146
God Get His Peopo Outa Trouble
1 Eh you guys! Tell good ting
Bout Da One In Charge!
Fo me, I tink lidis:
“Tell good tings
Bout Da One In Charge!”
2 All da time I stay alive,
I goin tell good tings
Bout Da One In Charge.
Till I mahke, I goin sing songs
Bout my God,
Fo tell um how good he stay.
3 No trus some guy
Jus cuz he one leada guy
Wit one good heart,
Cuz he ony one guy!
He no goin get you outa trouble!
4 Dat kine guy,
Bumbye he no goin breave no moa,
He goin go back inside da groun.
Right den an dea,
Eryting da guy plan fo do
Goin come poho.
5 Whoevas get da God
Dat Jacob wen pray to fo help dem,
Dey can stay good inside.
Dey stay shua dat bumbye
Da One In Charge goin do
Good tings fo dem,
Cuz he da God fo dem.
6 God, he da One wen make da sky
An da earth,
Da ocean too, an eryting inside um.
Fo shua can trus
Da One In Charge foeva,
Fo do wat he tell he goin do.
7 God, he da judge dat make shua
Dat da right ting happen
Fo da pooa ting peopo
Dat get plenny presha.
He give food to da peopo
Dat stay hungry,
An he let da prisona guys go.
8 Da One In Charge, he da One
Dat make da peopo
Dat no can see, see,
An help da peopo
Dat gotta carry too much, fo stan up,
An get love an aloha fo da peopo
Dat stay do wass right.
9 Da One In Charge, he da One
Dat take kea da foreign peopo
Dat live wit us guys.
He come fo help da kids
Dat no mo muddah an faddahs
An da widow wahines.
But fo da peopo
Dat stay do bad kine stuff,
Da One In Charge jam up
Da way dey like go.
10 Da One In Charge,
He goin stay king foeva!
You peopo dat go Mount Zion
Fo pray to God,
Yoa God stay king fo da peopo
Dat stay alive now,
An fo all da ones
Dat goin come from dem bumbye!
Eh you guys! Tell good tings
Bout Da One In Charge!