8
Na Jesús, ni kawintsíxil ban ít lejkintaláb
1 Xowaꞌ xi más uluts xi xoꞌ in kʼwajat u tʼilál, jaꞌich abal ni lej okʼlek páleꞌil anchanꞌ Jaꞌ ani buxkanék bin eját nin tʼokat kʼwajtalábil na Dios túꞌ walkʼiꞌ.
2 Kʼwajat ti lej okʼlek páleꞌ bin lej tʼokat altájil na Dios, xi tʼajadh kʼal an Okʼóxláb ani yab kʼal i iniktsik.
3 Ejtal an okʼlek páleꞌtsik u bijyáb abal kin kʼwajbaꞌ i chʼejwalixtaláb ani i pikbantsixtaláb; jaxtám na Jesukristo, yejat jeye kin kóꞌoy xataꞌ xowaꞌ kin pikbaꞌ.
4 Max Jajáꞌ techéꞌak kʼwajat chabál, nibalak elaꞌ u páleꞌ; abal techéꞌ, bél waꞌach i páleꞌtsik xin pidhnál i pikbantsixtaláb jelt xan tin ulal an takʼixtaláb xin jilám dhutsadh na Moisés.
5 Por jechéꞌ an páleꞌtsik, kʼwajat ti tʼójontsix kʼal xowaꞌ xi jelt in chʼilábil ani in chalám xowaꞌ waꞌach túꞌ walkʼiꞌ. I choꞌób abal i chʼilabkʼi, pos tam ti na Moisés neꞌchich kin tʼajtsi tin tʼokat altájil na Dios, utsan enchéꞌ kʼal na Dios: “Ka chuꞌu alwaꞌ ani ka tʼajaꞌ anchanꞌ jelt xan tu óltsi túꞌ ban chʼén.”
6 Por ni lej okʼlek páleꞌil in bajúmal ka kʼwajay ti kontsintsix ba jun i tʼójontsixtaláb xi más alwaꞌ, pos Jajáꞌ kʼwajat ti kawintsix ba jun i lejkintaláb xi más alwaꞌ, xi káldhats ban chalabtsik xi más alwaꞌ.
7 Abal max an jidhtal lejkintaláb yabichak xataꞌ in kʼibdhál, yabichak yéntsidh ít i lejkintaláb.
8 Por na Dios in chuꞌu abal yab kʼwajat alwaꞌ jachanꞌ an atiklábtsik, jelt xan tin ulu enchéꞌ ban Tʼokat Dhuslab kʼal jajáꞌtsik tin kwenta:
Neꞌech kin bajaw i kʼijtsik
xowkʼi neꞌech ku tʼajaꞌ ít i lejkintaláb kʼal an atiklábtsik xi Israel ani xi Judá.
9 Yab jelti an lejkintaláb xu tʼajámal kʼal nin wejeꞌ pakéliltsik
tam tu lotʼokʼnaꞌtsik abal ku káldhaꞌ ban chabál xi Ejipto;
pos in chʼikat tʼajaꞌtsik jachanꞌ an lejkintaláb
ani jaxtám tu walbaꞌtsik, enchéꞌ tin ulu an Okʼóxláb.
10 An lejkintaláb xi neꞌech ku tʼajaꞌ kʼal an atiklábtsik xi Israel tam ka watʼéch jachanꞌ an kʼijtsik, enchéꞌ ti neꞌech ka tʼájan, in ulu an Okʼóxláb:
Neꞌech ku kʼwajbaꞌ nu takʼixtal ba jajáꞌtsik nin chalab
ani neꞌech ku dhutsaꞌ bin itsích.
Nanáꞌich tám tin Diosiltsik,
ani jajáꞌtsik jaꞌchich tám nu bitsówil.
11 Ni jun xitaꞌ yab yejat kin okʼtsi xataꞌ xi kʼeꞌet;
nibal nin junik, nibal nin kidháb abal kin exlaꞌ an Okʼóxláb,
pos ejtal neꞌech ti kin exlaꞌtsik,
asta xi más chipíl ani asta xi más púlek xi jajáꞌtsik.
12 Neꞌech ku pakwlantsi xowaꞌ yab alwaꞌ in tʼajámaltsik
ani yab jaykʼi neꞌech kin witsiy ku chalpay nin walastalábiltsik.
13 Tam na Dios in tʼilál jun i ít lejkintaláb, jaꞌich abal in ulalich ke kʼejméch xi jidhtal an lejkintaláb. Ani xi ka kʼejméch ani yabich xataꞌ ti alwaꞌ, kʼunatich i kʼij neꞌech ka wixkʼá.