7
God, Be Da Judge Fo Me!
One David kine Song Fo God. He sing um fo tell Da One In Charge bout Cush from da Benjamin ohana.
1 Eh! You Da One In Charge! You my God.
I need fo you proteck me!
Cuz get guys afta me dat like kill me!
Get me outa dis!
2 If you no do dis,
Dey goin rip me up an kill me, jalike one lion
Dat drag me some place nobody can get me out.
3 Eh! You Da One In Charge! You my God!
If fo real I wen go do dis—
If I wen do dis bad kine stuff,
4 O if I wen go set up my fren
So someting bad happen to him,
O if I rip off somebody dat give me hard time,
Jus cuz I like do um—
5 If dass wat I wen do,
Den okay fo da guys dat stay agains me
Chase me an catch me.
Okay fo dem poun me on top da groun an kill me
An leave my mahke body on top da dirt.
(Time out fo da music.)
6 Eh! You Da One In Charge! Do someting!
Get mad an stan up fo fight!
Da guys dat stay agains me,
Dey all huhu, so go afta dem!
Do someting fo help me,
You da judge dat tell wass right!
7 Make all da diffren peopos come togedda aroun you.
Same ting jalike befo time,
Try sit on top yoa throne, up ova dem.
8 Eh! Da One In Charge, you da judge fo all da diffren peopos
Kay den, Da One In Charge, show dat I stay right wit you,
Cuz nobody can poin finga me.
You, da Mos Importan One!
9 Cuz you da God dat do wass right erytime,
An tes wat peopo tink
An judge how dey stay inside.
Make da peopo dat stay do bad tings,
Fo no do um no moa!
Make da peopo dat stay do wass right,
Come strong an solid.
10 God, he take kea me, jalike one shield,
Da peopo dat do da right ting erytime,
He get dem outa trouble.
11 God, erytime he da kine judge
Dat judge da right way,
Az why he get mad ery day
Cuz a da bad kine stuff peopo do.
12 If somebody no change dea mind
An no pau do wat dey not suppose to do,
Den, God goin make his sword sharp
An make ready fo shoot his arrows,
13 God goin make ready da tings he use fo kill,
An he goin light his fire arrows.
14 You know wat? Da bad kine peopo,
Dey jalike wen one wahine come hapai,
Den go born da bebe.
Dey tink how fo do bad tings,
An tink how fo make trouble happen,
Den dey go bulai peopo.
15 Dey dig one big hole fo trap peopo,
An make um plenny deep,
But dey da one goin fall down
Inside da trap dey wen put.
16 All da trouble dey make,
Goin come back to dem an make um suffa.
Cuz dey bus up odda peopo,
God goin bus dem up.
17 I goin tell erybody dat Da One In Charge, he da bestes
Cuz he do da right ting erytime!
I goin sing so peopo know wat kine god him,
Da One In Charge, da God Dass Mo Importan Den All Da Odda Gods!