71
Agali waheme bi lenego ogo
1 Anduane Homogo-o i̱ í̠la mandagi haabo kogola
waitigi karume i̱ mo ko habe nahe ko.
Tigua i̱ bope halu wayali helo yupe nahabe.
2 Í̠ tigabiore kegonigo
i̱ waitigirunaga giha koria pele ngialu haru dai bibe.
I̱na bi larogo hale halu i̱ pele ngibe.
3 I̱naga wai pabe hongohe alebi anda hongohe alebi í̠ habe.
I̱ ibida pialu í̠ha dege ha do hole eberogola handayaho habe.
Í̠nime dege i̱ baya hangu handayaho kegola i̱ bayale holebero.
4 I̱naga Ngode Datagaliwabe-o agali mini kowi karunaga giha koria
i̱ haru dai bibe.
Agali hongoheore tara howa mana koorene ko ngago biaga karunaga giha kogola pele ngibe.
5 Anduane Homogo Bibahende Haru Hame Ho Haga-o
i̱ í̠ha mini dunubia ho kogoni.
I̱na igiri daliaheni howa í̠hondo mini mbiraore wu henego kogoni.
6 Bibahendengi i̱na í̠ha hanaho harugo kogoni.
I̱ ai̱yahanda taba hanayangi howa í̠na i̱ handayaho haabo harigoni.
Ani harigonaga i̱na í̠naga mini yaraga halu haabo holebero.
7 Wali agali bu hearu dewalime i̱ de hondowabi
í̠na i̱hondo biriru hondowabi
í̠na i̱ hongo howaore handayaho kagonida lomanda biai ho ka.
8 Horo bibahendengi i̱na wali agali bu karu hendelo í̠naga mini yaraga halu
í̠ mini leneore kegoni latagi halu haabo haruli.
9 Áyu i̱ agali waheore howa hongo hodai bule ndo biru ngogo
í̠na i̱ erembira ngialu yu waholeni nahabe laro.
10 I̱ waitigi bu hearu tigua i̱ bo waholenaga
mo mogobu howa ndelalu kagoni.
11 Tigua lalu, Ngode Datagaliwabehanda agali ogoni yu wahayadago abale minami̱ya.
Ibu biamogo bulene mbira naheoredago
iname abale talima pugupugu bialu minu yania hami̱ya,
laga bialu kagoni.
12 Ngode Datagaliwabe-o i̱ hangu helalu í̠ kaundia nahabe.
I̱naga Ngode Datagaliwabe-o í̠na i̱ biamogo bule abale ibabe.
13 Agali i̱hondo bi laedede bialu karuni
í̠nime ti bope halu ereba hai helabe.
Tigua i̱ mo ko hole wai hanalu kago
ai tini taga helo mo ko hai halu mo luluya ho helabe.
14 Anigo í̠na i̱ biamogo bibelonaga í̠hondo mini dunubia ho kogoni.
I̱na í̠naga mini yaragaore haabo holebero.
15 Í̠na mana tigabi bigi biriruni wali agali bu karu lamialu holebero.
Í̠na pele ngialu haru dai biriruninaga tene i̱ manda biai nahego
nde harugo lowa te ogoni horo bibahendengi tihondo lamiaabo holebero.
16 Anduane Homogo Ngode Datagaliwabe kego í̠ hongo timbuniore kegonaga
i̱na í̠naga mini yaraga halu holebero.
Í̠ni hangu mana bayale tigabiore biaga kego lalu
i̱na latagi halu holebero.
17 Ngode Datagaliwabe-o i̱ bamba igiri emeneni hewangi
í̠na i̱ lawai haabo hariligoni.
Áyubi nde í̠na mbirale bayale tara tara bererunaga
i̱na latagi halu haabo kogoni.
18 Ainde i̱ agali waheore halu i̱naga mandariru daguame be duguame haradagua biyadago
Ngode Datagaliwabe-o í̠na i̱ yu wanahabe laro.
I̱na wali agali mani holobadaruhondo í̠naga hongo timbuni ogobiore ka lalu lamigi buliya
í̠ni i̱la haabo habe.
19 Ngode Datagaliwabe-o í̠na mana bayale tigabi biriruni
wali agali bibahendenaga deni panigi wiai ka.
Í̠na biabe hongohe timbuniore bini ngegoni ndobe.
Agali dindini hene karu í̠ ale mbira nahe
í̠ni hangu bolangua haiheore kegoni.
20 Í̠na i̱ha genda tandagabi tara tara ibilaga birigoni.
Í̠nime i̱ lone mo hongo holebere lo manda bu kogoni.
I̱ homaliha ngoria í̠nime i̱ lone mo heya holebere.
21 Í̠na i̱ mini lene winigo mo yaragaore ho ngelalu
i̱naga bu miniha mo palia holebere.
22 I̱naga Ngode Datagaliwabe-o í̠naga mini bilinahe haabo kegonaga
i̱na ngida ale balu í̠naga mini yaraga halu iba gana lolebero.
Isaraele wali agalinaga Ngode Datagaliwabe baya buruguleore kego
i̱na ngida ale balu í̠naga mini yaraga halu iba ganaru lalu holebero.
23 I̱na lalu howa turu timbuniore halu bi hongo howa ladaga holebero.
Í̠na i̱ pele ngialu mo wirigonaga
i̱na ne hariga hangume ndo
i̱naga minimebi gubalinimebi í̠hondo iba gana lalu latagi holebero.
24 Agalime i̱ mo ko hole wai hanalu henego
ai tini ko halu mo taga hai hayagonaga
i̱na horo bibahendengi í̠naga mana bayale tigabi biaga kego lalu
wali agali bu karuhondo lamiai holebero.