43
Ngode Datagaliwabehanda ni wabinigo ogo
1 Hari daligaha wá hongohe wáleoreme bibahende wá hame kagola yari baya taraore hondoabi ngaligobi nga.
2 Nime egerebagi harini tagira iba lu ibugua Anduane Homogohanda biabe baya taraore binidaru ibunaga wá baya taraore kagome latagi hagane.
3 Ni ibu ibalu lina hanuni howa dindini ngaru baya hangu yo biai halu ibunaga hongome ira deneale ngagome wali agalinaga tingini daga ka.
4 Agalime ira daga ngagoha ira dedago pu lalu karia iranaga hongo poboyago biragome walia harago handaga. Anigo ni ibunaga hongo timbuniore hari ngaru dope haga ka ndobe. Ni ibunaga hongo gibiore ngago wali agali kagoha ba amunana biragome wali agalinaga de baiore helaga ka.
5 Heneneore Anduane Homogo ibuni ni wabiaga howa ibu timbuni daligaore ka. Ainde ni ibugua Anduane Homogonaga bi ledago talialu gerai lalu ibunaga piaga hariga ngagoria abale bolangua halu piaga ka.
Ngode Datagaliwabehanda ege wabinigo ogo
6 Ege ibubi nde ibu tagira ibulene horo ngangi baya hangu talialu ege mbira mbira tagira ibugu bulene hengebi mali mbira mbira tagira ibilonaga henge wulenebi
7 Ngode Datagaliwabehondo bi lolene horo timbuni ngaru tagira ibilo henge wialubi ibunaga ani haga biaga ka. Egenaga wá hatimbu hama pialu mani lone emene hama dai biaga.
8 Ege li hari daligani kagome dege malinaga egebi daga lagane nga. Anigo hari daligaha howa mo emene ha mo timbuni ha bialu nahendene taraore uruni ibunime dege biagaya. Ibugua dahuliyali bu karunaga wá hadai biaga ka. Ibugua hari daligaore howa wali agali mbiraga ibagabu karuhondo wá hadali hagane ka.
Ngode Datagaliwabehanda yakundiru nidomoru wabu helenego ogo
9 Yakundinaga wá haragome hari daligaha mo yaribia halu baya taraore ngelalu Anduane Homogonaga dahuliya anda mo yaribia haga nga.
10 Ngode Datagaliwabe ibugua bi layadagua yakundi ti tini habe lenedagoriaore haga ka. Tigua de handaya ho holene manga nahaga ka.
11 Ai nidomo harini kago de handalu Anduane Homogonaga mini yaraga holene nga. Irane Anduane Homogo ibunime yari tara tarame ibu kau wabaga bialu de daibi baya tara mbira ka.
12 Anduane Homogohanda hari daliga mo yaribia holenaga mbirale mabubi yari baya tara mbira wabini ka.
Ngode Datagaliwabehanda tara tara timbuni maru wabinigo ogo
13 Anduane Homogohanda bi laragola dindiguni hariha howa ibira haga ka. Ani bialu ibunaga miniha tandaga ho kago walia halu hari daba abale wigiwaga lalu ibilaga.
14 Ani bialu dahuliya andaga timbuni kago panga dugupe haragola hari beraliba dewaore tagira pialu ega poradagua pugu pugu bialu purogo lagane nga.
15 Ibuninaga hongo timbuniore ngagome hari beraliba karuni mo mogobu ngelowa mo dindiguni haga ka. Ani buwa mani minu ngirulo baga buwa dindiha ba amunana bialu ibilaga ka.
16 Tigua handalu karia Anduane Homogo ibiyagua hari timbuni wedago ibu mogo lowa duru lalu hagane ka. Ani bialu ibugua bia larago hale halu puyabu dindi abene unuraha yagi howa abale pu lo yalu piaga ka.
17 Ibunaga ne harigaha howa bi hongo howa kulu kala lalu latagi haragola dindi ngago ibu mogo lowa duru lalu ngagola dindi uyuraha yagi howa puyabu heba puyabu tara humbirini wai ale heba ibalu biaga.
18 Ainde ibugua ega yagaloyu ibiradagua bilalubi pagaya dindini ibira haradagua bilalubi dindini dalu dindiguni ibilaga ka. wali agalime handalu karia dindiguni ngago bayaleorebi dendebiorebi ngago hondowa ti turu ho kagola dindi guni ibu daligaha howa hendoreore ibira haga biaga nga.
19 Egerebagi handalu keria dindiguni ogoni ibu tara mbira ti tande ibi mbaule gewa ani alebi ngaria handaga.
20 Ibugua dindi abene uyuraha yagi howa puyabu dagarebi ibilalu iba bedago mo dindiguni helaga nga. Ani bidagola iba biaru dindigunime dambi hai ho ngagola handape halu keria iba ibu wai polenaga wai humbi yidabe toba holebere.
21 Anduane Homogonaga hongome hari dalu dindi ko iba dalu naibaga ngaru dai halu datani emene bu karu dalu do aulai helaga nga.
22 Ani bialu mani howa iba dalume mbirale uruni mo karulape hai halu pibiya ibira haragome datani bayale anda helagane.
23 Anduane Homogo ibunaga hongome iba solowara bedagonaga hongo minu podalu iba hanuni dindi emeneru wupe helo ibugua hangaga bida.
24 Agali iba sibi ngagoria iba solowara bedagoha pugu bini hearume iba solowaraha mbirale kooreru nga laga biyagola ina mini dege dindiho haramali.
25 Tigua lalu iba solowara ngagoha mbirale taraale dewaore beda laya. Iba wena timbuni tararu puya timbuni taraorerubi nga laya.
26 Anduane Homogo ibunime tihondo tininaga biabe bilo hongo miyagola ti karulape bayale ibagabu ka. Ibugua bi laragome bibahende tigabi hai ka.
27 Ainde iname te luore lalu holene ngagonigo ainde iname te ogoni lai habe naheoreda. Ai wahalu mo tubagi howa ogodagua lama. Anduane Homogo ibu bibahende karubi ngarubi uruninaga tene ibuni ka.
28 Ibu mbirale ibunime wabiniru bibahendeore bolangua haihe kago ainde ibunaga mini yaraga holene inanaga hongo karulape kemadalo manda bidemabe.
29 Anduane Homogo ibu daligaore kagola bibahendeme ibuhondo gi hai haga ka ndobe. Ibunaga hongo timbuni gibiore nga ndobe.
30 Tigua ibunaga mini yaraga halu howa ibu daligaore kago manda bialu ibuhondo mo turu howa bi ngago laga bilimu. Anduane Homogonaga mini yaraga holenaga tínaga hongo bibahende bibaoare halimu. Tígua ibuhondo mo turu halu bi larimigo nakarulapego ainde tígua ibunaga mini yaraga holene manga nahe yaraga haabo halu halimu.
31 Anduane Homogohanda biaga ngago baya hangu latagi hai hole Anduane Homogo de hendene mbirali ai kabe. Anduane Homogonaga mini yaraga holene manda ogodagua karulape lalu hondo manda bi mbirali ai kabe.
32 Heneneore Anduane Homogonaga biabe bini maru de handarimaga ainde maru wiado karu ina handa nabi kemagoni ndobe.
33 Ainde mbirale bibahende Anduane Homogo ibunime wabiai howa wali agali bayale tigabi biaga bu karuhondo manda bayaleru talebu tahalu miai haya.
Wali agali bamba heneyarume mana bayaleru bialu hene
(Be 44.1–50.26)