39
Da Clotheses Fo Da Pries Guys
1 Bezalel guys use da blue an purple an red wool string fo weave da spesho kine religious kine clotheses dat da pries guys wear inside da Place Dass Spesho Fo God. Dey make da spesho kine religious kine clotheses fo Aaron too, jalike Da One In Charge wen tell Moses fo make um.
2 Da pries kine ves, dey make um outa gold an fancy kine linen cloth, wit blue an purple an red wool string.
3 Dey poun gold fo make um real thin, den dey cut um skinny kine jalike string, an twis um togedda wit da blue an purple an red wool string an da linen string fo make pichas on top da fancy kine linen cloth.
4 On top da two shouldas, dey put two piece fo hold togedda da two sides.
5 Dey weave one nice looking wais band an sew um on da bottom part a da ves. Dey weave um wit gold, wool string (blue, purple, an red), an fancy kine linen string, same ting jalike Da One In Charge wen tell Moses fo do.
6 Dey take two blue lapis lazuli stone, an make gold frame fo um. Den dey cut da alphabets on top da stones fo da names a da twelve Israel boys.
7 Den dey sew da stones on top da two shoulda pieces on top da ves. Dose two stones, fo make da peopo no foget bout da Israel peopo. Dass jalike Da One In Charge wen tell Moses fo do.
Da Ches Piece
(Outa Egypt 28:15-30)
8 Dey weave da ches piece outa gold dat dey twis togedda wit da wool string (blue, purple, an red), an fancy kine linen string, da same style jalike da ves.
9 Dey fold um an sew da sides fo make one small bag dass square, eight inch by eight inch.
10 Den, on top da ches piece, one side, dey put twelve fancy jewelry kine stones wit frames, fo make four row, wit three stone ery row:
Firs row, red ruby, yellow chrysolite, an green emerald.
11 Da secon row, light green turquoise, dark blue lapis lazuli, an white moonstone.
12 Da third row, jacint, agate, amethys.
13 Da las row, beryl, onyx, jasper.
Ery stone get one gold frame fo hold um.
14 Ery stone, az fo one a da Israel ohanas. Dey cut dea names jalike fo make one seal, twelve name on top da twelve stone, fo da twelve Israel ohanas.
15 On top da ches piece, dey make plenny small chains outa pure gold an twis um togedda jalike one thick string.
16 Dey make two gold frames wit two gold rings fo da ches piece, an put da two rings on top da two top cornas,
17 an dey hook da two chains to da two rings.
18 Den dey hook da odda side a da two chains to da two gold frames on top da shoulda pieces fo da ves, fo let da ches piece hang down in front from da two shouldas.
19 Dey make two mo gold rings, an put um da two sides a da ches piece, da bottom side wea da ches piece touch da ves.
20 Den dey put two mo gold rings on top da ves, down from da shoulda pieces, front side, litto bit up by da place wea da wais band come togedda wit da ves.
21 Dey tie da ches piece wit da blue wool string, from da ches piece rings to da rings on da top a da ves. Dey tie um fo da ches piece stay right on top da fancy wais band, fo no come off, jalike Da One In Charge wen tell Moses fo do.
Da Odda Spesho Clotheses
Fo Da Pries Guys
(Outa Egypt 28:31-43)
22 Dey weave da whole robe dat go wit da ves outa da kine blue wool string dat cost plenny.
23 Dey leave one puka open in front da middo a da robe fo da head, an weave extra stuff all aroun da puka, fo make um thick dea so no broke. (Az jalike da metal ring shirt da army guys wear.)
24 Dey take blue an purple an red wool string, an sew pichas dat look jalike pomagram fruit aroun da bottom a da robe nea da floor.
25-26 In da middo a da pomagram fruits, dey put small kine bell made outa pure gold, so get bell, den pomagram, den bell, den pomagram, all aroun da bottom, jalike Da One In Charge wen tell Moses fo make. Aaron gotta wear dat wen he do his work.
27 Fo Aaron an his boys dey weave da long shirt outa fancy kine linen cloth.
28 Dey make da pries kine hat outa da linen cloth, an da pries guys beebz outa linen cloth too.
29 Dey weave da sash outa fancy kine linen an blue an purple an red wool string, all kine colors, jalike Da One In Charge wen tell Moses fo do.
30 Dey make one small piece pure gold fo Aaron forehead fo show dat he spesho fo Da One In Charge. Dey cut da alphabets on top da gold jalike fo one seal, fo tell “Spesho Fo Da One In Charge.”
31 Den dey tie one blue wool string on da gold ting an put um on da pries kine hat, jalike Da One In Charge wen tell Moses fo do.
Da Tent Pau
32 All da work fo build da Tent Fo Come Togedda Wit God pau awready. Da Israel peopo make eryting jalike Da One In Charge wen tell Moses fo do.
33 Da peopo bring da Tent to Moses:
da inside Tent an all da stuffs fo go inside da tent:
da Hooks,
da stan up Boards,
an da poles dat go across da boards,
da Poses an da piers,
34 da red ledda Cova from boy sheep skin fo da tent,
da outside Cova from da dolphin skins,
da thick Curtain dat cova da Real Spesho Place inside da Tent,
35 da Box Fo No Foget Da Deal,
an da poles,
da Cova fo da Box dass fo show dat God goin take away da shame fo all da bad tings peopo do, fo make um come pono one mo time wit him,
36 da Table an all da tings dey use fo um,
da Breads dey put in front God,
37 da pure gold Stan fo da lamps,
da Lamps an all da stuff dey use fo um,
da olive Oil fo da light,
38 da gold Altar,
da Oil fo put on top da pries guys,
da Incense dat smell nice,
da thick Curtain fo no look inside da Tent from outside,
39 da bronze Altar dat get da bronze grill inside,
an da poles,
all da tings dey use fo make da sacrifices,
da Watta Tank an da stan,
40 da Cloth fo go aroun da open lanai,
da Poses an da piers,
da Curtain dat go in front da gate fo da open lanai,
da Ropes an da tent pegs,
all da tings dey use inside da Tent Fo Come Togedda Wit God,
41 da spesho kine religious kine clotheses da pries guys wear wen dey working inside da Place Dass Spesho Fo God,
da spesho kine clotheses fo Aaron da Main Pries,
all da religious kine clotheses fo Aaron boys dat goin be da pries guys.
42 Da Israel peopo, dey do all da work so eryting stay jalike Da One In Charge wen tell Moses fo make um.
43 Moses check um out an see dat dey all pau da tings dey gotta do, jalike Da One In Charge wen tell um fo do. So Moses aks God fo do plenny good tings fo da peopo.