26
Wali agali tigabi karume bi lolenego ogo
1 Anduane Homogo-o i̱na í̠hondo mini mbiraore wu haabo howa
mana tigabi hangu bialu harugo
í̠na i̱ bayale ka labe.
2 Anduane Homogo-o i̱na bialu haga ngoru
í̠na bibahendeni howa i̱ ba handabe.
I̱naga bu minibi baya hangu dabo handaga bigi bibe.
3 Í̠naga dara halu gubalini holeneme i̱ handayaho haga kegoni.
Í̠ mini bilinahe kegome
i̱ poleberogoha pu bamba halu í̠na i̱ yu wahalu napiaga kegoni.
4 I̱ agali ko biaga karu heba naharuli.
Agali tombene hondokihe karu baba i̱ nenege nahaga kogoni.
5 I̱ agali mini kowi karu baba ibaga bibe manga howa
mana ko biaga karu helalu habagi ho haruli.
6 Anduane Homogo-o i̱ha ko mbira nawiore kogo walia halu
i̱na i̱naga gi wayawaya bo waharogoni.
I̱ í̠naga lomabu delaga dabu bu kagoria pu mabu bialu howa
i̱na í̠ mitangi bialu lotu lalu kogoni.
7 I̱na anidagua bialu howa
í̠hondo ka̱i̱ lalu iba ganaru larogoni.
Í̠na mbirale bayale bialu hariruni
wali agali bibahendeme hale helo i̱na lamiai harogoni.
8 Anduane Homogo-o í̠naga anda í̠ni kegoha kago i̱ hame timbuni ledo.
Í̠ mini timbunibi wá holenebi haabohe ngagoria kego
i̱naga gubalinime hame timbuni lo kogoni.
9 Mana ko biaga karu heba í̠na i̱ bo wanahabe.
Mendeali homelo bo wahaga karu í̠na ti bo waharengi
i̱ ti heba homoliya ba nabi helabe.
10 Uruni tigua mana ko ngubiore ngaru biaabo haga kagoni.
Tigua wali agali bayale kago mo ko halu
agali tara karume bame bo wahelo
ohowa muni hana haga kagoni.
11 Anigoyu i̱nime mana bayaleore ngaru taluwa bialu haga kogonigo
í̠na i̱ dara howa biamogo bialu haru dai bibe.
12 I̱ mana tigabi yani ho howa hongoheore haga kogo
mbirale mbirame i̱ mo ko habe nahe.
Wali agali Anduane Homogo mitangi bialu lotu lole ngoaiho bedagoria howa
i̱na ibunaga mini yaraga halu holebero.