46
God Stay Oua Side
Fo da main music guy. Da Korah ohana guys make dis song fo sing falsetto kine.
1 God, he jalike one place
Fo us guys go hide.
He make us guys stay strong
Fo notting bad happen.
Wen get all kine trouble,
God stay ready
Fo help us guys plenny.
2 Dass how come us guys no stay sked,
No matta get earthquake
An da mountains fall down
An broke into small pieces
An fall down inside da ocean.
3 Da watta inside da ocean
Goin make big noise
An goin get plenny spray!
Da mountains goin shake
Cuz da waves come real big!
(Time out fo da music.)
4 Da peopo stay live inside da big town
Wea get one riva.
Dass wea da God Dass Mo Importan
Den All Da Odda Gods
Get his spesho place.
Da peopo ova dea, dey feel real good
Cuz a da watta from da riva.
5 God, he stay right dea
In da middo a da town.
Az why no mo notting
Can wipe out da peopo dea.
God goin help dem,
Even wen come early morning time.
6 Wen God tell someting,
Soun jalike thunda.
Da diffren peopos,
Dey make plenny noise, cuz dey sked!
Dea govmen guys,
Dey no can stan up strait!
Jalike da groun stay melt unda dem!
7 Da One In Charge,
Da God Ova All Da Armies,
He stay right hea wit us guys!
Him da God dat oua ancesta guy
Jacob wen pray to,
God one strong wall
Dat no let nobody attack us guys!
(Time out fo da music.)
8 Go come see da kine tings
Da One In Charge stay do!
He do awesome an unreal tings
Fo wipe out plenny place
All ova da world,
9 An all ova da world,
He make peopo pau fight
So dat no mo war.
He broke dea bows fo shoot arrow,
An broke dea spears too,
An burn up dea shields wit fire.
10 He tell: “No fight!
No foget dis: Me God!
All da diffren nations goin know
Dat I da main one.
All ova da world
Dey goin know dis!”
11 Da One In Charge,
Da God Ova All Da Armies,
He stay right hea wit us guys!
He da God
Dat oua ancesta guy Jacob
Wen pray to.
He da One dat make shua
Nobody attack us guys!
(Time out fo da music.)