4
1 Jusiñamui dɨbeimo raise caɨ illamona, Jusiñamui caɨ comecɨaɨ birui uri illana jitaide. Naimɨe lloga uai nia saiñede. Caɨmona damɨerie iese iñellesa, caɨ jaiagaɨ isoi caɨ iñellena, abɨna rairuicana mai caɨ jailla.
2 Jusiñamuidɨ comɨnɨ comecɨaɨ uri illana jitaide. Caɨ jaiagaɨmo iena llote. Dɨga icaiño naie mare rafuena cacadɨmacɨ; iadedɨ iena naimacɨ ɨɨnoñena jira, iemona buena oñedɨmacɨ.
3 Jusiñamuidɨ caɨ comecɨaɨ uri illana birui caɨmo jai llote. Cristo ie mare rafuena jai cacadɨcaɨ. Naimɨe uaina caɨ ɨɨnua jira, caɨ comecɨaɨ jai uri ite. Caɨ jaiagaɨ comecɨaɨ uri iñede. Moisés mɨcorɨ cuiamona iena uiñotɨcaɨ. Cuega:
Naimacɨ dɨga Jusiñamui icɨrilla jira, naimacɨmo lloga enɨruemo jaiñedɨmacɨ
Comecɨaɨ uri illana jaca uiñoñedɨmacɨ
cuega. Jusiñamuidɨ nana comɨnɨ comecɨaɨ uri illana jitaide. Enɨruena naimɨe fɨnocamo, comɨnɨ comecɨaɨ uri illana jitaide.
4-9 Iena Moisés mɨcorɨ jaie cuega:
Seis dɨgarui raifi illanona, Jusiñamui nana rana fɨnode.
Naimɨemona nana naimɨe fɨnoca ra mare.
Naimɨe comecɨ caɨmare uri illamona, siete iruimo jafaicɨ ote
cuega. Jusiñamuidɨ nana comɨnɨ comecɨaɨ uri illana nia jitaide. Moisés mɨcorɨ facaise caɨ jaiagaɨ comecɨaɨ uri illana jitaide; iadedɨ naimɨena naimacɨ ɨɨnoñena jira, naimacɨ comecɨaɨ jaca uri iñede. Moisés mɨcorɨ fiodailla mei, bie enɨruemo Josué mɨcorɨ caɨ jaiagaɨna ɨfode; iadedɨ naimacɨ rilla mei, Jusiñamuina naimacɨ ɨɨnoñena jira, naimacɨ comecɨaɨ jaca uri iñede. Josué mɨcorɨ illa facaisemona dɨga años illanona, David mɨcorɨ comecɨaɨ uri illana jɨaɨ llote:
Naimɨe uaina birui omoɨ cacaia, iena ɨɨno
llote. Naiemona Jusiñamui caɨ comecɨaɨ uri illana jitaillana uiñotɨcaɨ. Naimɨena ɨɨnotɨnodɨcaɨmo naie rafue jai duide.
10 Jusiñamuina caɨ ɨɨnuamona, caɨ comecɨaɨ jai uri ite. Caɨ comecɨaɨ uri illena, jɨaɨe rafuedo jaiñedɨcaɨ. Naimɨena caɨ ɨɨnuamona, naimɨe illanomo ɨco iitɨcaɨ. Nana naimɨe fɨnoca rafuena naimɨe fuidua mei, nainomo uri iitɨcaɨ.
11 Caɨ jaiagaɨ ɨɨnoñedɨmacɨ. Caɨ faɨfiñellena, naimacɨ isoi caɨ jaiñena; iadedɨ Jusiñamui uaina ɨɨnocana mai caɨ jaillɨ. Jusiñamuina caɨ ɨɨnuamona, naimɨedɨ caɨ comecɨaɨ uri itatate.
12 Naimɨena caɨ ɨɨnoñenia, naimɨe iena uiñote. Naimɨe jaca ite. Naimɨe siño. Ie jira naimɨe lloga uai jaca saiñede. Jaca siño. Caɨ comecɨaɨmo rɨire baite. Eo jairede lloebɨ bue isoide jaitaia, iena oni econuanona, nana nainomo fo ite rana bairetate. Ie isoide Jusiñamui lloga uai. Nana caɨ comecɨaɨmo itɨcɨnona rɨire bairetate. Nana caɨ comecɨaɨna facajacɨnuaɨna rɨire bairetate.
13 Jusiñamuimona buna reirinide. Jusiñamui nana caɨna cɨode. Nana caɨ fɨnoca rafuena uiñote. Nana caɨ comecɨaɨmo itɨcɨnona uiñote. Ie jira naimɨe uaina ɨɨnocana mai caɨ jaillɨ
Jesúdɨ caɨ facaina Jusiñamui dɨga nanoca ñaɨraɨma
14 Jesúdɨ naie uaina caɨ ɨɨnuamo canoite, naimɨedɨ caɨ facaina Jusiñamui dɨga nanoca ñaɨraɨmana jira. Ie Jito illamona, monamo Jusiñamui abɨmo birui naimɨe illamona, caɨ facaina Jusiñamui dɨga naimɨe ñaɨcabite. Ie jira naimɨena ɨɨnocana jaitɨcaɨ.
15 Taɨfe caɨ ramo faɨa, caɨ comecɨaɨ raise caɨ ocuiñoñenia, Jesús caɨna canorede. Caɨ ramo faɨa isoi, Taɨfe naimɨe naga isoide ramo faɨte; iadedɨ Taɨfe uaina naimɨe ɨɨnoñede. Iemona Taɨfe ramo faɨacɨnona ɨɨnoñenana naimɨe uiñua jira, jeacɨnona oñede. Caɨna canorede. “Naimacɨna cano” ie Moomo llocabite.
16 Caɨ facaina ie Moo abɨmo naimɨe illa jira, caɨ comecɨaɨna naimɨe ocuiñotaiacana jira, Jusiñamuina jacɨruiñeno naimɨemo caɨ jɨɨa. Naimɨe caɨna duenaillamona, caɨ jeacɨnona feitaite. Caɨ comecɨaɨna jɨaɨ ocuiñotaite.