57
Sing, No Matta Get Peopo Stay Agains You
One David kine song fo da main music guy fo sing wen get trouble. Get da tune “No Wipe Um Out.” He tink bout da time he run away from King Saul an go hide inside one cave.
1 Eh God! Do good tings fo me!
Do good tings!
Cuz wen I aks you fo take kea a me,
Den, nobody can hurt me.
I like you take kea me,
Jalike da muddah bird
Put da bebe birds unda her wing
Fo nobody hurt dem.
I goin stay by you fo nobody hurt me,
Till all dis stuff pau,
Dat can wipe me out
Jalike one storm.
2 I yell to God fo help me,
Da God Dass Mo Importan
Den All Da Odda Gods,
Da God dat know wat he like me fo do,
An he goin make um fo me do um.
3 I like fo God reach down from da sky
Fo get me outa trouble.
If somebody like make any kine to me,
I like God make um come shame.
(Time out fo da music.)
I like fo God stay tight wit me
Cuz I his guy
An he erytime do
Wat he tell he goin do.
4 Weneva I go sleep,
Da peopo dat stay agains me,
Dey jalike lions all aroun me
Dat like eat peopo,
An get sharp teet jalike spears an arrows.
Wen dey talk, jalike dey cut me
Wit one sharp sword.
5 God, I like erybody know,
Dat you mo big even den da sky!
I like erybody on top da earth,
Know how awesome you stay!
6 Da peopo dat stay agains me,
Dey wen make ready
One net fo catch me.
Cuz a dat, I wen feel all bum out.
Dey wen dig one big hole
Wea dey know I goin go,
But dey da ones
Wen fall down inside dea!
(Time out fo da music.)
7 Eh God! Inside, I stay solid!
I stay solid inside!
I all ready fo sing an make music!
8 I like wake up
An make ready my small harp
An my bass harp,
An get up befo da sun come up.
9 You my Boss,
An I goin tell all da diffren peopos dat you da greates!
I goin make music fo you
Fo all da diffren countries hear!
10 You stay plenny tight wit yoa peopo
Jalike get plenny sky up dea!
You da kine God us guys can trus plenny,
Jalike get plenny clouds inside da sky!
11 God, I like erybody know,
Dat you mo big even den da sky!
I like erybody on top da earth know
How awesome you stay!