2 Timodi
Polohanda Timodihondo beba mende ogo gilibu wia hene
Mbuga ogoha gilibu ngarunaga nemandi ogo
Polohanda Timodihondo beba mende ogo gilibu wia henedagoni Timodi ibu igiri daliahe howa bayale bialu holene mana manda bilo gilibu wia hene.
Bi haguane duniniore lenego, Ema nabi howa hibu lalu bialu holene nga, lalu lamini. Polohanda Timodihondo lalu, Tandaga nolene wiragolabi marume í̠hondo handabe manga haragolabi ogonidagua biragola Yasu Kerisohondo mini mbiraore wu harigoni hongo ho howa Yasu Kerisonaga Bi Mana Debene ngagobi Ngode Datagaliwabenaga Habo Nalolene Bi Bamba lowini ngagobi uruni yu dunu bia ho howa loyogo lama ibaga bialu haabo habe, lalu lamini.
Polohanda Timodihondo lalu, Wali agalime mini nawi lulu ale howa lai lalu karuni hale howa minime mo pe hararu koorene ko haga ngago ti kagoria nahe í̠ habagi howa haluni habe, lalu bi hongo howa lawia hene.
Polohanda lamaro bialu lalu, I̱na mana lawai haruligobi biabe bialu haruligobi haabo holene mo tene haruligobi mini mbiraore wu kogobi ema nabi haabo haruligobi maruhondo gubalini haruligobi ko ngagola hibu lalu haruligobi marume i̱hondo ko biragola tandaga naruligobi uruni bibahende í̠ manda biai kegoni, lalu Timodi mo mitangi bia halu howa, Í̠na ogonidagua bialu holene nga, lalu lamini.
Bu̱lu̱ baga buwa kuni gilibu ngago
1.1-2
Polohanda bi ala lenego 1.3–2.13
Ka̱i̱ lenegobi ogodagua bialu habe lenegobi 2.14–4.5
Mana ko bayalela dabolenebi mamage ho holenebi 4.6-18
Polo ibu biabe bialu henegoha ibuhondo binigo 4.19-22
Lamaro bialu lenego
1
1 I̱ Polo Ngode Datagaliwabe ibuninaga hame leagome Keriso Yasunaga abosolo kogoni. Iname Keriso Yasuha howa holene gahenge yu holoma̱ya Ngode Datagaliwabehanda ala ngulebero lowinigo holene ogoni ibugua, Í̠na lamule pu, laya.
2 Timodi i̱ iginiore-o beba ogo í̠hondo gilibu wia haro. Aba Ngode Datagaliwabebi inanaga Anduane Homogo Keriso Yasubi libugua biamogo bia holenebi dara holenebi mo palia holenebi í̠hondo ngilo hamelo ko.
Bi Mana Debene mitangi bialu taga holene nawigo ogo
3 I̱na Ngode Datagaliwabehondo ka̱i̱ laro. I̱naga mamalime miniha ko do nahe howa Ngode Datagaliwabenaga biabe bialu henedagua i̱nabi ani bialu ko. Horombe mbiragabi ta nabi Ngode Datagaliwabehondo bi lalu howa í̠ mitangi biaabo halu ibuhondo ka̱i̱ laruli.
4 Í̠naga de iba ibiyago mitangi bialu turu holene i̱ha to̱lai helo í̠ lone de hondoa ho ko.
5 Í̠na Ngode Datagaliwabehondo mini mbiraore wirigoni heneneore wu haabo kego i̱na manda bu kogoni. Í̠ aguane Loisi í̠ ai̱ya Yunisila libugua Ngode Datagaliwabehondo mini mbiraore winidagua í̠nabi ani dege wu ke manda bu ko.
6 Irane ogonigo i̱naga gi í̠naga haguaneni wirugola Ngode Datagaliwabehanda mugube ngiyago anda helo ira hungu biagadagua mo hungu biahole mitangi bialu habe.
7 Ngode Datagaliwabehanda inahondo ibu Dinini ngiyago ibugua ina yurigihe holoma̱ya helaga ndo ka. Ibu Dinini ogoni ibugua hongo holenebi gubalini holenebi mini haru holenebi inaha to̱lai helo ngiaga ka.
8 Ogonigo inanaga Anduane Homogonaga mana walia hole í̠na taga nahe habe. I̱ Anduane Homogonaga garabaya agali kogo mitangi bialu í̠ taga nahe habe. Taga nahe howa Ngode Datagaliwabehanda hongo holene ngiradagua Bi Mana Debene lamulenenaga tandaga nolene ngagobi nalu habe.
9 Ngode Datagaliwabehanda ina pele ngialu ibunaga wali agali holoma̱ya ibugua ina olene. Ani binigo irane iname bayale birimagonaga ndo Ngode Datagaliwabe ibuninaga hame lolenemebi biamogo bia holenemebi ani bini. Bamba Ngode Datagaliwabehanda dindi wa nabi howa Keriso Yasuha howa ibunaga biamogo bia holene ogoni ngule lowini.
10 Mani inanaga Pele Ngiaga Keriso Yasu ibuni hapani hayangi howa ibugua biamogo bia holene ogoni inahondo walia hene. Keriso ibugua homolenenaga hongo tongolo wahowa bi mana debeneha howa haabobo holene walia hene.
11 I̱ Bi Mana Debene lamulene abosolobi lawai hagabi holiya Ngode Datagaliwabehanda dabo helene kogoni.
12 Anigo i̱ tandaga nalu kogo irane ogoninaga nalu ko. Ani bidogo taga nahe mini bilinahe howa i̱na ibuhondo mini mbiraore wirugo wu howa Ngode Datagaliwabehanda Horo Mbira pongo bo wini ngago lola helo ibugua mbirale i̱ha wia do hayago bayale wiaabo helo hondo holebirago yu tiga bidogoni.
13 I̱na í̠hondo bi mana tigatiga lawai harudagua biaabo hole hongo howa yu habe. Ani yu howa Keriso Yasuha ho gimbu bu howa mini mbiraore wulenebi gubalini holenebi inanaga ngago ogoniha howa haabo habe.
14 Ngode Datagaliwabe Dinini inaha kago ibunaga hongome í̠hondo mbirale bayale ngiyaru yu habe.
15 Pigelasa Hemoyanesila Esiali howa libu heba wali agali ogoniha hearu bibahendeme i̱ wahalu piai hayago í̠ manda bu kegoni.
16 Onesiborasa ibugua i̱ mo turu haabo hayago ibubi ibu damenerubi ti Anduane Homogohanda dara howa biamogo bilo hamelo ko. I̱ garabaya hewaria ibugua taga nahe howa
17 Lomo tanoni anda ibalu ibugua i̱ handa walia hole lowa hai biaabo haya.
18 Horo Mbira pongo bo wini ngago lola harangi Anduane Homogohanda ibuhondo dara howa biamogo bulene milo hamelo ko. Ebesa tanoni hewaria ibugua i̱ biamogo biaabo hayago í̠ manda bu kegoni.