26
One Guy Dat Do Da Right Ting
Pray To God
One David kine song
1 Eh! You Da One In Charge! You da judge,
So tell erybody I neva do notting bad!
Cuz da way I live,
I do eryting how I suppose to do.
I stay trus you, Da One In Charge,
An I no change my mind.
2 So tes me, Da One In Charge.
Make me pass yoa tes.
Hemo all da junks I get inside,
Look deep inside me,
An look inside my head.
3 Cuz all da time, I know fo shua you stay tight wit yoa peopo.
Da way I live, I know I can trus you.
4 I no hang out wit da kine guys dat do wase time kine stuff.
I no stick aroun da ones dat like hide wat dey do.
5 Wen da peopo dat do bad kine stuff come togedda,
I no like wat dey do!
Da peopo dat no stay do wass right,
I no hang out with dem!
6 Eh! You Da One In Charge! Inside yoa Temple, I goin wash my hands
Fo show dat I neva do notting wrong.
Den I goin walk aroun yoa altar fo make da sacrifice ready.
7 Same time, I goin make shua erybody hear me tell
Dat you da bestes.
I goin tell da story
Bout all da awesome kine tings you do.
8 Eh! You Da One In Charge! Fo real kine,
I like da house wea you live!
Fo real kine, I like go da place
Wea peopo see how awesome you stay!
9 Wen you go afta da peopo dat do bad kine stuff,
No take away my life, same time.
Wen you go afta da killa guys,
Make shua I no mahke!
10 Dem guys, dey real sly buggahs
Fo make bad kine stuff happen.
Peopo give dem plenny unda da table kine money.
11 But me, da way I live,
I do eryting how I suppose to do.
Az why, get me outa trouble
An do good tings fo me.
12 Now, jalike I get one solid place fo stan on top
Dat stay flat, az how I no goin fall down.
An ova hea, wea all God peopo come togedda,
I goin tell, “Da One In Charge, he do real good tings fo me!”