68
God Da Winna
Fo da main music guy sing um, one David kine Song Fo God
1 I like fo God make ready fo fight.
I like fo da peopo dat stay agains him
Run away all ova da place.
I like fo da ones dat hate him
Run away from in front him.
2 I like fo God make da peopo
Dat do bad tings run away,
Jalike da wind make da smoke go way,
Jalike da wax melt in front one fire!
I like fo da peopo dat do bad tings
Come all wipe out
Wen dey stan in front God!
3 But fo da peopo dat stay do wass right,
I like fo dem come real good inside
An feel good wen dey come
In front God!
I like fo dem dance an sing
Cuz dey stay good inside!
4 Sing fo God!
Sing bout how him da bestes,
Sing bout wat kine god him!
Tell he da mos importan one,
Da One dat ride on top da clouds,
He get da spesho name “Yah!”
Dance an sing in front him!
5 God live inside da place
Dat stay spesho fo him.
He jalike one faddah guy
Fo da kids dat no mo faddah,
An jalike one judge
Dat take kea da widows.
6 God da one dat give one ohana
To da peopo dat no mo ohana.
Wen he let da prisona guys
Go outa prison,
He make shua dey come out solid.
Ony da peopo dat go agains God
Goin live
Inside one hot an dry land
Wea no mo notting.
7 Eh God! Dat time wen you wen go out
In front yoa peopo
An march thru da boonies,
(Time out fo da music.)
8 Da groun wen shake an wen rain
Cuz you was dea,
Da God dat stay on top Mount Sinai,
Da God dat da Israel peopo pray to.
9 God, you wen dump
Plenny rain on top da land,
Cuz you like give rain,
no matta you no need do dat.
No matta da land you own
Stay poho dat time,
You fix um.
10 Yoa peopo live ova dea.
God, you good,
An az why you make shua
Dat da peopo dat no mo notting
Get wat dey need.
11 Wen da Boss talk,
Get choke plenny messenja wahines,
jalike one army,
Dat go out fo tell
Da good kine stuff to peopo.
Dey tell:
12 “All da king guys an dea armies,
Dey run away!
Da wahines dat stay home,
Dey half half all da stuffs
Dea guys take away from da kings—
13 Even da ones dat stay wit dea sheeps
An no fight,
Even dem get stuff like doves
Wit dea wings all cova ova
Wit silva an pure gold.”
14 Dass wat wen happen, da time
Da God Dat Get All Da Powa
Wen make all da kings run away.
Dat time, get stuff all ova da groun,
Jalike wen snow come down
On top da Black Mountain.
15 Eh! All you peopos dat pray on top
Da awesome mountains Bashan side,
Ova dea wea get all kine pali
Inside Bashan,
16 Wen you guys look from yoa mountains
Dat get all kine pali,
How come you guys come jealous
Wen you look da small kine mountain
Dat God like fo be his place fo stay,
Da place Da One In Charge
Pick fo stay dea foevas?
17 God wen come
Wit awesome war wagons,
Ten tousan, an den ten tousan moa.
You, my Boss, wen come from Mount Sinai
Wit all dem
To da place dat stay spesho fo you.
18 You wen go up to da mos high place.
You wen capcha plenny prisonas.
You wen take da presents
Peopo bring you,
Even da peopo
Dat no like fo Yah live dea,
Dass God, Da One In Charge!
19 We like tell dat my Boss
Stay do good tings fo us guys.
Ery day, he help us live.
God, he da One
Dat stay get us guys outa trouble.
(Time out fo da music.)
20 Oua God, he da kine God dat do plenny
Fo get us guys outa trouble!
He Da One In Charge a me.
He do tings fo us guys no mahke!
21 Fo shua, da peopo dat stay agains God,
He goin bus dea head.
He goin smash dea skull an long hair
Fo da ones dat still stay do da tings
Dat make dem come shame.
22 My Boss tell dis:
“I goin bring back da guys
Dat stay agains me from Bashan,
An from da bottom a da ocean.
23 Cuz a dat, you my peopo
Goin get yoa feets wet
Wit da blood from da ones
Dat stay agains you,
An yoa dogs goin lick up
Da blood from dea bodies.”
24 Eh God, peopo goin see yoa parades.
Az wen da God dass my king go
Inside da place dat stay spesho fo him.
25 Da singa guys go inside firs,
Den da music guys,
An girls playing da tammorine.
26 Dis how dey goin sing:
“Bring erybody togedda
Fo tell dat God do good tings fo us!
Eh you guys! Tell good tings
Bout Da One In Charge,
All you peopo dat get blood line
From yoa ancesta guy Israel!”
27 Den, da peopo from da mos small ohana
Come, dass da Benjamin ohana.
An afta, big stack leada guys
From da Judah ohana,
An da leadas from da Zebulun
An Naftali ohanas too.
28 Yoa God wen tell you guys,
You gotta come strong.
Eh God, show how strong you stay,
Jalike you wen show us guys
Befo time!
29 Cuz you wen put yoa Temple
Inside Jerusalem town,
Plenny kings bring presents dea
Fo you.
30 Tell yoa army guys fo yell an attack
Da odda nations dat no do wass right.
Put presha on dem fo dem bring
Silva fo pay you guys.
Dose nations jalike da wild animals
Dat live by da riva
Wea da tall reeds grow.
Dey jalike one bunch young calfs
Dat get da bulls in charge a dem.
But God goin scatta da nations
Dat like beef.
31 Ambassada guys goin come from Egypt.
Da Sudan peopo goin bring presents fo God.
32 Sing fo God, ery place
Inside da world dat get one king!
Make songs fo my Boss!
(Time out fo da music.)
33 Lissen to da One dat stay ride
Inside da sky
From da time he make da world
Till now!
Get powa, his voice!
34 Tell erybody, dat God get plenny powa.
He da awesome one
Dat stay da king fo da Israel peopo.
Even up dea inside da clouds,
He get powa!
35 God, you awesome an unreal
Wen you stay inside da place
Dass spesho fo you!
Da God fo us Israel peopo,
He give powa to his peopo,
An make us strong!
I like erybody tell
Da good tings God wen do!