43
Da pries guys from da Korah ohana make dis song fo teach. Dis song an Song 42, befo time was one song.
1 Eh God! You da judge
Fo show erybody dat I okay.
I need fo you show proof
Dat I neva do notting bad.
Cuz da whole nation,
Dey no stay tight wit you!
I need fo you rescue me
Away one place
Wea dey no can hurt me.
Away from da ones dat stay bulai
An do bad tings to me.
2 Cuz you da God fo me. You jalike
One strong wall so I no get hurt.
So, how come you wen dump me?!
How come I gotta live real sore inside,
An da peopo dat stay agains me,
Dey erytime come afta me?!
3 Shine yoa light fo show wass true,
Fo me know wea fo go.
Dass how I goin go by Zion Hill
Dat stay spesho fo you,
Cuz dass da place you live.
4 Den I goin go by da altar
Fo make one sacrifice fo you, God.
You God! Wen I tink bout you,
I stay real good inside!
Dass why I goin sing good tings
Bout you wit my harp.
Eh God! You da God fo me!
5 I tink lidis: “Eh! No need I stay
All bum out inside!
No need I stay moan!
Cuz God, him da One I wait fo,
Fo help me!
Cuz you know wat?
I get mo plenny good tings
Fo tell bout him!
Him, he da God fo me,
An he erytime get me outa trouble.”