149
God Make His Peopo Da Winnas
1 Eh you guys! Tell good tings
Bout Da One In Charge!
Sing one new kine song
Fo Da One In Charge!
Wen all da peopo dat stay tight
Wit him come togedda,
Tell good tings bout him!
2 Eh you Israel peopo! Show how good
You feel inside,
Cuz Da One In Charge
Wen make you guys!
You peopo dat come togedda fo pray
On top Mount Zion,
Go dance an sing,
Cuz you get Da One In Charge
Fo yoa king!
3 Tell good tings bout Da One In Charge
Cuz you know wat kine god him!
Dance fo tell good tings bout him,
An play tammorine an small harp,
An sing fo him!
4 Do dat, cuz Da One In Charge
Feel real good bout his peopo,
Da ones dat know dey no need
Go firs erytime.
Da One In Charge make dem da winnas,
An make um come awesome.
5 Dose peopo dat stay tight
Wit Da One In Charge,
Cuz dey da winnas
An dey get plenny respeck.
Even wen dey try go sleep,
Dey tell good tings
Bout Da One In Charge.
6 Da peopo dat stay tight wit God,
Dey stay tell good tings bout him.
An carry one sharp sword,
7 Fo pay back da bad kine tings
Da diffren nations wen do.
Fo shua, dey goin punish
Da diffren peopos.
8 Dass dea job,
Fo catch da odda peopos king guys,
An tie um up wit chains,
An put iron kine leg chains
On top all da leada guys
Dat da odda peopos get respeck fo.
9 God, da judge, wen write awready,
Dat dose odda peopo gotta get punish.
An da peopo dat stay tight wit God,
Dey get da awesome job fo punish um.
Eh you guys! Tell good tings
Bout Da One In Charge!