31
Mahalo Fo Get Me Outa Trouble
Fo da main music guy,
one David kine Song Fo God
1 Eh! You Da One In Charge!
You da One fo proteck me.
No let nobody make me come shame long time!
Get me outa trouble
Fo notting bad happen to me,
Cuz you erytime do wat stay pono.
2 Come close an lissen me.
Get me outa trouble! Fas kine!
Be jalike one big rock fo proteck me.
Be jalike one strong wall fo me
Inside da mountains
Dat no let nobody come agains me
Fo kill me.
3 Cuz you, you jalike one big rock fo me,
An one place fo me hide inside da mountains.
Now, show me how
Fo get outa dis bad place,
Fo erybody know wat kine god you.
4 Da guys dat stay agains me
Set up one trap fo catch me,
But no let me go dea,
Cuz you da One dat make shua
I no get hurt.
5 Dass why I turn ova my life to you,
Cuz I stay trus you.
Eh! Da One In Charge,
I like you get me outa all dis,
Cuz you da kine god I trus.
6 Da peopo dat pray
To da idol kine gods dat worth notting,
I hate dat kine peopo!
But Da One In Charge, I stay trus you.
7 You stay tight wit me cuz I yoa guy,
An dass how come I goin stay
Real good inside.
Cuz you wen see how I stay
All sore inside,
An you know da hard times I get.
8 You, you neva let da guys
Dat stay agains me capcha me.
You wen take me
One safe kine place.
I Suffa Plenny
9 Eh! You Da One In Charge!
Do good tings fo me,
Cuz I get all kine presha!
My eyes, tired
Cuz I stay sad inside an cry plenny.
My body, an inside me, same ting.
10 My life, all poho,
Cuz I stay real sore inside.
I ony goin live short time,
Cuz all da time I stay moaning.
Befo I strong, but now I ony tired,
Cuz a da bad tings I wen do.
Even my bones come weak.
11 All da peopo dat stay agains me,
Dey make me come shame.
My neighba guys,
Dey mo sked.
Even my frenz
Stay sked fo come by me.
Wen dey see me stay walking
On top da street
Dey get outa dea fas.
12 Peopo ack jalike I no stay,
Jalike I mahke awready,
Jalike I was one plate
Dat stay all smash up.
13 Cuz you know, I hear da bad kine tings
Dat plenny peopo tell bout me,
An all aroun me,
Get stuff dat make me real sked.
Get peopo dat come togedda agains me.
Dey figga how fo kill me.
I Stay Trus God
14 But eh, you Da One In Charge!
I stay trus you.
I tell, “You, you da God fo me!”
15 You stay in charge a eryting
Dat goin happen to me bumbye.
So, get me outa trouble
From da peopo dat stay look fo me
Cuz dey like make me suffa.
16 Smile at me,
Da guy dat stay work fo you.
Get me outa trouble
Cuz you stay tight wit me.
17 Eh! You Da One In Charge!
No let notting happen
Fo make me come shame!
You da one I stay yelling to
Fo help me.
Da peopo dat stay do wass not right,
Dey da ones goin come shame.
Dey goin go da Mahke Peopo Place
An dey no can tell notting.
18 Get peopo dat ack high makamaka kine,
An tink dey mo betta den erybody.
Dey no shame fo talk bad
Bout da peopo dat do wass right.
But dey erytime bulai.
Mo betta dey shut up,
Jalike somebody tie up dea mout.
God, He Good
19 Eh God! You awesome,
How good you stay!
You stash plenny good tings
Fo da peopo dat feel jalike dey sked
Wen dey stay in front you.
You do plenny
Fo help da peopo dat come by you
Fo you take kea dem.
You do good tings fo dem
In front erybody.
20 You hide dem right dea wea you stay
Fo make shua da peopo
Dat make plan fo hurt dem, no can.
You put dem inside one place
Wea da oddas no can find um,
Fo da peopo dat talk bad bout dem
No can do notting.
21 Erybody, tell good tings
Bout Da One In Charge!
Cuz he stay tight wit me
Cuz I his guy, an dass awesome!
He make shua notting hurt me,
No matta I feel jalike odda peopo
Stay fight fo take ova my town.
22 Me, I wen come sked, an right den an dea I wen yell,
“Eh! I stay cut off from you,
Da One In Charge!”
But you wen hear me
Yell to you fo help me
An you wen help me.
23 Eh, all you peopo
Dat stay tight wit Da One In Charge,
Get love an aloha fo him!
Da ones dat live
Da way he like fo dem live,
He proteck um.
But anybody dat ack high makamaka,
Da One In Charge
Pay dem back big time fo dat.
24 So den. Stay strong inside,
An no sked notting,
All you peopo dat stay wait
Fo wat Da One In Charge
Goin do bumbye!