141
No Let Me Get Hurt!
One David kine song.
1 Eh! You Da One In Charge!
I stay yell fo you come help me!
Do someting fo me, right now!
Wen I yell fo you help me, lissen!
2 Wen I pray, go make wat I pray be okay,
Jalike incense dat oua peopo burn
Wen dey make one sacrifice in front you,
Wen I put up my hands fo pray,
Make um be
Jalike da late aftanoon sacrifice.
3 Eh! Da One In Charge,
I like you make shua
Notting bad come outa my mout!
Proteck eryting I tell.
4 No let da way I stay inside
Make me do da kine tings dat stay bad
O do horraz kine stuff.
Wen odda peopo no do wat stay right,
No let me even eat
Dea onolicious kine grinds.
5 If da peopo dat stay do wass right
Slap my head,
Dat show dey my frenz
Dat stay tight wit me!
If dey tell wat I do stay wrong,
Dass good, jalike dey put
Da bestes kine haku lei
On top my head!
All da time I stay pray
Dat da bad guys no can do notting.
6 Bumbye, wen da good guys
Throw da bad leada guys
Ova da cliffs,
Den da odda bad guys
Goin lissen wat I tell,
Cuz az good, wat I tell.
7 Jalike wen da groun split an open up,
Oua bones goin scatta all ova da place
In front da Mahke Peopo Place.
8 Eh! You Da One In Charge!
You da boss guy fo me!
I look at you fo help me.
You da one dat can hide me
An no let nobody kill me.
9 Da peopo dat do bad kine stuff,
Dey make plenny trap fo catch me,
So watch ova me, so dey no can trap me.
No let da bad guys trap catch me.
10 Da peopo dat do bad kine stuff,
I like fo dea net catch dem, not me,
Wen I da ony one go pass dea net.