7
Daniel Dream Bout Four Wild Animals
(Matthew 24:30; 26:64; Mark 12:36; 13:26; 14:62; Luke 21:27; Jesus Show 13:7)
1 Da year numba one wen Belshazzar stay king inside Babylon, Daniel get one dream. He see pichas inside his head wen he stay lay on top his bed. Laytas, he write down da main tings he wen see.
2 Daniel tell:
“Nite time, inside my dream, I see da ocean come real rough cuz get da winds from four side make da ocean all rough.
3 Four big kine wild animal come up outa da ocean. Da four animal, dey all look diffren.
4 “Da firs wild kine animal, look jalike one lion, but get wings jalike one eagle. I look long time. Den somebody broke off da wings. Somebody lif up da animal from da groun, an make um stan on two feets jalike peopo, an make um come jalike one man inside, fo him tink jalike peopo.
5 “Den in front me, I see anodda wild animal, numba two, dat look jalike one bear. He sit on his back legs an he get three ribs in his teets. Somebody tell um, ‘Get up! Eat all da meat you like!’
6 “Afta dat I look one mo time. Get anodda wild animal, jalike one leopard. On top da back get four wing jalike one bird. Da animal get four head. Somebody give um da powa fo stay in charge a da peopo.
7 “Afta dat, same nite, get mo stuff I see in da dream. Get anodda wild animal, numba four. He look real skery an get plenny powa. He get big iron teets. He stay smash wateva he like, an eat um, an smash wateva stay lef ova wit his feets. Dis one look real diffren den da odda wild animals dat come befo him cuz he get ten horn.
8 “Wen I still tink bout da horns, get anodda small kine horn come up inside da middo a da odda horns. Dis horn make three a da horns dat stay dea firs time, broke off. Dis horn, get eyes jalike peopo, an get one mout dat talk big.
9 “I stay look some moa, an get thrones set up ova dea
Fo da judge guys.
Da One Dat Stay From Befo Time sit down dea.
His clotheses stay all white jalike da snow.
Da hair on top his head
Stay white jalike da bestes kine wool.
His throne, jalike was burning,
An da wheels undaneat jalike burning too.
10 From wea he sit,
Can see one fire dat look jalike one riva stay burn.
Da fire stay go out from in front him.
Plenny tousan angel guys do his work,
Millions a angel guys stay by him.
Den da judge guys sit down fo start dea work
An dey open da books
Dat tell wat da peopo wen do.
11 “Den I still yet stay look cuz I hear da horn talk big. I still look, an somebody kill da wild animal numba four an throw um inside da fire fo burn um up an wipe um out.
12 (Somebody take away da powa from da odda three wild animals, but he let um stay alive litto bit mo, till da right time.)
13 “Den, still inside my dream nite time, I wen see,
Right dea in front me get somebody
Dat look jalike one real kine guy!
He stay come from da clouds inside da sky,
Fo go by Da One Dat Stay From Befo Time.
Da peopo dea bring da one dat look
Jalike one real kine guy
In front Da One Dat Stay From Befo Time.
14 Da One Dat Stay From Befo Time give da guy
Da powa fo stay in charge.
He make peopo get respeck fo him
An let him be dea king.
All da diffren peopos
From ery country an ery language
Goin show dat guy love an respeck.
Da powa he get fo stay in charge,
He get um foeva.
Dat powa goin be lidat foeva,
An no mo nobody goin ovathrow him.”
Wat Da Dream Mean
15 “Me, Daniel, bodda me bout da pichas I see inside my head dat make me real sked.
16 I go by one a da guys dat stay stan ova dea, an aks him wat da tings I see mean fo real kine fo him help me fo know wat all dat stuff mean. He tell:
17 “ ‘Da four big wild animal, dey da four king kine powas an dea peopos from dis world dat goin take ova.
18 But da ones dat stay spesho fo da God Dass Mo Importan Den All Da Odda Gods, goin be dem get da right fo be da king guys, an dey goin keep dat right foeva an eva.’
19 “Den I like make shua fo real kine, bout da numba four wild animal. He diffren den da odda three animal. He real skery cuz he get iron teets an bronze claws. He stay eat up wateva he like an smash wit his feets wateva stay alive.
20 An den I like know bout da ten horn on top his head too, an da odda horn dat come up, an da three horn dat fall off in front da new horn. Dat horn look mo importan den da odda horns an get eyes an one mout dat talk big.
21 Den wen I look, dat horn stay make war agains dose dat stay spesho fo God an start fo win ova dem.
22 He stay make lidat. But den Da One Dass From Befo Time come. Him da Judge, an he tell ‘Da ones dat stay spesho fo Da God Dass Mo Importan Den All Da Odda Gods, dey get um right.’ Den da time come wen dose dat stay spesho fo him take ova an stay in charge a eryting.
23 “Da guy dat tell me all dis stuff tell me dis too:
“ ‘Da numba four wild animal,
He jalike da numba four country
Dat goin take ova da world.
Goin be diffren den da odda countries
Dat take ova befo him.
He goin eat up da whole world,
An walk ova um, an smash um.
24 Da ten horn, dat mean,
Goin get ten kings goin come from dat country,
Dat get powa.
Afta dat, anodda king goin come,
Diffren den da odda kings befo him.
He goin take ova three a da kings land.
25 He goin grumble bout da God
Dass Mo Importan Den All Da Odda Gods,
An put presha on da peopo dat stay spesho fo God.
An he goin try fo change
Da regula times fo make sacrifice
An change da rules from God.
He goin get powa
Ova da peopo dat stay spesho fo God
Fo three an a half year.
26 “ ‘Den da judge guys goin sit down an do dea work. Dey goin take away da powa dat king get an wipe out his powa foeva.
27 Den, da God Dass Mo Importan Den All Da Odda Gods goin give da peopo dat stay spesho fo him da powa fo come da nex king an da powa fo stay in charge a da peopo. An da God Dass Mo Importan Den All Da Odda Gods goin give his kings powa ova da odda kings all ova da world. Dey goin stay in charge foeva. All da countries on top da earth goin work fo God peopo, an all da odda peopos goin lissen dem.’
28 “Dass da story, by me, Daniel. But dis story wen bodda me plenny, an give me chicken skin cuz I sked. Az why I no talk bout um.”