118
“Mahalo Plenny!” To God
1 Eh you guys! Tell good tings
Bout Da One In Charge
Cuz he good!
Cuz he stay tight wit his peopo foeva!
2 All da Israel peopo, I like dem fo tell:
“Da One In Charge
Stay tight wit his peopo foeva!”
3 All da pries guys dat come from Aaron,
I like dem fo tell:
“Da One In Charge
Stay tight wit his peopo foeva!”
4 All da peopo dat get choke respeck
Fo Da One In Charge,
I like dem fo tell:
“Da One In Charge
Stay tight wit his peopo foeva!”
5 Befo time wen I get plenny presha,
I yell fo Da One In Charge help me.
He wen lissen,
An he put me wea no mo presha.
6 Da One In Charge, he back me up.
Az why I no need come sked notting.
So wat odda peopo can do to me?!
Notting!
7 Da One In Charge, he stay back me up
An help me.
Wen Da One In Charge win
Ova da peopo dat hate me,
I goin see him do um.
8 Mo betta, I go hide by Da One In Charge,
Fo him take kea me,
Den trus odda peopo fo take kea me.
9 Mo betta, I go hide by Da One In Charge
Fo him take kea me,
Mo den even trus da guys
Dat get plenny powa fo take kea me.
10 No matta all da diffren nations
Surroun me,
I go bus um up,
Cuz Da One In Charge
Give me his powa!
11 Dey surroun me all ova.
I bus um up, cuz Da One In Charge
Give me his powa!
12 Dey surroun me
Jalike da bees stay attack.
But dey goin pio,
Jalike one brush fire
Dat burn out quick.
I bus um up, cuz Da One In Charge
Give me his powa!
13 All you peopos, you wen put
Plenny presha on me,
Almos enuff fo make me fall down,
But Da One In Charge,
He wen help me.
14 Da powa I get, come from
Da One In Charge.
He make me strong wen I fight.
He wen come da One
Dat get me outa trouble.
15 Can hear da peopo
Dat get um right wit God,
Stay yelling inside dea army camp.
Dey stay good inside
Cuz God wen help um fo win.
Dey tell: “Da One In Charge,
He show dat he get plenny powa!
Dass why us guys win!
16 Da One In Charge, he put up
His right hand fo show he da winna!
Da One In Charge,
He get plenny powa fo shua!
Dass why us guys win!”
17 I no goin mahke! I goin stay alive!
An I goin tell da story
Bout all da tings
Da One In Charge do!
18 Da One In Charge punish me real good
Fo teach me stuff,
But he neva let me mahke.
19 Eh! Da Temple gate,
Wea da peopo dat get um right
Wit God go inside,
Open um up fo me!
I like go inside dea
An tell good tings
Bout Da One In Charge!
20 Da guys inside da Temple tell,
“Dis da gate fo go
By Da One In Charge.
Da peopo dat get um right wit him
Can come inside hea.”
21 Eh! You Da One In Charge!
I goin tell good tings bout you,
Cuz, wen I wen yell to you fo help me,
You wen do um,
Az was wen you wen get me
Outa trouble!
22 Da peopo tell:
“Had one big rock.
Da builda guys tell,
‘Dis rock, no good!’
But afta, dass da rock dey wen put
Fo da main corna block.”
23 An dass jalike wat Da One In Charge
Make happen now,
Wen us guys see um happen,
Use tink, “Dass awesome!”
24 Dis da day fo no foget da awesome ting
Da One In Charge wen do!
Az why good us guys
Stay plenny good inside today!
25 Az why Da One In Charge
Try get us guys outa trouble
All da time too!
Eh! Da One In Charge
Try make eryting go good
fo us guys all da time!
26 Da pries guys tell:
“Us guys like fo good tings happen
To da one dat come hea
Cuz Da One In Charge give um
Da right fo come.
Us pries guys dat stay hea
Inside da Temple
Fo Da One In Charge,
Us like fo good tings happen
To all you guys.
27 Da One In Charge, he God fo real!
Da tings he wen do,
Az jalike he wen shine da light
On top all us guys!
All you guys,
Carry da tree branches ova hea
Fo dis spesho religious kine ceremony,
Carry um an bring um by da horns
Dat stick out from da altar.”
28 Eh God! You da God fo me!
I goin tell good tings bout you.
You da God fo me,
An I goin tell peopo
Dat you da greates!
29 Eh you guys! Tell good tings
Bout Da One In Charge
Cuz he good,
Cuz he stay tight wit his peopo foeva!