5
Funeral Song Fo Da Israel Ohana
(Amos 5:1-3, 16-17)
1 Amos tell:
“You peopo from da Israel ohana!
Lissen wat I goin tell bout you guys!
Dis one funeral kine song, you know.
Me, Amos, I stay make um fo you guys. Dis da song:
2 “ ‘Da Israel ohana, jalike one young girl.
No matta she young,
She fall down cuz dey kill her.
She no goin stan up one mo time, eva.
Dey wen leave her body ova dea, inside her country.
Cuz no mo nobody goin come fo her.
3 “ ‘Cuz dis wat Da One In Charge a me tell
Bout da Israel ohana:
“Wen tousan army guys go out fo fight from one town,
Ony hundred goin come back.
Wen hundred army guys go out fo fight from anodda town,
Ony ten goin come back to dea Israel ohana.”
Bummahs!’
Dass my song!”
God Goin Get Da Israel Ohana
Outa Trouble
(Amos 5:7-15)
Look Fo God Real Good Fo Stay Alive
4 Dis wat Da One In Charge tell da Israel ohana:
“Eh! Go come back by me an be my guys,
Fo me help you, aah?
Den you guys goin stay alive an no mahke.
5 No go by da Bethel peopo fo get help,
No go Gilgal side.
No go da odda side a da country, Beer-Sheba side.
You no foget, Gilgal was da firs place
Yoa peopo wen come inside dis land,
But now, Gilgal garans goin be da place
Wea odda peopo goin drag you outa dis land!
Da Bethel peopo goin come notting.”
6 Amos tell:
“Eh you guys! Go by Da One In Charge fo get help
Fo you guys stay alive an no mahke.
But if you no like, God goin wipe out da Joseph ohana real fas, jalike wit fire,
An burn up Bethel town real fas,
An nobody goin pio da fire.”
If You Do Bad Kine Stuff, Betta Watch Out!
(Amos 5:10-13)
7 “Bummahs, fo you guys! You tell peopo
Dat eryting da judge tell, no good,
An bulai peopo so dey no mo dea rights!
Jalike you throw um down on top da dirt!”
Da One In Charge Get Da Powa
Fo Make Eryting, An Fo Punish Peopo
(Amos 1:2; 4:13; 9:5-6)
8 “God, he da One wen make da stars—
Da Pleiades an Orion stars,
He change da real dark time an make um come morning time,
He change da day time an make um come dark fo nite time.
He tell da watta fo come up outa da ocean fo make rain clouds,
Den he pour um out on top da groun.
Da Boss, Da One In Charge, dass his name, cuz dass who him!
9 He da One dat bus up da strong guys
An broke down dea strong wall!
No Matta You Bad O You Good, Watch Out!
10 “But you Israel peopo,
You hate anybody dat tell da judge
Dat you guys do wass not right.
Anybody dat talk fo real kine in front da judge,
You guys make to dem jalike dey junk.
11 Cuz da peopo dat no mo notting,
You guys make um pay tax
An take away some a da food dat dey harves an clean,
Cuz a dat, no matta you guys build house
Wit fancy kine cut stone block—
You guys no goin live inside.
No matta you guys plant one good looking kine grape farm—
You guys no goin drink da wine from dose grapes.
12 Eh! I know how much stuff you guys do agains me.
I know all da diffren ways you guys do bad kine stuff!
You guys, you stay agains da peopo dat do da right ting.
You guys like get money from unda da table,
You guys like put presha on peopo
Az why da ones dat need help from da judge, no goin get help!
13 “Fo shua, weneva tings stay lidat,
Da smart peopo dat you guys hate,
Dey no goin say notting,
Cuz eryting stay bad awready.
Do Good Kine Stuff Fo Stay Alive
14 “Go come back an do good kine stuff, not da bad kine,
Den you guys goin live.
Den Da One In Charge, da God Ova All Da Armies,
Goin stay tight wit you guys fo real kine.
Right now you guys ony tell dat he stay tight wit you guys,
But he not.
15 Go all out fo hate da bad kine stuff
An get love an aloha fo da good kine stuff.
Make shua you pick da judges dat goin tell wass right.
Den, maybe Da One In Charge, da God Ova All Da Armies,
Bumbye give chance to da litto bit peopo
Dat stay alive still yet
From yoa Israel ohana.”
God Goin Punish Da Israel Peopo
(Amos 5:16–9:15)
Anodda Funeral Song Fo Da Israel Peopo
(Amos 5:1-3)
16 “Cuz a wat you guys wen do, dis wat my God, Da One In Charge, tell—he my Boss, da God Ova All Da Armies:
“ ‘Inside ery town, goin hear peopo crying fo you guys.
Ery open place, ery street, da peopo goin yell, “Bummahs! Bummahs!”
Dey even goin tell da farm worka guys
Fo go town fo go da funeral, an cry fo you guys cuz you mahke.
Da peopo dat know how fo sing da funeral songs,
Dey goin pay um fo yell plenny fo you guys afta you mahke.
17 Cuz wen I go thru da land wea you guys live,
I goin punish you guys.
Peopo goin cry plenny,
Even inside all da grape farms!’ ”
Dass wat Da One In Charge tell.
Da Israel Ohana Tink Dey Okay,
But Dey Not Okay
(Amos 4:4-12; 5:18–6:14)
18 Anodda time, Amos tell:
“Bummahs, fo you guys dat talk lidis:
‘Time awready fo Da One In Charge show up!’
Wat you guys tink goin happen to you
Wen Da One In Charge come back, aah?
Wen he show up, eryting goin come hard fo you guys, not good!
Jalike one storm make eryting come dark, no mo light!
19 Fo you guys, goin be jalike dis—you go run away from da lion,
An anodda kine wild animal goin catch you from da odda side!
Den you go inside yoa house,
An put yoa hand on top da wall fo res,
An da snake bite you!
20 Dat time, wen Da One In Charge come back, no goin be good fo you!
No goin get light! Ony goin get dark,
Jalike wen get one real dark nite an no can see notting.”
Dey Tink If Dey Religious Dey Okay,
But Fo Real Kine Dey Not Okay
21 Da One In Charge tell,
“Wen you guys make religious kine ceremonies,
I hate wat you guys do!
Wen you guys stop work
Cuz you make jalike you goin come togedda fo me,
Dat make me like puke!
22 No matta you guys bring animals
Fo kill um an burn um up fo make one sacrifice fo me,
No matta you guys bring wheat fo make one present
Fo show you get respeck fo me,
I tell ‘Laytas’ to dat!
Wen you guys kill da fat cow fo make da sacrifice,
Still yet, I tell ‘Laytas’ to dat.
23 Eh, laytas wit da noise from yoa religious kine songs.
Dey ony bodda me!
Dey ony noise!
I no goin lissen da harp kine music
From you guys!
24 Mo betta, wen you judge da right way bout eryting,
Goin be jalike get one big riva dat erytime get watta inside.
Wen you do da right ting erytime,
Az jalike one riva dat no dry up eva.”
25 “No foget:
Dat time yoa ancesta guys wen stay inside da boonies,
Fo forty year, you Israel guys wen make sacrifice fo me,
An bring me presents cuz you like show me love an respeck.
26 Dat time, you guys neva carry aroun da idol kine god you call yoa ‘King,’
Da one dey call Sikut—but dass wat you stay do now!
You neva carry da Kiyyun statue wit you, da star god—
But dass wat you guys stay do now.
Dem, da idol kine gods you guys pray to,
Dat you wen make fo you pray to dem.
27 Dass why now, I goin throw you guys outa dis land
An make you guys go da odda side Damascus.
Go ahead! Take da idol kine gods wit you!”
Dass wat Da One In Charge tell, da One dat stay da God Ova All Da Armies.