74
Da Temple All Bus Up
One Asaf kine poem
1 Eh God! How come
You wen dump us guys?!
Goin be lidat all da time, o wat?!
You stay real huhu wit us guys,
Jalike smoke come outa yoa nose!
An us, jalike da sheeps
Dat live on top yoa land
An you jalike da sheep guy
Dat take kea us!
2 No foget da peopo dat stay come
Togedda fo pray to you,
Da ones dat long time befo time
You wen buy um
Fo be one peopo
Dat stay tight wit you.
No foget Mount Zion, wea get
Da Temple wea you stay.
3 Go up to da place
Dat stay bus up all da time.
Da army guys dat stay agains us
Wen make eryting come bad
Inside da Place
Dat Stay Spesho Fo You!
4 Da army guys dat go agains you
Wen go inside da place
Wea you meet wit yoa peopo.
Dey wen yell plenny cuz dey win.
Dey wen put dea marks all ova da place
Fo erybody know dey wen win.
5 Dey ack jalike guys dat carry dea axes
Fo cut down one bunch trees.
6 An den, same time, dey go smash
Da carve wood inside da Temple
Wit ax an crowbar.
7 Dey wen burn down da place
Dat stay spesho fo you,
All da way to da groun.
Da place wea erybody know dat you live,
Dey wen make um so no can pray dea.
8 Dey wen tink, “Eh!
Us go bus up da Israel peopo!”
So den, dey wen burn up
All da odda places too,
Wea peopo come togedda fo pray to God
All ova da land.
9 Us guys, no mo spesho mark
Fo show who us.
No mo nobody talk fo God no moa.
No mo nobody wit us know
Wen all dis trouble no goin be no moa.
10 God, how long mo dey goin
Make us come shame,
Da guys dat stay fight wit us?!
Da guys dat come agains us,
Dey goin talk bad bout you
Fo give you one bad rep, o wat?!
11 How come you no use yoa powa
Fo help us?
Take yoa hands outa yoa pocket,
An wipe out dem army guys!
12 Still yet, from long time befo time,
You, God, stay da king fo me.
You do plenny inside da world
Fo get yoa peopo outa trouble.
13 Was you wen split
Da watta inside da sky
From da watta inside da ocean,
Cuz you strong!
Was you wen smash
Da heads a da sea monstas
On top da watta.
14 Was you wen smash da heads
A da Leviatan sea monsta.
You wen give his body fo feed
To da wild animals
Dat live wea no mo peopo.
15 Was you wen open up da pukas
Fo watta come outa da groun
An split da valleys fo da streams.
Was you wen dry up da rivas
Dat get watta all da time.
16 You, da boss fo da day time,
An fo da nite time too.
Was you wen set up da sun
An da odda tings dat shine light.
17 Was you wen make wea da land
Meet up to da watta.
An wen come hot an wen come cold,
You wen make dat too.
18 Eh! You Da One In Charge!
Try no foget dis—
Da peopo dat stay agains you,
Dey like make you come shame.
Da stupid peopo dat tink
You not importan,
Dey talk bad bout who you.
19 No turn me ova to dem,
Dey jalike wild animals
Dat like kill one small dove.
Yoa peopo dat suffa plenny
No foget eva, dea life too.
20 Tink plenny bout da deal
You wen make wit us guys.
Cuz all ova da land, get dark places
An plenny peopo hide dea,
Dat like bus up odda peopo.
21 Do someting, fo da peopo
Dat get plenny presha
No come shame one mo time.
Do someting fo help da pooa peopo
An da ones dat no mo notting,
Fo dem tell good tings bout you,
Cuz dey know wat kine god you.
22 Stan up an make shua erybody know
How come you stay do
Wat you stay doing!
No foget how da stupid peopo
Talk all day fo try
Make you come shame.
23 No foget wat da peopo tell,
Da ones dat stay agains you,
An da big noise dat come out
Mo an mo all da time
From da ones dat like win ova you!