139
God Know Me An Take Kea Me
One David kine song fo God,
fo da main music guy
1 Eh! You Da One In Charge!
You check me out all da time
Fo see how I stay inside.
Az how you know eryting bout me.
2 Erytime I sit down o stan up,
You know bout all dat.
No matta you stay far away,
You know wat I tink.
3 From da time I wake up
Till da time I go sleep,
You see wea I go.
You know awready how I do stuff.
4 Eh Boss, even befo
Someting come outa my mout,
Fo real, you know eryting I goin tell!
5 You stay all aroun me fo take kea me.
You put yoa hand on top me
Fo no let notting happen to me.
6 Da way you know me,
Blow my mind!
You know me mo betta
Den I know me!
7 Eh, no way I can go some place
Wea yoa Spirit no stay!
No mo one place fo me run away to,
An you no stay dea too!
8 If I go up to da sky, you stay ova dea.
If I spread out my bed
Inside da Mahke Peopo Place,
You stay ova dea too.
9 If I get da kine bird wing fo fly,
From da place wea da sun come up,
To da mos far side a da ocean
Wea da sun go down,
Fo live dea,
10 No matta, cuz you stay dea too!
Even dea you goin show me wea fo go
An grab me wit yoa hand
Fo no let me fall down.
11 If I tell, “Fo shua, da dark goin hide me!”
O if I tell, “Da nite goin cova up
Da light fo me!”
12 No matta—
Cuz even nite time,
No stay dark enuff
Fo you no see me.
Fo you, da nite time stay light
Jalike da day time.
Fo you, in da dark o in da light,
No make diffrence.
13 Eh God, you wen make me
An eryting inside my body.
Wen my muddah come hapai,
You wen put togedda all my parts.
14 I like tell you dat you da greates,
Cuz wen you wen make me
You wen do spesho kine tings fo me,
An ho! dass skery!
Eryting you make, stay awesome!
Inside I know dass da trut
Fo real kine!
15 Da way my bones come togedda,
You wen see um real good,
Dea inside my muddah
Wea nobody can see um.
Was jalike I stay deep unda da groun
All da time you put
Da diffren piece togedda.
16 Befo I born, you see my body
Come togedda.
You wen write down inside yoa book
Wat goin happen ery day I stay live.
17 Eh God! Az real deep,
Da way you tink bout me!
Da stuff you tink bout me,
No can count!
18 Wen I try fo count um,
Dey mo plenny den da sand
On top da beach!
Still yet, erytime I wake up,
You stay right dea wit me!
19 Eh God! I like fo you kill da peopo
Dat do bad tings!
All you killas, get outa my life!
20 Dem guys, da ony time
Dey talk bout you,
Az wen dey like scam somebody.
Dey use yoa name fo do
Any kine pilau kine stuff,
Cuz dey stay agains you.
21 Eh! You Da One In Charge!
Da peopo dat hate you,
Dey da ones I goin hate too!
Da peopo dat go fight you,
Dey good fo notting!
22 I hate dem guys to da max!
Dey da ones I stay agains.
23 Eh, God! Check me out
Fo see how I stay deep inside.
Go tes me, an know wat tings
I tink bout dat bodda me.
24 If you see anyting inside me
Dat bodda you, go tell me.
Show me da right way fo go
Fo get da kine life
Dat goin stay to da max foeva!