7
Melquisedec mɨcorɨ illa isoi, Jusiñamui dɨga ñaɨraɨmana Jesús jaide
1 Iena omoɨ raise uibiñollena, Melquisedec mɨcorɨ rafuena omoɨmo lloitɨcue. Naimɨe mɨcorɨdɨ Salem railla naɨraɨ ie illaɨma. Naimɨedɨ comɨnɨ facaina caɨ Moo Jusiñamui dɨga ñaɨraɨma. Cinco illaɨmana Abraham mɨcorɨ anafefitaja mei, ie jofomo Abraham mɨcorɨ abɨdo billano, naɨsomo naimɨe dɨne Melquisedec mɨcorɨ bite. Abraham mɨcorɨmo marecɨnona Melquisedec llote: “Birui Jusiñamui ona canode. Naimɨe ona jaca canollena uiñotɨcue” llote.
2 Jusiñamui dɨga ñaɨraɨmana Melquisedec illa jira, naimɨemo Abraham mɨcorɨ dajerie rana fecade. Naie cinco illaɨmana anafefitajanona, naimacɨ rana baɨruanona, nana naie ramona, rɨaɨ uaimona ie décima facaina rana Melquisedecmo fecade. Melquisedec mɨcorɨdɨ Salem railla naɨraɨ illaɨma. Melquisedec mamecɨ oni dobaiñuamona, “Comɨnɨna raise marena sedadɨmɨe” railla. Ie comɨnɨna raise sedajamona, ie comɨnɨ uri illa jira, comɨnɨ illano Salem railla mamecɨna jonega.
3 Naimɨe moona, naimɨe eina, naimɨe comɨnɨna uiñoñedɨcaɨ. Naimɨe jeicɨaruina uiñoñedɨcaɨ. Naimɨe fiodaillaruina uiñoñedɨcaɨ; iadedɨ Jusiñamui Jito isoi Jusiñamuimona naimɨe feiñoga uai saiñena jira, comɨnɨ facaina Jusiñamui dɨga ñaɨraɨmana jaca jaide. Naimɨe ifomo jɨaɨmɨe iñena jira, naimɨe ñaɨraɨmana nia ite isoide.
4 Ero, caɨ comɨnɨmona Abraham mɨcorɨ caɨ jaiagaɨ baɨfemo faɨte; iadedɨ Melquisedec mɨcorɨ Abraham mɨcorɨ baɨfemo faɨte. Ie jira naimɨemo ie décima facaina rana fecade.
5 Moisés mɨcorɨmona Abraham mɨcorɨ uruiaɨ Jusiñamui lloga uaina cacadɨmacɨ. Naimacɨmo Jusiñamui ie sedaja jofo fɨnuana llote. Nainomo maɨjɨdɨnomo nainomo maɨjɨana llote. Abraham mɨcorɨ uruiaɨmona Leví railla naɨraɨna fetode. Nainomo maɨjɨdɨno comɨnɨ facaina Jusiñamui dɨga ñaɨuidɨmacɨ. Jusiñamui ocuica rafue naimacɨ maɨjɨa jira, naimacɨ comɨnɨ ramona décima facaina rana feiñouidɨmacɨ.
6 Melquisedec mɨcorɨmo Abraham mɨcorɨdɨ ie rana fecade; iadedɨ Melquisedec mɨcorɨ Abraham mɨcorɨ comɨnɨñede. Leví railla naɨraɨ imɨeñede. Naɨsomo Abraham mɨcorɨ dɨne Melquisedec mɨcorɨ billanona, Abraham mɨcorɨmo marecɨnona llote: “Jusiñamui ona jaca canoite. O dɨga jaca iite” llote.
7 Melquisedec mɨcorɨ Abraham mɨcorɨ baɨfemo faɨa jira, naie marecɨnona naimɨemo llote.
8 Ero, Melquisedec mɨcorɨmo Abraham mɨcorɨ rana fecade; iadedɨ Melquisedec mɨcorɨ fiodaillaruina uiñoñedɨcaɨ. Naimɨe uai saiñena jira, jɨaɨmɨe naimɨe ifomo jaca iñede. Comɨnɨ facaina Jusiñamui dɨga ñaɨraɨnɨmo naimacɨ ramona décima facaina caɨ judíuaɨ comɨnɨdɨ fecauidɨmacɨ; ia naie ñaɨraɨnɨ fiodaicana jaillana uiñotɨcaɨ. Naimacɨ uai sailla jira, jɨaɨno naimacɨ ifomo meidouidɨmacɨ.
9-10 Leví mɨcorɨdɨ Abraham jito. Leví mɨcorɨmona Leví railla naɨraɨ comuide. Naimacɨdɨ Jusiñamui dɨga ñaɨraɨnɨna jaidɨmacɨ. Comɨnɨmona décima facaina rana feiñouidɨmacɨ. Leví mɨcorɨ nia comuiñenia, Melquisedec mɨcorɨmo Abraham mɨcorɨ décima facaina rana fecajamona, Abraham mɨcorɨ Leví ie usumana jira, Melquisedec mɨcorɨdɨ Leví naɨraɨ baɨfemo faɨana uiñotɨcaɨ. Melquisedec mɨcorɨdɨ Jusiñamui dɨga ñaɨraɨnɨ baɨfemo faɨana uiñotɨcaɨ. Melquisedec isoi Cristo illa jira, Cristodɨ Leví baɨfemo faɨana uiñotɨcaɨ. Cristodɨ nana naie ñaɨraɨnɨ baɨfemo faɨana jɨaɨ uiñotɨcaɨ.
11 Jusiñamui dɨga ñaɨraɨnɨ fɨnouilla rafuedo Jusiñamui jitailla isoi marebicaiñedɨcaɨ. Naimacɨ fɨnouilla rafuedo caɨ jillobidɨcaɨdena, jɨaɨe rafuena jitaiñedɨcaɨ. Naie rafuedo caɨ jillobiñena jira, Jusiñamuidɨ Cristona orede. Caɨ facaina Cristo ñaɨraɨmana jaillena, naimɨena orede. Caɨna jillobitallena, naimɨena orede, jɨaɨe rafuedo caɨ jillobiñena jira. Jusiñamui Moisés mɨcorɨmo jaie llua isoi, comɨnɨ facaina nano ñaɨraɨmadɨ Aarón mɨcorɨ. Naimɨedɨ Leví railla naɨraɨ imɨe. Naimɨe jitonɨaɨmona comɨnɨ facaina ñaɨraɨnɨna itɨmacɨ. Iena uiñotomoɨ. Aarón jitonɨaɨmona Cristo iñede. Aarón maɨjɨa rafuemo Cristo duiñede; iadedɨ Melquisedec rafuemo duide.
12 Comɨnɨ facaina ñaɨraɨnɨna jaillana jai meidua jira, Jusiñamuidɨ naimacɨ rafuena jɨaɨ meidote.
13 Iena lloitɨcue. Aaróndɨ Leví railla naɨraɨmo duide. Danɨ Leví naɨraɨdɨ comɨnɨ facaina ñaɨraɨnɨdɨmacɨ. Danɨ naimacɨdɨ comɨnɨ facaina Jusiñamuimo rana fecauidɨmacɨ. Cristo naie naɨraɨmo duiñede.
14 Cristo jɨaɨe naɨraɨmo duide. Judá naɨraɨmo duide. Judá naɨraɨmona Jusiñamui Jito comuillana uiñotɨcaɨ. Naie naɨraɨmona comɨnɨ facaina ñaɨraɨmana bu jaillana Moisés mɨcorɨ jaie jaca lloñede.
15 Cristo billa jira, Moisés mɨcorɨ lloga rafue meiduana uiñotɨcaɨ. Melquisedec mɨcorɨ illa isoi, comɨnɨ facaina ñaɨraɨmana Cristo jaca iite.
16 Moisés mɨcorɨ lloga rafue isoi, Cristodɨ ñaɨraɨmana jaiñede; iadedɨ Jusiñamui uaido ñaɨraɨmana naimɨe jaide.
17 Jusiñamui lloga uaimona iena uiñotɨcaɨ. David mɨcorɨ naimɨena jaie cuega:
Melquisedec mɨcorɨ illa isoi, odɨ comɨnɨ facaina ñaɨraɨmana jaca iitɨo
cuega.
18 Comɨnɨ facaina ñaɨraɨmana jaillena Moisés mɨcorɨ jaie cuega. Naiemona jilluana comɨnɨ oñena jira, naie uai jai saide. Naiedo jaillamona, naimacɨ jeacɨnomona jilloñedɨmacɨ. Naiedo jaillamona, naimacɨ comecɨaɨna ocuiñotañedɨmacɨ. Naiedo jaillamona, naimacɨ Jusiñamuina nabaiñedɨmacɨ.
19 Naiedo jaillamona, Jusiñamui jitailla isoi marebicaiñedɨcaɨ. Iedo birui jaiñedɨcaɨ. Jɨaɨe rafuemo birui ocuiridɨcaɨ. Cristo fɨnoca rafue muidona, Jusiñamuina caɨ nabaillamona, Jusiñamui dɨga birui ñaɨredɨcaɨ.
20 Jusiñamui llua jira, Cristo caɨ facaina ñaɨraɨmana jaide.
21 Leví mɨcorɨ jitonɨaɨdɨ imacɨ jeicɨamona, comɨnɨ facaina ñaɨraɨnɨna jaidɨmacɨ. Naga icaiño Jusiñamuidɨ naimacɨna ñaɨraɨnɨna jaillana fetoñede; iadedɨ ie lloga uaina jira, Cristo caɨ facaina ñaɨraɨmana jaide. David mɨcorɨ Jusiñamui lluana jaie cuega:
Cue jai llua jira, cue lluana fɨnoitɨcue.
Cristomo llotɨcue: “Comɨnɨ facaina ñaɨraɨmana jaca iitɨo”
cuega.
22 Jesús ñaɨraɨmana jaca illa jira, naimɨe jailla rafue Moisés mɨcorɨ lloga rafue baɨfemo uaide.
23 Moisés mɨcorɨ lloga rafue anamo ailluena ñaɨraɨnɨdɨ itɨmacɨ. Naimacɨ fiodaicana jailla jira, ailluena ñaɨraɨnɨ jitaide, fiodaitɨno ifomo meidollena.
24 Naimɨe jaca illa jira, Cristo ñaɨraɨmana jaca iite. Naimɨe ifomo jaca buna meidoñeite.
25 Naimɨe jaca illa jira, comɨnɨ facaina Jusiñamui dɨga jaca ñaɨcabite. Ie jira Cristodɨ nana Jusiñamui dɨbeimo iacadɨnona, naimacɨ jeacɨnomona, ua jaca jillotarede.
26 Caɨna canollena, naimɨe isoide nanoca ñaɨraɨmana jitaidɨcaɨ. Ie Moo isoi naimɨedɨ mareuidɨmɨe. Naimɨemo jeacɨno jaca iñede. Jeacɨno fɨnouidɨno dɨbeimo naimɨe iñede. Jusiñamuidɨ ie ecɨmo naimɨena itatate. Ie jira naimɨe caɨna canorede.
27 Jusiñamuimo fecallena, naimacɨ jeacɨno facaina naimɨe ɨba oñellena, Moisés mɨcorɨ llua isoi, nanoca ñaɨraɨnɨdɨ nagarui toɨnɨaɨna fatɨmacɨ. Danɨ naimacɨ jeacɨno facaina nagarui iese fɨnodɨmacɨ. Iemei comɨnɨ facaina nagarui iese jɨaɨ fɨnodɨmacɨ. Cristo naimacɨ isoiñede. Naimɨe jitailla jira, comɨnɨ jeacɨno facaina naimɨe fiodailla jira, comɨnɨ facaina dacaiño fiodaite. Naimacɨ jeacɨno facaina naimɨe dane fiodaiñeite.
28 Moisés mɨcorɨ facai ñaɨraɨnɨdɨ jeacɨnona fɨnocana jaidɨmacɨ. Fiodaicana jɨaɨ jaidɨmacɨ; iadedɨ jɨaɨe rafue birui illa jira, ie uaido Jusiñamuidɨ ie Jitona ñaɨraɨmana jaillana jai fetode. Naimɨedɨ jaca mareuidɨmɨe. Jeacɨno jaca fɨnoñede.