa Yudasahanda Eleasahondo, Bi mbira Ngode Datagaliwabenaga mbugaha gilibu wini wiago heyu howa hongo howa ladaga halu dagala, lene. Eleasahanda mbugahabi ogoni daga lai heagola Yudasahanda lalu, Ngode Datagaliwabe í̠nime ina biamogo bibe, lene. Ani lalu wai porabupe halu wai bini. Yudasa ibunime ami agali halu mbira heago haru halu pora bialu Niganola wai bini.
24 Ani bialu heagola Ngode Datagaliwabehanda Yuda ti biamogo biyagola tinaga waitigi agali daosini dira (9,000) bibahende horo ogoningi bo wahai hene. Tigua Niganonaga ami agali dewa biaru balu bo haealatago lalu dibu gombedapaya bialu bama talima piaho wini.
25 Ani bialu agali maru muni yalu Isaraele wali agali garabaya biabe ale bia haga helo munime yolo bule muni yalu ibiyaru Yuda ami agali biaru ti mo yai hene. Ainde tigua waitigi agali biaru luore ha bama talima piaho winigo alendo hayagola
26 yawi Sabada horo ngago manda buwa Sabadani wai bulene nawigo manda bialu ai wahalu dai bule manda bini.
27 Ani buwa tigua waitigi bo wahayarunaga wai biaganeale wahene wiaru mo mogo bu wiai halu dabudabu tara tara henearu taguiai halu buwa mani Sabada horonaga lotu lene. Tigua lotu lalu howa Ngode Datagaliwabehanda ti lone dara halu baya hangu handaya ho hayagonaga tigua turu timbuniore howa Anduane Homogonaga mini yaraga halu hene.
28 Sabada horo piai hayagola tigua dabudabu mo yayaruni baya hangu mo tale bigi bialu maru agali tandaga timbuni nalu wiaru mialu maru wali ti agalini homene dalo berearu mialu maru waneigini aba ai̱ya homene bu hearu talebu mialu bini. Ani bialu maru ami agali tini talebu ta hene.
29 Ani bialu mani lone mo ngoai howa tigua Anduane Homogohondo bi lalu, Wali agali í̠naga biabe bia haga karu dara halu biamogo bibe, lene.
Yudasahanda wai bialu Timodila Bagidesela bope henego te ogo
30 Yuda ami agali biarume Timodinaga ami agalibi Bagidesenaga ami agali hearubi ti baba wai bialu Yuda ami tigua waitigi daosini dege pira kira (20,000) agima bolangua howa bo wahai hene. Ani bialu tigua wai pabeanda hongohe wai pabe daligaore bu mabubi wiaru bo poda anda hai halu ti karulai hene. Ani karulowa tano uruniha dabudabu bayale wiaru mo yai howa tale bialu maru wali dalo berearu mialu maru wai timu howa tandaga nalu wiaru mialu maru wali agali waheale andaga berearu mialu bini.
31 Ani bialu tigua waitiginaga danda timu yandare wai humbi ayu tiburu wai hamaha mo yayaru baya hangu mo do hai hene. Ani bialu dabudabu maru ibira hene wiaru Yarusaleme yu dai bini.
32 Wai biyagoha Timodinaga ami agali haru haga agali haguane mbira bo wahalu bini. Agali ogoni ibu koore mbira howa ibugua Yuda wali agali genda timbuni mo mialu haga henego homene.
33 Ai Yuda ti Yarusaleme dai bu howa tigua waitigi bope hayagonaga turu timbuniore halu howa agali maru te Anduane Homogonaga anda panga heago irame heda haga agali hearu tini irani bo delai hene. Ani bialu agali mbira mini Kalisenese anda tamuha birado hearia handa walia howa ogonibi irani bo delalu bini. Anidagua biyagome ko ibuni bialu hayago karulape pani o nayadagoni.
34 Anduane Homogohanda Yuda wali agali biamogo biyagola tigua Niganola wai bialu tigua Nigano bope halu ti wayali haya. Nigano ogoni ibu agali koore howa ibugua agali biyinaya biaga daosini mbira (1,000) agima Yuda wali agali garabaya biabe ale biaga helo munime yolo bule muni hanalu ibiyaru haru ibaga henego ogoni bope hene.
35 Yuda agali maru Niganohanda bamba ti mo ko hayaru tigua beregedalu Nigano ibuni mo ko hene. Niganohanda ibunaga wai pole karu lagane aga karu learu golo wahalu ibuni hangu ibida pu tara halu agali mbira garabaya biabe bialu haga ibida puwa birado haradagua pialu bira do hene. Ibugua irabuha dege puabo halu Andiogo tano tagira pene. Ibunime biako hearia ibunaga ami agali biaru bibahende amo lai hene.
36 Ainde Niganohanda Yarusaleme wali agali minalu muni muwa muni ogoni Lomo gabumane dagisi mule manda buwa ai nde ibugua Yuda baba wai bule pene. Ani pialu hearia ibuni bope hayagome Yuda ti biamogo biaga hongo gibihe mbira ka lalu tigatiga mo walia haya. Ainde Yuda wali agali ti bi mana Ngode Datagaliwabe ibunime minigo yu haabo haga kagome waitigi tara tara padarume ibalu Yuda baba wai bialu bope habe nahe holebira.